Les nouvelles en vinrent à mesire Gautier de Mauni, qui tous jours estoit des premiers levés et des darrains couchiés. Sitos que il le sceut, il fu armés et apparilliés, et aussi furent tout li compagnon, et montèrent as chevaus: «Or tos, dist il, li François s’en vont sans dire adieu. Il fault que il paient lor bien allée en auqune manière, et fault que il aient auqunes nouvelles qui lor soient venues de France, car li rois, nostres sires, est deçà la mer; et poroit avenir que ils et ses gens aueroient combatu les François, et i poroit avoir eu une grande desconfiture. Il nous en fault sçavoir, conment que ce soit, la verité; car c’est tout acertes que il se deslogent pour celle saison.» Adonc se departirent euls de le forterèce de Agillon en grant volenté, et estoient bien trois cens, messires Gautiers de Mauni tout devant. Et s’en vinrent ferir et fraper en la qoue de ces François qui s’en aloient; et trouvèrent d’aventure un chevalier de Normendie, mestre d’ostel dou duch, et de son consel, et estoit demorés derrière, pour faire haster le charoi et le sonmage: ils et tout chil qui avoecques lui estoient, furent pris, et biaucop encores d’aultres. Et retournèrent messires Gautiers de Mauni et les Englois dedens Agillon, et i ramenèrent tout le butin et les prisonniers.

Par ce chevalier de Normendie sceut li dis mesires Gautiers de Mauni tout ce qui avenu estoit en France, et conment li rois d’Engleterre avoit pris terre en Normendie et estoit venus tout son cemin, ardant et essillant le pais, et avoit passet la rivière de Sainne et de Sonme, maugré tous ses nuisans, et arestés à Crechi en Pontieu, et là atendu deux jours le roi de France et sa poissance et combatu et desconfi et cachiet en voiies. Et i estoient mort et demoret sus la place onse chiés de pais, quatre vins banerès et douze cens chevaliers et plus de trente mille honmes d’autres gens. Et apriès tout ce, il estoit alés mettre le siège devant la forte ville de Calais. De ces nouvelles fu li dis messires Gautiers de Mauni si resjoïs que il n’en vosist pas tenir cent mille frans, et dist au chevalier, lequel on nonmoit mesire Mouton de Cambeli: «Cambeli, des rices et bonnes nouvelles que vous avés dites, vous en vaudrés grandement mieuls.» Fº 125.

P. [4], l. 8: Li dis messires.—Ms. B 6: Messires Phelippes, pour eulx veoir, demanda son coursier, comme a ung grant seigneur qui pluiseurs en avoit; on luy amena ung jone poulain, que nouvellement on luy avoit envoiet et sur lequel il n’avoit oncques monté. Quant on lui ot amenet, il le refusa, pour che que oncques ne l’avoit chevauchiet. Et ensy que on en aloit querir ung aultre, vey que ches escarmuches estoient trop belles. Adonc messires Phelippes, qui eult grant desir de veoir, dist: «Amène me che coursier. Je monteray desus; chis aultres vient trop longement.» Il monta sus et le fery des esporons et le hasta moult. Che poullain, qui les esporons ne connisoit, se commencha à enorguillier et à se mentenir merveilleusement et assallir et atreper diversement. Et messires Phelippes, pour lui aprivisier, le feroit des esporons aigrement. Che coursiés enporta son seigneur de telle fachon que il n’en peult estre maistre, et l’enporta parmy ung fosset où il trebuscha li uns dessus l’autre. Oncques il ne pot estre à tamps aidiés qu’il ne fust blechiés et sy froisiés que oncques puis il n’eut sancté, mais morut dedens quinze jours: dont tous les seigneurs furent durement courouchiés, car c’estoit le plus riches et le plus grant de linaige du royaume de Franche. Fos 345 et 346.

Dans les mss. A 1 à 6, 11 à 14, 18, 19, le chapitre ne se termine pas à: «Aguillon;» et la phrase se continue ainsi: et qui dedens avoit assiegié les bons chevaliers d’Angleterre, messire Gaultier de Mauny.... Fº 152 vº.

