¶ De .x.
Nous escrivons la fin de dictions en eux/ eulx oux/ oulx/ aux et aulx/ par x non point par .z.
¶ De y grec.
¶ Nous escrivons coustumierement y grec en la fin de la diction comme roy esmoy/ feray/ amy/ icy. &c. Et aussi en la diction descendant du grec ayant y grec comme hypocrite en la premiere syllabe/ abysme/ babylonne/ tyrant de tyrannus et semblables.
¶ De .s. et .z.
¶ Vocables ayans b/ c/ d/ f/ l/ & t. au singulier ont/ z/ aprez lesdictes consonantes au plurier. Les terminez en/ g/ m/ n/ p/ r/ ont au plurier s. On escript par coustume les participes et noms terminez en ant ou ent/ au plurier par s : muant t en s comme negligent/ negligens. J'aymeroye mieulx adjouter s aprés t : & escripre negligentz vaillantz & ainsy des aultres. Oultre ce tout vocable terminé en e feminin ayant sibil retient s finale comme divines/ vaillables/ bourgeoises/ discordes promesses/ bonnes/ dures et semblables/ au contraire le masculin a z/ comme deitez/ irritez/ precepitez. &c. Nous avons declairé dessus quand ung terme est masculin ou feminin. Je porroye icy assembler plusieurs dictions a l'escripture desquelles on voit leur difference comme dix de decem/ dis de dico/ dictz de dicta/ Lesquelles je laisse aux diligentz lecteurs.
¶ Et pour la fin nous debvons songneusement retourner au latin et regarder parfaictement l'orthographie latine pour nous reigler en nostre escripture franchoise nous sommes souvent abusez par faulte de ce comme par faulte de tirer au latin nous escrivons/ escripre/ escripvoit. &c. par p combien que latin scribere scribebat n'a point de p. ainsi on est deceupt/ pour cause que escript lequel vient de scriptus s'escrit par p : et ainsi des aultres lesquelz je passe pour briefveté.
¶ Aux lecteurs.
¶ Nous avons beningz lecteurs entamé ceste matiere non point que pensons avoir satisfait ou pour satisfaire mais nostre intention est principallement de animer et aygrir les engins des gentilz facteurs & vrays zelateurs de nostre langue franchoise pour rencontrer l'ung l'autre au passetemps de doulce et amiable concertation et que par telle collision ilz viennent esclarcir et nettoyer la rouillure/ les faultes/ et obscurtez grandement noircies/ corrompues/ et perverties par les faulses escriptures/ et aussi pour la restituer en son honneur a la gloire et exaltation de tous franchois.
¶ Finis