Bien en venoit la congnissanche au prinche, que les vois dou pays d’Acquittainne estoient telles; mès il n’en faisoit nul compte, et disoit que c’estoit follie et ygnoranche de ceux qui y penssoient, car il n’avoient autre resort que en se court ou celle dou roy d’Engleterre, son père, mès ceste ne volloit il mies excepter, dont pluisseurs gens furent pugny et corrigiet en la duché d’Acquitaine, qui parloient dou ressort. Avoecq tout che, li prinches se contentoit trop mal des comtes, des viscomtes, des barons et des chevaliers de sa terre, qui hantoient le court de Franche. Et li aucun seigneur d’Acquittainne le faisoient pour tant, si comme j’en fui enfourmés adonc, que li estas et li affaire dou prinche leur estoit trop mués d’umelités en orgueil; car, quant li baron et li chevalier de Poito, de Saintonge, de Limozin, de Quersin, de Pierregorth, de Roherge et de Bigorre venoient en l’ostel dou prinche, on n’en faisoit nul compte, et foiblement y estoient il recheu et appellé. Et quant il venoient en le court dou roy de Franche, il estoient liement et bellement requeilliet dou roy et de ses gens, et c’est tout chou que gens d’armes demandent, et especialment chil des marches de Gascoingne; car il ne puevent ammer ung seigneur, se il n’est drois compains et amis entre yaux et se il ne les requeille, chacun seloncq son estat, liement. Toutteffois, si comme je vous ai ja dit, li prinches se contentoit trop mal sus ciaux qui le court dou roi de Franche poursuiwoient, et par especial sour le seigneur de Labreth et le comte d’Ermignach, son oncle; car chil doy seigneur estoient le plus dou temps toudis sejournans à Paris ou dallés le roy, où qu’il fuist. Et de ce que li sires de Labreth estoit nouvellement alloiiés et mariés en Franche à madammoiselle Ysabiel de Bourbon, sereur au dit duc de Bourbon et à le roynne de Franche, desplaisoit bien au prince, et disoit que, sans son consseil et son congiet, il s’estoit là mariés, ce que faire ne pooit. Enssi se coummenchièrent petit à petit les haynnes à descouvrir entre le prinche et le seigneur de Labreth, et pour plus plainement recorder ent le verité, si comme je fui enfourmés, pourquoy le seigneur de Labreth enhay premierement le prinche et son consseil, je le vous diray.
Vous avés bien oy recorder chy dessus en l’istoire que, quant li prinches fu de premiers meus d’aller en Espaingne, et qu’il regardoit quelx gens et quelx carge il enmenroit avoecq lui pour plus honnerablement parfurnir son voiaige, entre les autres priières et requestes qu’il fist à ses barons et à ses chevaliers, il demanda une fois au signeur de Labreth, par grant avis, à quelle somme de gens il le poroit servir en ce voiaige. Li sires de Labreth li respondi adonc liement que il le serviroit à bien mil lanches. Chilx services pleut grandement au prinche, et dist au signeur de Labrech: «Je les retiens thous.» Or avint de celle retenue chou que je vous diray. Ung grant temps apriès, quant li prinches eut envoiiet monsigneur Jehan Camdos deviers les Compaingnes et qu’il en fu revenus, et qu’il eut dit au prinche quel quantité de gens d’armes et de combatans des Compaingnes il aroit, li prinches et ses conssaux regardèrent à ses besoingnes que il ne pooit mies si desnuer son pays de gens d’armes que fuisson n’en y demourast pour garder le pays, se il besongnoit, et que mieux valloit que il menast touttez les Compaingnes qu’il en laiast nul derrière; et ou cas qu’il aroit touttez les Compaingnes et grant plantet d’Englès et de barons, il n’aroit que faire de tant de Gascons. Si contremanda au signeur de Labreth le plus grant partie de ses gens, en disant ensi: «Sire de Labreth, je vous remerchy grandement de vostre bel serviche, et tant qu’à ceste fois, nous nos deporterons bien d’une partie de vos gens. Nous avons regardé et consideré nostres besoingnes: si n’en vollons en che voiaige que deux cens lanches; mès prendés et eslisiés lesquelx que vous vollés, et les autres laissiés leur faire ailleurs leur prouffit.»
