DIOCLETIAN.
Qu'il advance.
SCENE II.
Genest. Pamphilie. Luciane. Anthenor. Aristide. Diocletian.
Aquillin. Rutile. Un Garde.
GENEST.
Invincible Empereur,
Puis que ta Majesté nous accorde l'honneur,
De donner quelquefois aux esbas du Theatre
Cette presence Auguste & que Rome idolatre,
Souffre aujourd'huy, Seigneur, que j'expose à tes yeux,
Quelques foibles crayons de tes faits glorieux,
Et que par le recit de tes hautes merveilles
Du peuple & de ta Cour nous charmions les oreilles.
Je ne puis, ô Cesar, t'offrir rien de plus beau,
Qu'en faisant de toy-mesme un Illustre tableau,
Sans que j'aye recours aux communes Histoires,
Permets moy de parler de tes belles Victoires,
Et d'apprendre aux Romains par tes rares exploits,
Combien ils sont heureux de vivre soubs tes loix:
Permets moy d'estaler tes qualitez diverses,
Tant de fameux lauriers emportez sur les Perses,
Les Barbares deffaits, Carinus surmonté,
Et tout le monde en fin, ou soubsmis, ou dompté,
Dans un si noble employ me rendant admirable,
Je te rendray, Seigneur, à chacun adorable,
Mesme à tes envieux tu paroistras parfait.
DIOCLETIAN.
Non, Amy, de ton art, je veux un autre effet,
La Renommée icy parle assez de ma gloire,
Et Rome de mes faits ne perd point la memoire,
Rutile vous dira quelle est ma volonté.
Donnez ordre, Aquillin, que tout soit appresté,
Qu'il ne leur manque rien.
SCENE III.
Rutile. Genest. Pamphilie. Luciane. Anthenor. Aristide.