ISMENIE.
Possible jusqu'icy l'a-t'il fait par contrainte,
Et sa necessité merite d'estre plainte.
LEPANTE.
Je l'advoüe, & moy-mesme ayant fait comme luy
Je devrois me servir de l'excuse d'autruy;
Que je vous sçay bon gré d'avoir de la tendresse
Pour les cœurs genereux que la Fortune oppresse,
C'est par là que j'espere, & par là, que je croy,
Que vous aurez encor quelques pensers pour moy.
ISMENIE.
Je serois trop ingrate, inconstante & blamable,
Si pour estre moins grand vous m'estiez moins aymable,
Vostre sort au contraire accroist mon amitié
Par ces tendres pensers qu'inspire la pitié,
La perte d'un Estat que je causay moy-mesme,
Ne doit pas empescher qu'un bon cœur ne vous ayme;
C'est pourquoy (l'honneur sauf) esperez tout de nous,
Comme si la Sicile estoit encore à vous.
LEPANTE.
Que j'espere, & Lypas, à qui l'on vous destine?
ISMENIE.
Je luy feray si froide & si mauvaise mine,
Que s'il n'est insensible il esteindra son feu.