Or pour dire cecy il faut force mistere,
Et de mal discourir il vaut bien mieux se taire.
Il est vray que ceux là qui n’ont pas tant d’esprit
Peuuent mettre en papier leur dire par escrit,
Et rendre par leurs vers, leur Muse maquerelle ;
Mais pour dire le vray ie n’en ay la ceruelle.
Il faut estre trop pront, escrire à tous propos,
Perdre pour vn sonnet & sommeil, & repos.
Puis ma muse est trop chaste, & i’ay trop de courage,
Et ne puis pour autruy façonner vn ouurage.