Et se plaint de son mal, d’autant plus vehement,
Que vos yeux sans dessein le font innocemment.
En amour l’innocence est vn sçauant mystere,
Pourueu que ce ne soit vne innocence austere,
Mais qui sçache par art donnant vie & trespas,
Feindre auecques douceur qu’elle ne le sçait pas :
Il faut aider ainsi la beauté naturelle,
L’innocence autrement est vertu criminelle,
Auec elle il nous faut & blesser & garir,
Et parmy les plaisirs faire viure & mourir.