Li sires de Manni fist sen enprise et amena ses nouviaux chevaliers hurter as bailles de Paris. Là eut bonne escarmuche et dure, car il y avoit dedens Paris des bons chevaliers et escuiers qui vollentiers fuissent issut, se li dus de Normendie ne l’ewist deffendu; toutteffois, il gardoient le porte et le barrière là où chil Englès estoient, et escarmucièrent de soleil levant jusques à miedi, et en y eult des navrés des ungs et des autres. Adonc se retraist li sires de Manni, et en ramena ses gens à leurs logeis, et se tinrent là encore che jour et le nuit enssuiwant. Et l’endemain se deloga li roys englès et veut aller plus avant par deviers le Montleheri.
Or vous diray quel pourpos aucuns seigneurs d’Engleterre et de Gascoingne eurent au deslogement dou roy. Pour ce qu’il sentoient dedens Paris tant de gentils hommes, il penssèrent assés qu’il en wuideroient pour yaux aventurer, si comme il fissent, car messires Raoulx de Rainneval, messires Raoulx de Couchi, li sires de Montsaut, li castelains de Biauvès, li Bèghes de Velainne, li sires de Wasiers, li sires de Wauvrain, messires Gauwains de Bailloel, li sires de Vendoeil, messires Flammens de Roie, li Haselés de Cambeli, messires Pière de Saremaise, messires Phelippes de Savoisi et bien soixante lanches yssirent hors d’un accord pour yaux aventurer sus les Englès.
Et tout ce penssèrent bien aucun chevalier et escuier englès et gascons, et fissent ossi une embusche à l’aventure; et se missent environ doi cens armures de fer, toutte gent d’eslite, en une maisson toute wuide à trois lieuwes de Paris. Là estoit li captaus de Beus souverains de l’enbusce, que li roys englès avoit nouvellement remandé à Clermont, et messires Aimienions de Pumiers, li sires de Courtons; et des Englès y estoient li sires de Noefvilles, li sires de Montbray et messires Richars de Pont Cardon, et des autres qui se volloient aventurer.
Si yssirent cil Franchois, si comme je vous di, bien monté et bien armet, et chevaucièrent de premiers tout le pas sans fourhaster. Quant il vinrent au Bourcq le Roine, il trouvèrent que li rois englès et toutte sen host estoient deslogiet et que riens n’estoit demouret derrière: dont chevauchièrent plus avant enssuivant les esclos des Englès, et passèrent oultre celle maison où li embusce dou captaul estoit. Assés tost apriès ce qu’il furent oultre, li embusce sailli hors, les glaives abaissies, en criant leur cri. Quant li Franchois se retournèrent pour l’effroi et le friente des chevaux qu’il oirent, il perçurent lors ennemis derierre yaux, qui moult se hastoient. Adonc s’arestèrent il tout à un fès et baissièrent les glaives, et ferirent cevaux des esperons et s’en vinrent sus ces Englès.
Là ot de première encontre forte jouste et ruet ent jus pluisseurs, d’un lès et de l’autre; et tantost s’entremelèrent et se commencièrent à combattre d’espées et d’espois et de ce qu’il avoient. Mès finablement li journée ne fu point pour les Franchois; ains fu porté à terre li sires de Cantremi. Là eut fort estor desoubs se bannierre, qui estoit d’argent à une bende de gheulles à six merlètes noires, trois desoubs et trois deseure; et fu là pris par forche, et chils qui portoit se bannière, ochilx.
Quant li pluisseur et ensi que tout virent le mesaventure et que trop durement il estoient rencontré, il se missent au retour, et Englès et Gascons apriès; et furent cachiés bien priès de Paris. Là furent pris li sires de Montsaut, ungs banerès de Picardie, et li Hazelé de Cambeli et messires Pières de Saremaise et messires Rogiers de Couloingne, qui y fu moult bon chevalier, et bien neuf des autres; et li remains se sauvèrent et rentrèrent em Paris.
Si retournèrent li Gascon et li Englès apriès le routte de leur ost. Si enmenèrent leurs prisounniers et trouvèrent le roy logiet au Montleheri; car adonc le poursieuwoient doy prélat et grant traiteur de pès, li evesques de Tierewainne, qui s’apelloit messires Gilles de Montagut, qui estoit pour le temps canchillier de Franche, et li abbes de Clugny. Fo 122.
P. [231], l. 3: li message.—Mss. B 3, A 1 à 6, 8 à 14, 18 à 22: les messagiers. Fo 233 vo.—Ms. A 7: les messages. Fo 223 vo.—Mss. A 15 à 17: les messaiges. Fo 236 vo.
P. [231], l. 9: bailles.—Ms. B 3, A 8, 9, 11 à 17: barrières.
P. [231], l. 9: de.—Mss. A 30 à 33: devant. Fo 242.