.... En ce tamps, estoit revenus d’Engleterre en Franche li comtes Guis de Saint Pol et de Lini, qui tant haieoit lez Englès qu’il n’en pooit nul bien dire, et vist vollentiers, pour soy contrevenger de aucuns contraires et anois qu’il li avoient fais, que li gerre fust renouvellée entre le roy de Franche et le roy Englès, et le conssilloit et enortoit le roy tempre et tart ce qu’il pooit. Et disoit que li royaummes d’Engleterre n’estoit que ungs petis pays ens ou regart dou royaumme de France; car il l’avoit pluisseurs fois chevauciet de chief an qor, et adviset et consideret très bien et ossi toutte leur puissanche, et que, de quatre ou cinq provinsses que il y a ou royaumme de Franche, la meneur est plus rendable et plus grosse de chités, de villes, de castiaux, de chevaliers et d’escuiers que li cors d’Engleterre ne soit, et que mout s’esmervilloit et estoit esmervilliés coumment il pooient avoir eu, de tamps passet, le forche et le concquès qu’il avoient: siques ces parollez et pluisseurs autres dont li rois estoit tutés et consilliés, tant dou dit comte de Saint Pol que de pluisseurs qui point n’amoient les Englès, resvilloient le dit roy de Franche; souvent, une heure y entendoit vollentiers, et une autre heure s’empassoit assés briefment. Fo 152.
P. [85], l. 13: nuit et jour.—Ms. A 8: tous les jours.
P. [86], l. 1: revenus.—Ms. B 6: Et ja estoit revenus (d’Engleterre) le duc de Bourbon et estoit quite de sa foy, et ossy Guis de Blois, par l’acort du roy d’Engleterre. Et ossy estoit le conte Guis de Saint Pol, mais chilz n’avoit point congiet. Mais le pape Urbain Ve l’avoit dispensé de sa foy, pour tant que le dit conte moustroit pluiseurs articles qu’il trouvoit en verité pour luy, en confondant les Englès. Fo 721.
P. [86], l. 3: soutilleté.—Ms. A 8: soubtiveté.
P. [86], l. 4: demener.—Ms. A 8: devisier.
P. [86], l. 9: de.—Le ms. A 8 ajoute: grant.
P. [86], l. 26: condescendre.—Ms. A 8: contendre.
P. [87], l. 3 et 4: vivement.—Ms. A 8: plainement.
§ [602]. Edouwars.—Ms. d’Amiens: Se li (au roi de France) disoient li aucun signeur de Franche et li plus especial de son consseil, et li moustroient et declaroient par pluisseurs poins de le chartre de le pais, que li rois d’Engleterre ne li prinches de Galles n’avoient en riens tenu cest article de le pais qui faisoit mention qu’il devoient faire wuidier touttes mannierres de gens d’armes et de Compaignes dou royaumme de Franche, quant il jurèrent, devant la chité de Cartres et depuis à Calais, le pès, mès les y tenoient et envoieoient encorres tous les jours, et guerioient couvertement le royaumme; et avoient pieur guerre assés que donc que il l’euissent toutte ouverte as Englès, car il ne savoient de qui il estoient gueriiet, et si estoient pris, pilliet et robet de tous costés. Dont, sus cel estat, li roys de Franche en avoit envoiiet en Engleterre par pluisseurs fois son consseil, le comte de Tancarville une heure, et puis l’autre, monsigneur Bouchigau, son marescal, et aucuns grans clers en droit avoecq yaux, pour remoustrer au roy englès et à son consseil coumment li cartre de le pais parloit, et que il gardast le sierement qu’il avoit juret. Li roys Edouwars respondoit à chou et disoit que, se li royaummez de France estoit gueriiés, ce ne pooit il amender, mès mout l’empesoit, et que si marescal et chil qui de par lui y avoient estet estaubli, estoient allet, tantost apriès le pais faitte, de ville en ville et de fort en fort, et coummandé à chiaux qui les tenoient, qu’il wuidaissent et partesissent, et que en avant il n’avoient nulle cause de gueriier, car il estoit bonne pais entre lui et le roy de Franche. Dont, se sus ce coummandement il y estoient demouret ou parti et depuis revenu, il ne pooit mies les ennemis dou royaumme de Franche bouter hors ne yaux guerrier, car il estoit assés ensonniiés de garder sa terre et ses frontières et de tenir en pès. Telles ou pareilles estoient les responses que li roys englès faisoit et proposoit au roy de Franche et à son conseil, quant il venoit en Engleterre, lesquelles responsces ne souffissoient mies bien au roy de Franche et à son consseil. Et emparloient souvent, en yaux complaindant des griefs que ces malles gens nommés Compaignes leur faisoient, au roy, li dit signeur, duc, comte, baron et chevalier, pour le cause de leur peuple qui estoit contournez en grant tribulation et misère. Et en avoit li dis roys grant pité et compation, et vollentiers l’ewist plus tost amendé qu’il ne fist, et mis remède; mès il sentoit encorres hostagiiers en Engleterre, pour le redemption dou roy son père, pluisseurs grans signeurs de son royaumme et de son sancq, son frère le ducq de Berri, le duc de Bourbon, le comte d’Alençon, le comte de Halcourt, le comte de Porsiien et pluisseurs autres grans barons. Si lez voloit tout ravoir ou em partie, ainschois qu’il resmeuist le guerre... Fo 152.
§ [603]. Entre les aultres.—Ms. d’Amiens: Liquelx roys eult mainte ymagination et maint pourpos, ainschois que il se volsist mettre ne bouter en le querelle des Gascons, qui mout le pressoient que li prinches fust mandés sus lez griefs qu’il volloit faire en leurs terres, et en eut li roys pluisseurs consultations avoecq deus ou trois des plus especials qu’il ewist. Et fist lire par pluisseurs foix à grant loisir les cartres de le pais, et les examina et avisa bien mot à mot, et clause à clause; et y trouva voirement, si comme je fui adonc enfourmés, que il n’avoit mies quittet le resort des terres qui estoient delivrées et rendues au roy d’Engleterre, et pluisseur grant article, dont ses conssaulx proposoit et enfourmoit le roy, que li Englès avoient mal tenu: lesques articles je ne voeil mies encorres declarer, mès em parleray, quant temps et lieux venra, et ossi des deffensces que li roys d’Engleterre mettoit à l’encontre... Fo 151.