Quant celle excommuniée tourbe de Brebançons vit les moynes venir contre
eux ainsi appareilliés, si leur coururent sus et les despouillèrent tous
des sains vestemens, en la manière de bestes sauvages et de loups enragiés
qui cuerrent à quelque viande qu'il trouvent quant la fain les destrainct;
ainsi coururent celle gent excommeniée aux barons et aux bourgeois et en
occirent bien largement jusques à cinq cens ou plus. La renommée de ceste
félonnie qui oncques mais n'avoit esté oïe jusques adont s'espandi par
diverses contrées et vint jusques en France au roy Loys. Et tantost comme
il oït, si fu tout esmeu de pitié et de compassion, pour la honte de Dieu
et de saincte églyse, de prendre vengence de ceste orgueilleuse cruauté. Et