ARISTIDE.
Pour complaire à Cesar, il le faut esprouver,
C'est l'ordre de Rutile.
PAMPHILIE.
He bien va le trouver
Et dis que pour dompter ce superbe courage,
Ma hayne & mon amour mettront tout en usage.
Va laisse moy resver à ce fascheux soucy.
ARISTIDE.
Adieu, dans un moment vous le verrez icy.
SCENE II.
PAMPHILIE.
Aveugles Tyrans de mon ame,
Qui regnez sur moy tour à tour,
Hayne, mespris, vengeance, Amour,
Où se termineront mes fureurs, ou ma flame?
Hayne, dois-je suivre tes loix?
Amour dois-je escouter ta voix?
Dois-je courir à la vengeance?
Ou par un plus noble mespris,
Chercheray-je mon allegeance
Dans l'oubly des ardeurs dont mon coeur est epris?
Ha! dieux que je suis incertaine,
De mon choix, & de mes desirs,
Que de larmes, & de souspirs,
S'opposeroient encore à la fin de ma peine!
Non mes yeux ne le voyons pas,
Laissons le trainer au trespas,
Rendons nostre hayne assouvie;
Ou puis qu'il vous nommoit à tort,
Jadis les Astres de sa vie,
Soyez doresnavant les flambeaux de sa mort.