V
15 avril 1404.
Sauvegarde de la reine Isabeau en faveur des Célestins de Notre-Dame à Paris.—(Copie, Arch. Nat. K 180, pièce 16.)
Ysabel, par la grace de Dieu royne de France, à tous ceulx qui ces présentes lettres verront, salut. Comme depuis aucun temps en ça, nous ayons fait faire certains huis et entrées fermans à serrures et à clefs ou autrement, tant es murs qui sont entre le jardin du Champ au Plastre, en la rue du Petit Musce, et le clos des vignes de noz bien amez les religieux Celestins fondez de Notre-Dame à Paris, comme en aucuns autres lieux et places estans environ les monastere, vignes et jardins desdiz religieux à eulx appartenans, afin que, toutes et quantes fois qu'il nous plaira, nous et nos enfans puissions entrer es monastere et eglise desdiz religieux et aussi en leurs vignes et jardins et autres lieux, tant pour notre devotion comme pour l'esbatement et plaisance de nous et de nosdiz enfans, depuis lesquiex huis et entrées ainsy faiz, nous et nosdiz enfans et plusieurs de noz gens et serviteurs ayons plusieurs fois passé et repassé et souvent alons par les diz huis et entrées es monasteres, jardins, vignes et autres lieux desdiz religieux, et sanz les appeller ou leur sceu, y povons entrer et yssir touttefoiz qu'il nous plaist, savoir faisons que nous, qui à icelle eglise avons grant devotion et affection especiale, et ne vouldrions par nous ne autrement les droiz d'icelle et des diz religieux estre aucunement diminuez ou empeschez, mais iceulz à nostre povoir soustenir et garder, voulons, consentons, accordons et octroyons à iceulx religieux que lesdiz huis et entrées, que nous avons fait faire et fermer à serrures et à clefs ou autrement es murs desdiz religieux, pour entrer en leurs lieux dessusdiz ou autres et aussi les alées et venues par iceulx de nous, nosdiz enfans et officiers ou d'autres personnes par l'occasion de nous ou de eulx, ne tourne à aucun préjudice ausdiz religieux ne à leurs successeurs, ores, ne ou temps avenir, par quelque voye ou maniere que ce soit, en temoin de ce, nous avons fait mettre notre scel à ces présentes. Donné à Paris, le quinzième jour d'avril, l'an de grace mil quatre cens et. quatre.
Signé sur le reply. Par la royne,
J. Ciclaut (Salaut)
Scellé de cire rouge.
Suit un acte de même teneur de Loys, fils de roy de France duc d'Orliens, comte de Valois et de Blois et de Beaumont, et seigneur de Coucy...... Donné à Paris, le 12 janvier 1405.