(accennando di sottecchi alla nipote) — Non pozzu parrari ca haiu a diri missa...
D. Nzulu
(con un movimento di sorpresa) — Vih!... E cu cci pinsava? (volgendosi alla ragazza) Rachilinedda, figghia... ca comu? nuautri nni stamu scurdannu di tia!... Chi bedda facci ca cci fa 'u ziu a 'sta niputedda, ca è 'na scocca di ciuri pi daveru... Ca lassiminni godiri di ssi biddizzi! (ripete i soliti gesti d'ammirazione, poi, rivolto a Brasi) Guarda chi fai: accumpagnala 'nt' 'o giardinu, a me' niputedda, cci duni 'i forfici e si cogghi un mazzu di rosi a piaciri sò.
Rachilina
(balzando in piedi tutta contenta) — Oh grazii, ziu! Si si... 'I vittimu passannu e 'o dissimu: «Chi beddi rosi chi avi 'u ziu!»
D. Nzulu
Tutti pi tia! Va, va, vo' cogghitilli!
Rachilina
(va di corsa, battendo le mani, appresso a Brasi per uno degli usci di fondo).