Les estranges tromperies de quelques Charlatans nouvellement arrivez à Paris (histoire plaisante et necessaire à toutes personnes pour s'en garantir), descouvertes aux despens d'un plaideur[383], par C. F. Duppé.
A Paris, chez Robert Daufresne, rue S. Jacques, au Petit Jesus.
M.DC.XXIII. In-8.
Je ne croy pas que, de tous les proverbes qui ont jamais esté inventez par les hommes, il y en aye un plus veritable que celuy qui dit:
Heureux celuy qui, pour devenir sage,
Au mal d'autruy fait son aprentissage!
Mais aussi croy-je que celuy que je vay faire et inventer, estant très asseuré, treuvera son passeport parmi ceux qui ont faict des leçons de sagesse à leurs despens.