MINIO. Son contento. Addio.
LUZIO. Addio. Bon dí.
ATTO IV
SCENA I
MASTRO ANTONIO, REPETITORE.
MASTRO ANTONIO. Mi non ghe posso catare ancuo negun che me chiami acciò che mi ghe faza una maitina; e no ghe ho invidia a persona del mondo per saver fare una romanesca, una pavana. Alle guagnelle de san Zacaria, che voio andare a casa de sto mistro di scola che m'ha pregao che me ghe vaga a veerlo, ché vol che ghe faga no so che servizio. Questa e' xe la porta. Voio battere. Tic, tac. E' non responde ninguno. Tic, toc.
REPETITORE. Quis est ille?
MASTRO ANTONIO. Bon dí, bon dí, misier.
REPETITORE. Bene veniat, bene veniat.
MASTRO ANTONIO. A son mastro Antonio. Trin, trin.