Rois, s'en tel point vos metés el retour,
France dira, Champaigne et toute gent
Que vostre los avez mis en tristour
Et que gaignié avés moins que nient.
Que des prisons qui vivent à tourment
Déussiés avoir pesance,
Et déussiés querre leur délivrance;
Quant por vous sont et por s'amor occis,
C'est grans pechiés sé les laissiés chaitis.
IV.
Rois vos avés trésor d'or et d'argent,
Plus que nus rois n'ot onques, ce m'est vis;
Si en devés donner plus largement
Et demorer, pour garder cest païs;
Car vos avés plus perdu que conquis.
Si seroit trop grant viltance
De retourner à tout la meschéance;
Mais demorés: si ferés grant vigour,
Tant que France ait recovré s'onnour.
V.
Rois, vos savès que Diex a pou d'amis,
Né onques-mais n'en ot si grant mestier:
Quar por vous est cist peuple mors ou pris,
Né nus, fors vous, ne l'en puet bien aidier.
Que povre sont li altre chevalier,
Si crement la demorance.
Et s'en tel point lor faisiés défaillance,
Saint et Martir, Apostre et Innocent
Se plainderoient de vous au Jugement.
LXI.
ANNEE 1251.
De la mort l'empereur Federic et Henry son fils.
Celle année meisme avint que l'ainsné fils l'empereur Federic qui Henry avoit nom fu forment courroucié de ce que son père estoit déposé de l'empire; si assembla grant ost de Guibelins pour destruire et empirier le siège de Rome. Si comme il fu acheminé pour aler vers Rome, une fièvre continue le prist dont il mourut; quant il fu mort sa gent n'orent point de seigneur, si en retourna chascun en sa contrée. L'empereur fu moult affoibloié de la mort Henry son fils: si s'en ala en Puille à Mainfroy son fils de bast, et commença à attraire les barons à soy et leur monstra signe d'amour, et leur requist qu'ils fissent de Mainfroy leur seigneur, et leur monstra moult de exemples qui estoient à la confusion de l'églyse de Rome.
Si comme il machinoit contre le pape Innocent, une reume luy descendi en la gorge qui luy estoupa les conduis, si qu'il ne pot avoir s'alaine et mourut. Quant le pape sot certainement que l'empereur estoit mort, si se parti de Lyon et vint à Rome; et puis d'illec à une cité que on nomme Anengne[462]: et illec séjourna une pièce, car il n'osa aler plus avant vers Puille pour la doubtance de Mainfroy, le prince de Tarente. Nouvelles vindrent à Conrat que son père l'empereur Federic estoit mort et son frère Henry, si luy fu avis que la terre luy devoit appartenir, si se fist faire chevalier et espousa la fille au duc de Bavière.