LEPANTE.
Soit comme il vous plaira, je vous ay tout remis.
DORANTE.
Il sortira, dit-il, hors de vostre heritage,
Si tost que par un ample & constant tesmoignage
Il sçaura plainement que vous estes l'aisné
De la sage Ursinie & du grand Prytané,
Vous aurez cependant deux places en Sicile,
Et luy pour sa prison, mon Palais & ma Ville:
Mais touchant cette debte, il faudra s'il vous plaist
Prendre le principal, & donner l'interest:
LEPANTE.
Je n'en demande plus, de bon cœur je le donne,
LYPAS.
Et moy je le reçoy,
CELIE.
Vrayment je m'en estonne,
Veu la grandeur de cœur dont le Ciel t'a doüé,