PAMPHILIE.
Pourquoy donc, ô Barbare!
Ne me permets-tu point d'accompagner ses pas?
Croy-tu que tes grandeurs ayent pour moy des appas.
Non, non, ce faux bonheur flatte peu mon envie,
Il va finir ses jours, finis aussi ma vie,
Aussi bien verras-tu, quoy qu'il faille endurer,
Que ce qu'amour a joint ne se peut separer.
DIOCLETIAN.
Tu ferois beaucoup mieux d'implorer ma clemence.
PAMPHILIE.
Ta fureur a pour moy trop peu de violence:
Quelle raison, Tyran, en retarde l'effet?
DIOCLETIAN.
C'est donc là ton desir? il sera satisfait,
Mais apres ce refus n'espere plus de grace,
Un mesme sort suivra vostre commune audace,
Et puis qu'un mesme crime a bien pû vous unir,
Un mesme chastiment vous peut aussi punir.
PAMPHILIE.
Comme mesmes tourmens, nous aurons mesme gloire.