P. [5], l. 7: fourfait.—Ms. B 6: sy ques le duc de Normendie ne fut mies adonc maistres de son argu. Fº 347.

P. [5], l. 15: deslogoient.—Ms. B 6: Et yssirent hors et ferirent en la keue; et y prirent des chevaliers et des escuiers qui s’estoient trop tart levet et des chevaulx et du harnast. Fº 347.

P. [5], l. 22: soixante.—Mss. A 20 à 32: quarante. Fº 219.

§ [290]. P. [6], l. 14: Depuis.—Ms. d’Amiens: Avint ung peu apriès que messires Gautiers de Mauny dist à sen prisonnier, qui li offroit trois mil viés escus pour se raenchon: «Grimouton, Grimouton, je say bien que, se je vous volloie presser, vous me paieriez bien de raenchon cinq mil ou six mil escus, car vous estes ungs grans chevalierz en Normendie et forment amet dou duc. Si vous diray que vous ferés: vous yrés, sur vostre foy, par deviers le duc vostre seigneur, de qui linage et consseil vous estes, et me pourcacheréz que j’aye une lettre ouverte, seellée de son seel ou dou seel le roy de Franche, son père, que je puisse cevaucier seurement parmy le royaumme de Franche à vingt chevaux tant seullement, mon escot payant raisonnablement de ville en ville, d’ostel en ostel, tant que je soie venus devant Calais deviers le roy, mon seigneur, que je desir moult à veoir, et ne vorai jesir en nulle ville que une nuit et bien paiier mon escot; et, se ce ne me poés impetrer, vous revenrés chy dedens ung mois.» Li chevaliers li creanta loyaument qu’il en feroit son pooir. Si se parti dou signeur de Mauny et vint en France deviers le duc de Normendie, et impetra de lui un sauf conduit pour le dit seigneur de Mauni, et le raporta arrière en Aguillon, où il fu recheu à grant joie. Fº 96 vº.

—Ms. de Rome: Depuis ne demora gaires de temps que li dis mesires Gautiers de Mauni, qui très grant desir avoit de venir devant Calais et de veoir son signeur le roi d’Engleterre, mist en parole le chevalier et li dist: «Cambeli, je sçai bien que vous estes moult proçains dou duch de Normendie, et je desire à aler devant Calais et veoir mon naturel signeur le roi d’Engleterre. Se vous poés tant faire et esploitier, sus une relaxion que je vous ferai, qui sera telle: je meterai en souffrance votre prise, et vous recrerai courtoisement sus vostre foi, tant que vous serés alés deviers le duc vostre signeur et enpieterés, ou nom de moi, un bon sauf conduit, que je puisse passer et cevauchier parmi le roiaulme de France, et aler devant Calais, moi vintime tant seullement, et point dormir en une ville, non plus de une nuit, se trop grande necessité ne le fait, et bien paiier partout. Et entendés li sauf conduis soit tels que je m’i puisse bonnement asegurer, et vous retourné deviers moi, ou cas que vous le m’aporterés, je vous ferai de vostre raençon si bonne compagnie que vous vodrés.»

Li chevaliers ot grant joie de ceste parole et respondi: «Chiers sire, vous devés sçavoir que ma ligance veroi je volentiers, et je m’en meterai en painne. Vous ferés un ject sus quel fourme vous vodrés avoir le sauf conduit, et nonmerés tous ceuls que vous vodrés avoir en vostre compagnie; et, sus l’escript que vous me baillerés, je ordonnerai ma requeste et priière.» Mesires Gautiers respondi: «Vous dites bien.» Il fist escrire tantos une lettre qui contenoit auques la manière dou sauf conduit, et puis le bailla au chevalier, et li dist: «Cambeli, tenés, qant vous venés par de delà, si le faites, par un clerc qui s’i congnoise, groser sus la fourme et ordenance que on a en France; et le faites faire si bien, se li dus le vous voelt acorder, que il me puist partout sus mon cemin valoir.»—«Certes, sire, respondi li chevaliers, je en ferai en toutes manières bien mon acquit.»