D. Iacu
( ridendo grosso ) — Graziusu, si! Mi pari un spinnacardiddi! E chista non po' essiri parti mia!
D. Ninnaru
Cca 'stu iocu ha duratu assai e divi finiri! Finu ca era Don Sucasimula, mi faceva arridiri.... Ora spuntan ssu Cappiddazzu!... Quantu nni ficimu? Unni jemu cu 'sta chitarra?... È certu ca chistu veni cca.... chi voli? Fa cridiri chi pretenni a la Zi Vittula... E allura pirchì non va nni idda, e veni cca? Chi traficu cci avi?... È certu ca Tinnirina cci arridi e lu ricivi in gran segretu ( tentennando il capo ) Vah.... vah.... vah.... vah... Chista cca, 'a vecchia, dici e non dici... ietta 'na paruledda ca percia balati.... e poi.... non sapi cchiù nenti....
Tidda
Sperta, sperta, 'ssa vecchia!
D. Ninnaru
Iu, intantu, mi sciarriu cu 'i me' parenti....
Tidda
Mischinu!