§ 193. P. [21], l. 4: Tant esploita.—Ms. d’Amiens: Si vint li roys devant Vennes et l’asega, monseigneur Olivier de Clichon dedens et monseigneur Hervy de Lion et pluisseur autre gentilhomme dou pays ossi, qui estoient de le partie monseigneur Carle de Blois. Quant la comtesse de Montfort sceut la venue dou roy englès, elle se parti de Hainbon en le compaignie monseigneur Gautier de Mauny et de monseigneur Yvon de Tigeri, et s’en vint devant Vennes veoir le roy, et li fist grant chière. Li roys le rechupt liement et doucement, enssi que bien le savoit faire.
Quant messires Charles de Blois, qui se tenoit au Suseniot, entendi ces nouvellez que li rois englès estoit arivés en Bretaingne si efforciement que pour reconcquerre ce qu’il tenoit et avoit concquis sour le comtesse de Monfort, si escripsi erranment lettrez et prist especials messages, et les envoya deviers le roy de Franche son oncle, en lui suppliant que il le volsist aidier et envoiier gens d’armes pour deffendre son pays et resister contre le puissance le roy englès. Quant li roys Phelippes eut veut les lettrez que ses nepveux li envoioit, et oy les messages qui l’emfourmoient de la force au roy englèz, si dist qu’il y entenderoit vollentiers, car ce estoit raison, pour secourir son neveult, qui tenoit en fief et en hoummaige la duchié de Bretaingne de lui. Si manda tantost le duc de Normendie, son ainnet fil, qui lors estoit à Roem, qu’il venist vers lui, et li escripsi le coppie des lettrez de monseigneur Carle de Blois, son cousin, affin qu’il se hastast et se pourveist de gens d’armes de Normendie et des basses marches.
Entroes que chil mesage allèrent et vinrent, li roys englès qui seoit devant Vennes, ardoit et essilloit le pays d’environ; et devant che ossi qu’il y venist, il estoit durement ars et gastéz et foulléz de tous costéz, tant qu’il euissent eu deffaulte de vivres, se il n’en ewissent amenet avoecq yaux grant fuisson d’Engleterre. Si y fist li roys englès, le siège durant, maint assault et mainte escarmuche, et moult dounna chiaux de Vennes affaire; mès la cité estoit forte et bien pourveue de gens d’armes et de toutte artillerie: si en estoit plus aisieule à deffendre. Fº 77 vº.
—Ms. de Rome: Si issirent les Englois petit à petit des vassiaus et se rafresqirent ou pais de la contesse. Et puis se ordonnèrent par le commandement dou roi, et se departirent un jour, et vinrent tout ensamble mettre le siège devant la chité de Vennes; et encloirent dedens bien deus cens cevaliers et esquiers, des quels mesires Oliviers de Cliçon, mesires Hervis de Lion, mesires Joffrois de Mailatrait, li viscontes de Rohen et li sires de Roce Tisson estoient chapitains et gardiiens. Si constraindirent li Englès et li Breton moult fort la chité de Vennes, et moult songneusement l’asallirent le terme que il furent par devant; mais elle estoit si bien pourveue et garnie de bonnes gens d’armes et de vaillans honmes les chapitains, que petit i conquissent. Fº 91 vº.
§ 194. P. [22], l. 23: Quant li rois.—Ms. d’Amiens: Quant li roys englès vit la cité si forte et bien furnie de gens d’armes et vit le povreté dou pays, il penssa bien qu’il ne poroit le chité avoir si tost concquise que de premiers il cuidoit. Et si avoit bien entendu que li comtez de Sallebrin, li comtes de Sufforch, li comtes de Pennebruch, li comtes de Cornuaille et li autre seigneur seoient devant Rennes, et avoient jà sis bien deux mois, et y avoient souvent assailli et peu fait, car la cité estoit bien garnie de gens d’armes et de touttez aultrez pourveanchez: si s’avisa li roys englèz qu’il yroit veoir ses gens que, grant temps a, n’avoit veut, et laisseroit partie de ses gens devant Vennes. Si ordounna le comte de Warvich, le comte d’Arondiel, le baron de Stamfort et monseigneur Gautier de Mauni à tenir le siège devant la dessus dite chité à cinq cens hommes d’armes et mil archiers. Puis se parti li roys et prist en se compaignie monseigneur Yvon de Tigeri et aucuns chevaliers de Bretaigne, pour lui enseignier les chemins, et le remanant de son host: bien estoient mil hommez d’armes et quatre mil archiers; et chevaucha tous ardans et essillanz le pays d’un lés et d’autre, et fist tant qu’il vint devant Rennes où il fu moult liement veus et recheus.
