Nicanor.
Ha! je suis sourd aux plaintes d'un Amant.
Prens party si tu veux.
Orosmane.
En puis-je prendre un autre,
Que de sauver sa vie, & de perdre la nostre?
Elise.
Garde-t'en bien, Alcandre, & que par mon danger,
Ton coeur plustost s'irrite, & songe à me venger.
Orosmane.
Helas! il est trop tard, ma divine Princesse.
En vain, mon triste coeur me conseilloit sans cesse,
De ne la point quitter; mon respect m'a trahy,
Et je suis malheureux pour avoir obey;
Mais pouvant la sauver par un trépas funeste,
Hastons-nous de joüir du seul bien qui nous reste.
Prens ce fer, cruel Prince! & Maistre de mon sort,
Sauve ma chere Elise, & me donne la mort.
Sebaste à l'oreille d'Orosmane.
Seigneur?...