Je n'ay jamais douté de son obeïssance
Et sa seule vertu m'en donne l'asseurance.
Vous, ma soeur, acceptez son amour & ses voeux
Et pour toute raison sçachez que je le veux,
Il n'a receu du Ciel ny sceptre ny couronne
Et sa grandeur consiste en sa seule personne:
Mais c'est là qu'il a faict ses plus nobles efforts,
C'est là qu'il a versé ses plus riches thresors:
Son coeur est l'Element où la valeur reside,
Sa belle ame est le trône où la vertu preside
Et les perfections qui le font estimer
Sont les solides biens que vous devez aimer.
L'INFANTE.
Un tel commandement, Monsieur, ne m'est pas rude,
Je prends facilement cette douce habitude,
Ce que vous estimez je ne le puis haïr
Vous devez commander & je dois obeir.
LE ROY.
Que Chymene à mes voeux n'est-elle aussi facile,
Je ne bruslerois pas d'une flame inutile
Je serois satisfaict, & mes desirs contens
Ne m'obligeroient pas de languir si long-temps:
Mais c'est trop endurer une si dure peine,
Il faut resolument que j'espouse Chymene,
Je l'absous de l'amour qu'au Cid elle a promis,
Aux Princes comme moy ce qui plaist est permis.
L'affection des Rois n'est jamais temeraire,
Et le respect sied bien seulement au vulguaire;
Envoyez-la querir, & lui faictes sçavoir
Qu'en vostre appartement je desire la voir,
Pour lui communiquer un dessein d'importance,
Et qui pour son effect exige sa presence
Je me lasse à la fin de vivre en cet ennuy,
Je veux que cet hymen s'accomplisse aujourd'huy.
SCENE SIXIESME.
CHIMENE seule.
Amour sors en fin de mon ame,
Porte ailleurs ton triste flambeau,
Puisque les cendres du tombeau
Doivent tantost couvrir & mon corps & ma flame,
Mes regrets vont m'oster du jour,
Cherche un plus aimable sejour
Abandonne mon coeur, ma Rivale t'appelle,
Va regner desormais dans ce superbe sein,
Puisque pour l'adorer, Rodrigue est infidele,
Je vay par mon trespas approuver ton dessein,
Ne m'entretien plus de sa gloire,
Ny du souvenir de ses faicts
Que tant de merveilleux effects
Sortent avecque toy de ma triste memoire.
Ne laisse rien dans mes esprits
Que la vengeance & le mespris
Qui le doivent punir d'une amour criminelle,
Rens à mes tristes yeux leur premiere rigueur:
Il est victorieux: mais il est infidele
Et par cette raison il n'est plus mon vainqueur
Mais que me servira ma hayne
Que fera mon coeur irrité?
Malgré son infidelité
Il est tousjours Rodrigue, & moy tousjours Chimene:
Non je ne vis plus sous sa loy,
L'ingrat a violé sa foy,
Aymant une perfide, il est traistre comme elle
Chymene reprens donc ta premiere rigueur,
Il est victorieux, mais il est infidele,
Et par cette raison il n'est pas ton vainqueur.