ARMILLE.
Son silence l'advoüe;
Mais le Seigneur Tenare est adroit en un point,
Que pour nous mettre en peine, il ne le dira point.
TENARE.
Non, chacun en croira ce qu'il en voudra croire.
CELIE.
Et moy je le veux dire, il y va de ma gloire;
Oüy, Madame, il est vray, ma grace, ou mon bonheur,
Ou plustost tous les deux, m'ont acquis cet honneur;
Nos deux cœurs sont bruslez d'une ardeur mutuelle,
Qui du moins dans le mien sera perpetuelle.
TENARE.
Et dans le mien aussi, n'en doutez nullement.
FELICE.
Je m'estouffe de rire.