Si au bourbier menteur elle se plonge,
Croy le rebours de ce qu'elle dira,
Et tu verras qu'elle te servira
De verité, pensant dire mensonge.
Si elle dort la grasse matinée,
C'est ton profit, d'autant qu'elle n'a pas
Tel appetit quand ce vient au repas,
Et son dormir luy vault demy-disnée.
Si elle faict la malade par mine,
Va luy percer la veine doucement,
Droict au milieu, et tu verras comment
Tel esguillon luy porte medecine.
Si elle est vieille ou malade sans cesse,
Tu la sçauras sage contregarder,
Attendant mieux, et si pourras garder
Pour un besoin la fleur de ta jeunesse.
Si tu te plains que ta femme se passe
De faire enfans, par faute d'un seul point,
Sois patient: mieux vaut ne s'en voir point
Que d'en avoir qui font honte à leur race.
Mais, si tu dis que la charge te presse
D'enfans petits, dont la teste te deult,
Ne te soucie, il n'en a pas qui veut:
Ils t'aideront à vivre en ta vieillesse.
Si quelquefois du vin elle se donne,
Cela luy faict sa malice vomir;
C'est un potus[319] qui la faict endormir;
Femme qui dort ne faict mal à personne.
Si le ciclope a tasché son visage
D'une laideur qui ne se peut oster,
C'est pour du jeu d'amour te desgouter:
Qui moins le suit est reputé pour sage.
D'autre costé, ne sortant de ses bornes
En beaux habits, la blancheur de son taint
Ne te fera de jalousie attaint,
Ains te rendra franc de porter les cornes.
Si bien parée elle feint l'amiable[320]
Sortant dehors, je te diray pourquoy
C'est pour complaire à autruy plus qu'à toy,
Veu qu'au logis elle ressemble un diable.