Où sur Eurimedon tu creus estre vainqueur,
Mais ce fut moy qui fus l'objet de ta rigueur,
Avecque tes mespris je ressentis ta rage,
Tu surmontas ma force, & non pas mon courage;
Et quoy que mon dessein ne fut que de perir,
Ton fer me blessa bien, mais je ne pûs mourir.
Tu rougis infidele, & tu croyois peut-estre
Que l'on devoit icy recompenser un traistre:
Non, non, le Ciel est juste, & les Dieux irritez,
Punissent tost ou tard les infidelitez,