P. [168], l. 3: son.—Ms. B 4: sa. Fo 205 vo.
P. [168], l. 5: couvenant.—Mss. A 8, 9: couvine.
§ [443]. P. [168], l. 13: Quant messires.—Ms. d’Amiens: Si tost qu’il se furent ordounné, li Franchois, qui estoient en trois batailles, si comme vous avés oy, vinrent achevauchant sus yaux moult radement, messires Brokars et messires Jehans de Chalonz premierement, chacuns sa bannierre devant lui moult areement, et ferirent chevaux des esperons et baissièrent les lanches, et aprochent les Englès c’on dist Navarrois. Et chil archier coummencent à desclichier saiettes fort et roit et à navrer hommes et chevaux. Toutteffois ces gens d’armes aprocent, mès il furent requeilliet de monseigneur Ustasse et des siens trop fierement, car il tenoient devant yaux leurs glaives moult roidement. Et ne s’i osoit nus bouter; et qui s’i mettoit, il estoit mors ou abatus. Là fu ceste premierre bataille des Franchois bien reboutée.
Quant li comtez de Wedimont et li comtes de Joni vinrent à toutte leur routte, messires Ustasses et li sien les rechurent hardiement et les reboutèrent de premier encontre et en habatirent et sachièrent entr’iaux des plus appers, et fianchièrent prisounniers. Dont vint li evesques de Troies et se bataille mout bien montés; et coummenchièrent à tournoiier tout autour d’iaux, et li Englès ossi tournioient à leur mesure. Finablement, li Franchois s’abandonnèrent et ferirent chevaux des esperons, les glaives baissies, pour entrer ens, et yaulx rompre; et cil compaignon les rechuprent à leurs courtes glaives mout roidement.
Là eut, je vous di, estour et rencontre mout dur et moult fort et bien combatu, car li Franchois combatoient à cheval et li Englès à piet. Et estoient leur archier retret tout enssamble et mis en ung mont, et laissoient les gens d’armes couvenir, et traioient mout ouniement et mout roit ens ès Franchois, qui mout les grevoit, car il se combatoient devant et il estoient tret sus costé ou derierre: dont il en y eut pluisseurs blechiés et navrés et maint cheval ossi. Enssi se combatirent il mout longement.
Là y eut mainte belle appertise d’armes faite, mainte prise et mainte rescousse, car li Englèz n’estoient qu’un peu. Si se prendoient mout priès de bien faire, et si vassaument se combatirent, que pour ce jour il n’en doient avoir point de blamme, car j’oy recorder de chiaux qui y furent, se li bringant n’ewissent esté qui y sourvinrent au darrain fresch et nouviel, il s’en fuissent parti à leur honneur, car il donnoient les Franchois assés affaire.
Mès quant chil brigant furent venu, qui estoient plus de neuf cens à tout lanches et pavais, il rompirent lez archiers et missent en voies, et gens d’armes apriès qui en tuèrent le plus grant partie, et puis revinrent par les garchons qui gardoient les chevaux dez Englès et Navarois, et se ferirent entr’yaux et en tuèrent et navrèrent, et gaegnièrent des chevaux le plus grant partie. Fo 115 vo.
P. [170], l. 15 et p. 171, l. 31: Or.... sauvèrent.—Mss. A 27 à 29: Or avoient les Anglois fort l’advantage d’une montaigne, et se tenoyent si serrés que par nul tour les Françoys ne savoyent comment entrer en eux. Si estoyent les Françoys à cheval et les Anglois à pié. D’autre part, un petit plus en sus, estoyent leurs archers, qui faisoient leur bataille à part et tiroyent par grant effort sur les Françoys. Adonc les Françoys prindrent à tournoyer autour des Angloys, pour eulx rompre et ouvrir, et à la mesure que les François tournoyoient, les Anglois firent ainsi. Or vindrent les brigans françois, qui n’avoyent peu si tost venir que les gens d’armes à cheval; car ces brigans, qui estoyent bien neuf cens, estoyent à pié, lesquels, tantost qu’ils furent venus à lances et à pavois jusques aux archers angloys, ils les rompirent et desroyèrent, et ne tindrent comme riens et s’espardirent çà et là; car le traict des archers ne pouvoit entrer en iceux brigans, tant estoyent fort paveschés; et aussi les archers estoyent durement foulés, car ils s’estoyent longuement combattus. Quand la seconde bataille des Françoys, tous à cheval, perceut le desarroy de ces archers angloys, tantost leur courut sus, et furent la plupart occis, petit s’en sauvèrent. Puis chevauchèrent oultre ceulx de la seconde bataille et vindrent tout accourans sur les garçons qui gardoyent les chevaulx des Angloys, leurs maistres; si en occirent le plus, et le remanant se sauvèrent au mieulx qu’ils peurent; là gangnèrent les Françoys de bons chevaulx et de beaux coursiers et mainte belle parure, joyaux, or et argent à planté.
P. [171], l. 26: Joni.—Mss. A 20 à 22: Jenville.
P. [171], l. 26: et leur route tèle.—Mss. A 8, 9, 11 à 22: la.