И пойде на них в ярости мужьства вой своих не со многою дружиною, не бе бо когда съждати многых вой с силою великою, но уповая на святую Троицу. Отець же его, великий князь Ярослав Всеволодич 7 не бе ведел таковаго въстаниа на сына своего Александра, ни оному бысть когда послати вести к отцу, уже бо приближишася ратнии. Тем же и мнози Новгородци не съвокупишася, понеже ускори великий князь Александр пойти противу ратных, и прииде на ня 8 в неделю 9 …

И бысть сечя велика над римляны, изби множество много бесчисленое римлян и самому королю възложи печять на лице острым своим мечем.

О ШТИ

10

МУЖЕХ ХРАБРЫХ

Здесь же явишася в полку великаго князя Александра 6 мужей храбрых, иже с ним крепко мужествоваху. Первый Гавриило Олексичь. Сии бо наеха на шнеку 11 и виде королевичя, мчяща под рукы. и вьзъехав по дсце 12 до самого корабля, по ней же схожаху, и втекоша в корабль перед ним, и пакы обратившеся свергоша его с доскы и с конем в море. Божиим же заступлением оттуду изыде неврежен, и пакы наехав бися крепко с самим воеводою посреде полку их, и ту убьен бысть воевода их Спиридон, и бискуп их убьен бысть ту же. Вторыи же Новогородець, именем Збыслав Якунович. Сии же наеждая многажды, бьяшется единем топором, не имеа страха в сердци, и неколко от рукы его паде и подивишася силе его и храбрости. Третий же Яков Полочянин, бе ловчий у князя. Сии наехав на полк с мечем и мужьствовав крепко, и похвали его великий князь. Четвертый же Новогородець, именем Миша. Сии же пешь с дружиною своею натече и погуби римлян 3 корабли. Пятый же от молодых его некто, именем Сава. Сии же наехав великий шатер златоверхыи, подсече столп ему; шатер же падеся, и полци Александрови, видевше падение шатра того, вьзрадовашася. Шестыи же от слуг его, именем Ратмир. Сии бися пешь и оступиша его мнози римляне; он же от многых ран паде и тако скончася. Сии же вся слышах от господина своего великаго князя Александра и от иных, иже в то время обретошася в той сечи…

Остаток же их побеже посрамлени, а трупиа мертвых своих великих воевод наметаша три корабли и потопишася с ними на мори, а прочим ископаша ямы и вметаша их в ня безчислено; а инии мнози язвени быша и той нощи побегоша. Новогородцев же ту паде: Костянтин Луготиничь, Юрята Пинящиничь, Намест Дрочило, Нездилов сын Кожевничь, а всех 20 мужей паде и с ладожаны. Великий же князь Александр Ярославичь възвратяся с великою победою и прииде в Новъгород…

О НЕМЦЕХ И ПСКОВИЧЕХ

Того же лета взяша немци медвежане, юрьевци, вельядци[74] с князем Ярославом Володимеричем город Избореск 2. И прииде весть в Псков, яко взяша немцы Избореск, и выиде противу им весь град, и сътвориша с ними брань, и бишася с ними крепко, и бысть сечя межи ими велика. Ту же убиша Гаврила Гориславичя воеводу, и погониша псковичь, и много их гонячи били, а иных руками яша, и пригонивше под город зажгоша посад весь, и много зла бысть, погореша бо и церкви многы и святыя иконы в них и вся руга церковная; и села пусты сътвориша около Пскова, стояша же под городом неделю, но города не взяша и, полон мног вземше, отъидоша. И тако беша без мира. Бяху бо перевет 3 держаще с немци псковичи, подвел их Твердило Иванковичь с инеми, и сам почя владети Псковом с немцами, воюя села Новогородцкая, и инии псковичи вбегоша в Новъгород и з женами и з детми. Toe же зимы паки приидоша от западныя страны немцы и чюдь на Водь 4 и повоеваша все, и дань на них възложиша, и срубиша город в Копорьи в погосте, в отчьстве великаго князя Александра. Но не то бысть зло, но и Бесово взяша и гонишася за 30 верст до Новагорода, гость бьючи, и семо и до Лугы, и до Сабля. А великий князь Александр отъеха тогда в землю Суздальскую, в Переяславль град, с материю и с княгинею и с двором своим, роспревъся с новогородци. Новогородци же с челобитьем послаша к великому князю Ярославу Всеволодичю, просяще у него сына себе и вдасть им сына своего князя Андрея. Новогородци же здумавше и послаша владыку 5 Спиридона с бояры опять к великому князю с челобитьем, просяще собе сына его великаго князя Александра. А в то время на волость на Новогородцкую наидоша литва, немци и чюдь, и поимаша по Лугы 6 кони все и скот, не на чем бе и орати по селом. Князь же великий Ярослав, приим моление владычне и новгородцев чедобитие, вдасть им опять сына своего Александра.

В лето 6750 прииде великий князь Александр Ярославичь в Новъгород и изыде въскоре с новогородци и с ладожаны, и с корелою и с ижеряны на град Копорью 7 и изверже град из основаниа, а самих немець изби, а иных с собою приведе в Новъгород, а иных пожалова отпусти, бе бо милостив паче меры, а вожан и чюдцу переветников извеша и иде в Переславль. Събраша же ся немци с сея стороны в зимнее время и приидоша на Псков, и полкы псковскиа победиша, и наместников своих посадиша на Пскове. Се же слышав великий князь Александр, и велми оскорбе за кровь христианьскую и не умедьлив нимало, но разгореся духом своим и ревностию по святей Троици и по святей Софеи, и поим с собою брата своего Андрея и вся воя своя, и прииде к Новугороду…