Quant li sires de Labreth oy ces nouvelles, si fu tous penssieus et courouchiés, et retint les messaiges dou prinche, tant qu’il se fu conssilliés; et quant il respondi, il rescripsi enssi: «Monsigneur, je sui tous esmervilliés de ce qu’à present m’avés escript et segnefiiet que je donne huit cens lanches congiet, lesquelles, à vostre requeste et coummandement, j’ai ja de grant tamps retenu, et leur ai fait brisier pluisseurs biaus voiaiges qu’il ewissent pris et eu, se il n’esperaissent à aller en vostre service en Espaingne: pour quoy, monsigneur, je ne les saroie eslire, ne poroie desevrer les uns des autres, car il me sont tout un. Si vous plaise assavoir que ja vous n’arés les ungs sans les autres, car, se vous m’avés, vous les arés tous; autrement, je ne me saroie ne poroie honnerablement escuzer enviers yaux.» Telle fu la substance de la responsce que li sires de Labreth fist adonc au prinche: de coy li prinches fu tous merancolieux et un tamps enfellonné sus le dit signeur de Labreth, et en dubt y estre priès mal pris au signeur de Labreth, le terme pendant que on sejournoit à Bourdiaux sus l’emprise de ce voiaige d’Espaigne; mès li comtes d’Ermignach amoiena les besoingnes, et rafrenna le prinche et apaisa son nepveult le signeur de Labreth, et fu ou voiaige d’Espaigne, mès che fu tous des darreniers, et n’y eut que deux cens armures de fier. Depuis le revenue d’Espaigne, il n’aloit ne venoit point en le cour dou dit prinche, de quoy li Englès disoient qu’il le faisoit par presumtion et qu’il estoit trop grandement orguilleus. Enssi demorèrent les haynnes ens ès coers de ces deux seigneurs, qui puisedi s’espanirent, si comme vous orés recorder assés prochainnement en l’istoire.
Entre les estas des seigneurs terriiens estoit cilz dou prinche grans et estoffés, et ossi de madamme la princhesse sa femme et mout liex et moult joyeux estoit leurs hostels et mout renoummés partout. Or avoit adonc li prinches de Galles un canchillier dallés lui et tout mestre de son consseil, sage homme durement et de grant advis, que on appelloit l’evesque de Bade en Engleterre. Li prinches et li estoient souvent en secret et en requoy, et parloient des besoingnes de le princhipauté et coumment en hounneur on les poroit parmaintenir. Si regarda chils evesques de Bade que li voiaiges d’Espaingne avoit durement afoibli le mise et le tresor dou prinche; si conseilla enssi au dit prinche que ce seroit bon que uns fouages fust eslevés en la ducé d’Acquittainne, à durer une qantité d’ans, et prendre sour chacun feu par an un demy florin, tant que ses hostelz seroit rencraissiés en or et en argent, et qu’il aroit paiiet les debtes qu’il avoit faitez pour cause dou voiaige d’Espaigne. Chilx conssaux pleut moult bien au prinche et veut qu’il fuist remoustret à tout son pays, afin qu’il em pewist avoir responsce. Si trestos que messires Jehans Camdos entendi et senti que on volloit parlementer sour cel estat, il prist congiet au prinche pour aller en Constentin jeuer et esbattre à Saint Sauveur, dont il estoit sirez, afin que de ce fouage et de ce parlement il ne fust noient demandés ne encouppés. Li prinche ce congiet li acorda assés lentement. Toutteffois il l’eut et se parti de Bourdiaux et de Poito et s’en vint à Saint Sauveur le Viscomte en Normendie, et là se tint ung grant temps et tous ses hostelz. Entroes fu pourcachiés et parlementés chils fouaiges à durer grans ans en Acquittainne. Fos 449 vo à 151.
Ms. B 6: Or parlerons du prinche de Galles. Sy comme vous avés chi dessus oy recorder, quant il fu retournés d’Espaigne, il fut moult endebtés; car ou dit voiage il avoit esté à grans frais, et mal l’en avoit acquitet le roy dan Piètre: pour lesquelles choses il estoit moult merancolieulx, car son estat ne volloit il point amenrir, mais toudis acroistre; et se paiast vollentiers toutes manières de gens, d’armes et de Compaignes, mais qu’il euist largement de quoy, siques sus cel estat il fist et assambla pluiseurs fois ses gens, et parlementoit en pluiseurs lieus en Acquitaine pour savoir comment il s’en pouroit chevir et desduire.
