C'era 'na vota 'nu Re cu' tre figli. 'Stu Re carivo malato[1] coll'uocchie, e cecavo co' tutte e duie. Chiamavu lo mieroco; e quisti li ricivo,[2] ca pe' sanà' ci vulia 'na penna r'acièddo Grifone. Lu Re sse votaie[3] 'nfaccia a li figli, ricenno,[4] ca chi sse ferava[5] ri l'ascià'[6] 'na penna r'acieddo grifone, a quiddu ria la crona sua. Li tre figli ssi mettiero[7] subbeto 'ncamino pe' trovà' 'sta penna. Lu cchiù picciriddo scontavo[8] 'nu viecchio, che l'addimmannavo, che ghieva[9] facenno. Lu giovenieddo li ricivo:—«Staie cecato tata,[10] co' tutte e duie l'uocchie; e pe' sse sanà' ce vole 'na penna r' acieddo grifone. E tata ha ditto, ca a chi l'ascia, li raje[11] la crona sua».—Lu viecchio li ricivo:—«Teccote 'st' acini re granorinnio,[12] e mo che vai cchiù 'mpieri[13], truovi tre acieddi; tu piglia 'stu granorinnio e menaggello 'nnante. L'acieddi corrono subbeto a mangià'. Tu, a quiddo re miezzo, sceppele[14] 'na penna re la cora, ca quiddo è l'acieddo grifone».—Lu figlio de lo Re accussì' facivo; e, pe' paura che l'arrubbassero la penna, sse l'accovavo[15] into a la scarpa; e, tutto preato[16], sse abbiavo alla casa sua. Non facivo assai camino e scuntavo l' auti[17] dui frati, che voliero sapè' ra iddo, se avia asciato la penna re l'acieddo Grifone. Lu guaglione negavo, ma li frati non lo creriero e lo scennerarono[18] ra la capo a lu pero, e jero pe' verè' 'into a la scarpa: ce asciarono la penna. Li frati, tanno, che faciero? Lu pigliaro e l'accerierono e lo roprecarono[19] dà stesso. Loro po' portaro la penna a lu patre; e, come toccava l'uocchie co' quedda penna, sanavo ciesso.[20] Roppo picca tiempo, 'nu purcarieddo[21] 'nu juorno jia pe' quedde parte, pascienno li puorci; lu canu suo, justo a quiddo punto, addò' stia roprecato lo figlio picciriddo ru lu Re, sse mittivo a scavà'; e cacciavo fore tutte l' ossa. Lu purcarieddo cu' 'n uosso sse facivo 'nu 'iscarieddo.[22] Juto po' pe' sse lu mette 'mmocca, lo 'isculo accommenzavo a dice accussì:—«Purcarieddo, che 'mmocca mmi tieni, | Tieneme strinto e non mme lassà'. | Pe' 'na penna r'acieddo Grifone, | Fratemi feciero li traditori».—E quante vote 'mmocca sse lo mettia, sempe lo 'isculo così ricia. 'Na vota, sse trovavo a passà' pe' 'nante a la casa re lu Re, cu' lu 'isculo, che ricia accussì. Lu Re sentivo e subbeto lu facivo 'nchianà' 'ncimma[23] a lu palazzo. Lu purcarieddo sse mettivo lo 'isculo 'mmocca; e lu 'isculo ricia.—«Purcarieddo, che 'mmocca mmi tieni, | Tieneme strinto e non mme lassà'. | Pe' 'na penna r'acieddo Grifone, | Fratemi feciero li traditori.»—Lu Re volivo sapè' ra lu purcarieddu, chi l'avia rato quiddo 'isculo; e lu purcarieddu li ricivo lu trascurso come era juto. Lu Re tanno sse lo volivo mette 'mmocca iddo; e lo 'iscarieddo ricivo po' accussì':—«Tata, Tata, che 'mmocca mmi tieni | Tienemi strinto e non mme lassà' | Pe' 'na penna r' acièddo Grifone. | Fratemi feciero li traditori».—Lu Re, roppo, lo rivo 'mmocca a 'nu figlio; e lu 'isculo ricivo:—«Frate, Frate, che 'mmocca mmi tieni, | Tienemi strinto e non mme lassà'. | Pe' 'na penna r'acieddo grifone | Tu mme tenivi, e l'auto fò».—Lu Re capivo tutto; e subbeto fece accire'[24] tutte e due li figli. E accussì ss'abberavo, ca chi accire oje, resta acciso craje.[25]
[NOTE]
[1] Carivo malato, s'ammalò.
[2] Li ricivo, gli disse.
[3] Votaje, voltò. Sse votaje 'nfaccia a, si rivolse a.
[4] Ricenno, dicendo.
[5] Ferava, chi avrebbe avuta abilità, chi fosse stato da tanto.
[6] Ascià', trovare, rinvenire.
[7] Mettiero, misero.
[8] Lu cchiù picciriddu scuntavo, il più piccolo, l'ultimo dei figliuoli incontrò.