AGLES.
Faisons luy sçavoir.
OLYMPIE.
Providence eternelle
Qui fais, & qui regis le destin des humains,
Favorise un espoir que je mets en tes mains.
SCENE IV.
ALEXIS mourant, EUPHEMIEN, ARASPE.
Choeur des Anges.
Belle Ame qui sceus triompher
De toy-mesme, d'amour, du monde & de l'enfer,
Viens où nostre voix te convie,
Nous te tendons les bras pour te mener au port:
Ah qu'heureuse est la mort
Qui donne dans le Ciel une immortelle vie.
EUPHEMIEN en entrant.
Qu'ay-je veu? qu'ay-je ouy? quel éclat radieux
M'a frappé tout ensemble, & l'oreille & les yeux?
Quelle divine voix a charmé mon ouye?
Quels Astres juste Ciel ont ma veue esblouye?
Est-ce une illusion? est-ce une verité?
Quelle douce harmonie! ô Dieu, quelle clarté
Ah je vous reconnois beaux Anges de lumiere,
Ne disparoissez pas, escoutez ma priere,
Et ne desdaignez pas de m'esclaircir icy
D'un tresor qui me cause un estrange soucy,
Rendez esprits divins mon ame satisfaicte
Accordez cette grace à ma juste requeste.