En che tamps, avoit le prinche canchelier et mestre [ung] consillier englès qui estoit prelas et evesque de Bade. Chils luy consilla de eslever une taille en son pais d’Acquitaine à paier par an chascun feu demy florin et le riche porter le povre. Quant ceste ayde vint à la congnoissanche des prelas et des barons de Gascongne, sy leur tourna à grant contraire, et en respondirent ly pluiseurs que ja en leur terre ne courroit. Sy se detria ceste cose ung grant tamps, et se dissimulèrent aulcun signeur de Gascongne qui estoient ja entré en le indignation du prinche pour che qu’il ne voloient point laissier courir celle taille en leurs terres. Et s’en vinrent ly pluiseurs en Franche, tels que le conte d’Erminac, le sire de Labreth, ses nepveus, le conte de Pieregorth, le conte de Comminges, le visconte de Quarmaing, messire Bertran de Tharide, le sire de Labarde et pluiseurs aultres, et eurent secrès traitiés et parlemens au roy de Franche et au duc d’Ango, et se volloient du tout tourner franchois et relenquir le prinche.
Le roy, qui estoit plains de grant sens naturel, s’en dissimuloit. Ossy d’autre part il leur faisoit grant chière, mais pas à ce commenchement ne les volloit requellier, ne yauls oster de l’homage du prinche; car il sentoit encorres les Compaignes qui tout estoient Englès et Gascons, espars en son royalme, qui ly pouroient porter trop grant damaige. Et son frère le duc de Berry et son cousin le conte d’Alenchon et le daulfin d’Auvergne et pluiseurs haulx barons de Franche [estoient] encores hostaigiers en Engleterre. Sy les volloit tous ravoir, et ja estoit revenus le duc de Bourbon et estoit quite de sa foy, et ossy Guis de Blois par l’acort du roy d’Engleterre; et ossy estoit le conte Guis de Saint Pol; mais chils n’avoit point congiet, mais le pape Urbain V l’avoit dispensé de sa foy, pour tant que le dit conte monstroit pluiseurs articles qu’il trouvoit en verité pour luy en confondant les Englès. Sy demorèrent et vaquèrent ches choses ung grant tamps. Et fu le mariage fait à Paris de madame Ysabiel de Bourbon, seur au duc de Bourbon, et du signeur de Labreth, et tout che traita le conte d’Ermignac son oncle; de quoy le prinche de Galles s’en tint mal content sur le sire de Labreth de che qu’il estoit sans son sceu alyés en Franche, et ossy sur le conte d’Erminac et sus chiaulx [qui] hantoient et frequentoient le court de Franche, et en faisoit leur terres et leurs pays et leurs gens tenir en plus grant subjection. Ensy se commença le guerre entre le prinche et ches seigneurs dessus nommés, mais toudis parseveroit le dit prinche et volloit avoir che servaige.
Quant messire Jehan Candos, qui fu très loyaulx chevaliers, vey la manière de cheste ordenanche, afin qu’il ne fust demandés, [il] prist congiet au prinche de aller viseter ses terres de Saint Sauveur le Visconte en Constentin, et y ala et là se tint plus d’un an. Et toudis procedoit le prinche par l’ennort de son consail en che servaige, et bien ly acordoient les pais que je vous nommeray: prumiers Poito, Saintonge, le Rocelle, Agenois, Roergue, Quersin, Limosin et tout Bourdelois; et volloient que le prinche l’euist cinq ans tant seulement, et par ensy il devoit tenir ses monnoies fermes et estables sept ans. Et commenchoient ja ches gens payer cascun feu demy florin, et se portoit le fort le foible. Ausy le prinche le volloit avoir eslevée sur les eglises, mais chil respondoient qu’il estoient frans et exent de toutes sousides et que, se de forche les constraindoit, il en appelleroient en le court de Romme, siques le prinche, qui ne les volloit mies tenir en pais que il ne paiaissent otant que les aultres, en estoit en grant mautalent sur yaulx, et eult consail de envoier à court de Rome devers le pape, ensy qu’il fist; et envoia monsigneur Guichart d’Angle, monsigneur Guillame de Seris et maistre Jehan Briffault, de le Rocelle, pour empetrer ches servaiges et aultres choses qu’il avoient à besoigner. Et firent chil dessus dit che voiage et vinrent à Romme, et se remonstrèrent au pape et firent leur suplication et en parlèrent au pape; mais il le trouvèrent moult dur et rebelle à leur opinions.
En che voiaige dessus dit faisant, les coses s’aprochèrent, syques le duc de Berry et le conte d’Alençon furent recreut ung an de revenir en Franche, et au chief de l’an retourneroient en Engleterre; mais oncques depuis ny ralèrent, car la guerre se renouvella entre Franchois et Englès, sy comme vous orés recorder. Fos 719 à 723.
P. [66], l. 21: Entrues.—Ms. A 8: Pendant que. Fo 291 vo.