AVEC PRIVILEGE DU ROY.
À TRES
GENEREUSE,
TRES-NOBLE
ET TRES
VERTUEUSE DAME
MADAME DE TALMANT,
&c.
MADAME,
Je ne pretends pas vous faire un present quand je prends la liberté de vous offrir mon ALEXIS, & que je vous conjure de le recevoir & de l'agreer; Je vous demande une grace pour un Vagabond, mais qui cessera de l'estre, s'il est aujourd'huy assez heureux pour esprouver en vostre maison les effets de cette bonté qui vous est si naturelle, & que vous pratiquez si genereusement envers ceux-là mesmes qui ne l'ozeroient esperer: ou s'il se laisse encore une fois emporter au desir de s'esloigner; ce ne sera plus que pour apprendre à tout l'Univers tant de rares qualitez que vous possedez si advantageusement à la confusion de toutes celles de vostre sexe, & pour faire connoistre à tout le monde qu'il marche desormais à la faveur de la plus aimable & plus vertueuse personne qui fut jamais. C'est pour obtenir un si glorieux adveu qu'il se vient donner à vous avec toute la passion & le respect dont il peut estre capable; sa chere Olympie l'accompagne en cet hommage; vous la recevrez favorablement je m'asseure, puis qu'avec beaucoup de verité l'on peut dire que c'est la Vertu qui se veut mettre en la protection de la Vertu, car comme cette noble partie la rendit autresfois le prodige de son siecle, tant de genereuses inclinations qui vous sont communes avec cette illustre Romaine vous rendent aujourd'huy la merveille du nostre, & cette bien-heureuse immortalité qu'elle possede ne sera pas moins quelque jour le prix de vostre merite, qu'elle est à present sa recompence. Ce sont les souhaits de tous ceux qui ont l'honneur de vous connoistre, & ce sont les voeux les plus ardents & les plus passionnez de celuy qui borne son ambition en la qualité glorieuse,
MADAME,
De
Vostre tres-humble, tres-obeïssant & tres-affectionné serviteur,
DESFONTAINES.
Extraict du Privilege du Roy.
Par grace & Privilege du Roy donné à Paris le septiesme de May 1644. il est permis à Pierre Lamy Marchand Libraire à Paris, d'imprimer ou faire imprimer, vendre & distribuer pendant le temps & espace de dix ans un livre intitulé Sainct Alexis Tragedie saincte, composée par le sieur DESFONTAINES, Avec deffences à tous Libraires & Imprimeurs, & autres personnes de quelque qualité & condition qu'ils soient, d'imprimer ny faire imprimer ledit livre, de n'en vendre ny distribuer autres exemplaires que ceux qui seront imprimez par ledit Lamy, ou de son consentement, à peine de confiscation, & de cinq cens livres d'amende comme il est declaré plus amplement en l'original des lettres passées le jour & an que dessus, scellées du grand sceau, & signées. Par le Roy en son Conseil. MATHAREL.