ceus de Suabe, jà soit ce que pluseurs des barons de ces contrées fussent
mal de luy. Et combien qu'il fist semblant d'ostoyer ailleurs, si
tachoit-il à mettre le siège devant la cité de Rains, par le conseil et par
l'ayde de Henry, le roy d'Angleterre, la fille duquel il avoit espousée. Et
avoit l'empereur proposé à tenir si longuement le siège devant la cité,
qu'elle fust prise; et puis à ardoir et destruire tout le pays entour, pour
ce que l'apostole qui excommunié l'avoit, avoit sis et séjourné dedens.
Tout celle affaire fu faite assavoir au roy Loys, par ses privés amis qu'il
avoit à la cour l'empereur. Et tantost comme il sceut ce, il fist escripre
ses briefs et les envoya à ses barons et à ses haux hommes, par quoy il les