O! grands Dieux qu'est-cecy, parmy tant de merveilles
Doy-je point soupçonner mes yeux & mes oreilles?
Qu'ay-je oüy? qu'ay-je veu? mes sens émerveillez,
Pouvez-vous m'asseurer d'estre bien éveillez?
Non, non, j'ay fait un songe, ou je suis enchantée.
CELIE revenuë.
Quoy, Madame, ce fou vous a-t'il attristée?
ISMENIE.
Non pas tant que surprise.
CELIE.
Eh bons Dieux! & comment?
ISMENIE.
Ou j'ay sujet de l'estre, ou par enchantement
Ce qui c'est dit & veu, n'est qu'ombre & que mensonge,
Ou tous les assistans n'ont fait qu'un mesme songe.
CELIE.