LYPAS.
Allons, nous verrons tous s'il a si bonne mine.
ACTE IV.
SCENE PREMIERE.
DORANTE, ERPHORE.
ERPHORE.
Seigneur, quelque soupçon qui me tombe en l'esprit,
Je veux croire pourtant qu'Axala vous escrit,
Et qu'en cette hymenée il a l'effronterie
De disputer la palme au Roy de Ligurie;
Mais vostre jugement n'a pas dequoy douter
Que le plus grand des deux ne la doive emporter,
Si bien que maintenant c'est à vous à connestre
Quel rang tient ce Pirate, au prix du Roy mon Maistre.
DORANTE.
Je sçay quel est son rang, & quel celuy du Roy;
Mais je suis obligé de luy garder la foy.
ERPHORE.