Quant messires Carlez de Bois sceut que li roys englès chevauchoit, si se parti dou Suseniot et s’en vint à Nantez, où il trouva monseigneur Loeys de Poitiers, comte de Vallenche, qui là estoit à grant gens d’armez, car il l’i avoit establi. Si entendirent chil seigneur es murs et as deffensses de le cité, et le remparèrent de tous poins et pourveirent d’artillerie et de tous vivrez, car bien penssoient que li roys englès les venroit veoir et espoir assegier.
Quant li roys Edouwars eut estet une espasse, environ cinq jours, avoecq ses gens devant le chité de Rennez, il entendi que messires Carlez de Blois estoit dedens Nantez et faisoit là son amas de gens d’armes. Si se avisa qu’il yroit celle part pour combattre à yaux, ou il lez assiegeroit dedens la cité meymez. Si s’esmut à l’onzime jour pour aller celle part, et leissa tous quois ses gens seans par devant Rennez; et chevauça tant, tout ardant et gastant le pays, que il vint devant la cité de Nantes. Et lui venu par devant, à une matinée, il fist ses gens bellement rengier et ordonner sus une montaigne assés priès de la cité, et là furent jusquez à haulte nonne, atendans que messires Carlez de Blois isist contre yaux; mès il ne le trova mies en son consseil. Si envoia li roys ses coureurs courir devant, qui ardirent les fourbours de le chité; et quant il vit qu’il ne les atrairoit point hors, il se loga assés priès de Nantez à siège fet bien ordonneement. Et messires Carles de Blois envoioit souvent messagiers deviers le roy son oncle, en lui segnefiant l’estat de ses ennemis: de quoy li roys de Franche, pour conforter son neveult, avoit fait ung très grant et especial mandement à tous noblez et non nobles de son royaumme, que il sieuwissent le duc de Normendie, son fil, chacuns o tout son effort, qui s’en alloit en Bretaingne. Si s’adrecièrent deviers ce cemin, duc, comte, baron, chevalier et touttez mannierrez d’autrez gens de qui on se pooit aidier en gherre. Li dus de Normendie s’en vint en le cité d’Angiers, et là s’aresta, atendans ses gens qui venoient. Et li comtes Loeys de Blois passa oultre à bien trois cens lanches, et s’en vint à Nantes deviers monseigneur Carlon, son frère, pour lui aidier à deffendre et garder le chité contre les Englès. Fos 77 vº et 78.
—Ms. de Rome: Quant li rois d’Engleterre vei che que point ne conquerroit la chité de Vennes legierement, et entendi que li pais de environ Vennes estoit si gastés et si mengiés que on ne trouvoit riens sus les camps, ne li coureur et varlet ne savoient où aler fouragier, et se tenoit là une moult grande hoost, il eut consel que il laisseroit là devant Vennes une partie de ses gens pour tenir le siège, et ils et li demorans de son hoost chemineroient oultre, et iroient mettre le siège devant la chité de Nantes, et là enclore mesire Carle de Blois: si se departi un jour de devant Vennes et i laissa à siège le baron de Stanfort, mesire Gautier de Mauni et pluisseurs aultres. Et estoient chil qui demorèrent environ cinq cens lances et douse cens archiers. Et puis se departi li rois o le demorant de son hoost, et estoient environ douse cens lances et vingt cinq cens archiers. Et ceminèrent tant avant et arrière que il vinrent devant Nantes, là où mesires Carles de Blois et sa fenme et si enfant estoient, et grant fuisson de bonne chevalerie de Bretagne, qui tenoient sa partie, de France et de Normendie, qui l’estoient venu servir.
Si mist là li rois d’Engleterre le siège et le asega d’un lés, car toute la chité de Nantes ne pooit il pas enclore, pour la cause de la rivière de Loire. Trop i faudrait de peuple, qui tout ce vodroit faire. Et avoient li Nantois et li François, qui là dedens se tenoient, lor issue et entrée, toutes fois que il voloient, au lés deviers Poito; et par là estoient il rafresqi de pourveances et de gens d’armes et de tout ce que il lor besongnoit.
Ensi se tint en celle saison li rois d’Engleterre devant la bonne chité de Nantes, et mesires Carles de Blois estoit dedens, et estoient bien cinq cens armeures de fier. Et encores i retournèrent mesires Lois d’Espagne, mesires Carles Grimaus, mesire Othon Doriie et Toudou, qui toute la saison s’estoient tenu sus la mer et riens n’i avoient fait, fors desrobé les marceans, otant bien ceuls de lor costé conme les aultres, qant il les avoient trouvé sus la mer, car Espagnols, Geneuois, Bretons et Normans, esqumeurs de mers, n’ont nulle consience à mal faire.