The cover image was created by the transcriber based on the original title page and is placed in the public domain.

Dieser Text enthält zusammengesetzte diakritische Zeichen, wie z.B. „e über o“ oder „o über u“. Können diese nicht korrekt angezeigt werden, sollte eine Schriftart installiert werden, die den Unicode-Block „Combined Diacritical Marks“ unterstützt. Weitere Hinweise finden sich am [Ende] dieses Textes.

BEYTRÄGE

ZUR KENNTNISS

DER

ALTDEUTSCHEN
SPRACHE UND LITTERATUR.

VON

GEORGE FRIEDERICH BENECKE.

ERSTE HÄLFTE.

GÖTTINGEN,

IN DER DIETERICHSCHEN BUCHHANDLUNG.

1810.

BEYTRÄGE
ZUR KENNTNISS
DER
ALTDEUTSCHEN
SPRACHE UND LITTERATUR.

VON

GEORGE FRIEDERICH BENECKE,

PROFESSOR, UND CUSTOS DER UNIVERSITÄTS-BIBLIOTHEK
ZU GÖTTINGEN.

ERSTER BAND. THEIL I.

GÖTTINGEN

BEY HEINRICH DIETERICH

1810.

MINNELIEDER.

ERGÄNZUNG

DER

SAMMLUNG VON MINNESINGERN.

HERAUSGEGEBEN

VON

GEORGE FRIEDERICH BENECKE,

PROFESSOR, UND CUSTOS DER UNIVERSITÄTS-BIBLIOTHEK
ZU GÖTTINGEN.

GÖTTINGEN

BEY HEINRICH DIETERICH

1810.

VORBERICHT.

In den Anmerkungen, die GOLDAST den drey Altdeutschen Gedichten beyfügte, welche er 1604 in seinen Paraenetici veteres heraus gab, stiessen mir aus Dichtern, deren Lieder anderthalb hundert Jahre später in der Sammlung von Minnesingern erschienen, mehrere Stellen auf, die ich in dieser Sammlung vergebens suchte. Es däuchte mir der Mühe werth, nachzuforschen, woher GOLDAST diese Stellen genommen habe; und da ich überhaupt eine critische Berichtigung des Textes der Minnesinger für das erste und dringendste Erforderniss bey dem Studium derselben halte, so glaubte ich, auch die kleine Hülfe nicht verschmähen zu dürfen, die eine Vergleichung der in Bremen befindlichen Goldastischen Handschrift vielleicht darbieten könnte. Ich erbat mir daher diese Handschrift zur Einsicht, und Hr. Dr. und Prof. OELRICHS, der würdige Vorsteher der Bremischen Bibliothek, hatte die Güte, meine Bitte auf die gefälligste Weise zu gewähren, und mir jeden beliebigen Gebrauch meiner Ausbeute zu erlauben. Man würde vielleicht früher schon auf diese Handschrift aufmerksam geworden seyn, wenn nicht BODMER, in dem Vorberichte zu den Proben der alten Schwäbischen Poesie, versichert hätte, dass sie unvollständig sey, und dass die Lieder, die sie enthalte, ganz genau mit der Pariser Handschrift übereinkommen.

Die Handschrift ist in Folio, auf Papier geschrieben, und der Rücken des Bandes hat die Überschrift: Hofflieder der teutschen Meistersänger. Auf dem letzten Blatte findet sich (vollkommen richtig) von H. HEISEN bemerkt, der Band sey 367 Blätter oder gedoppelt so viele Blattseiten stark. Sie ist ohne Zweifel eine Abschrift der Manessischen Handschrift, und enthält ungefähr zwey Fünftel derselben, oder erstlich alles das, was in dem Zürcher Abdrucke von S. 1 des ersten Theiles bis S. 172 befindlich ist, nur dass auf KÚNIG CHŮNRAT, KÚNIG TYRO VON SCHOTTEN UND FRIDEBRANT SIN SUN folgt, oder das Gedicht, das in dem zweyten Theile der Samml. von Minnes. von S. 248 bis S. 251 abgedruckt ist. Mit dem Worte kumberliche in der letzten Zeile der fünften Strophe der Lieder des HER BERNGE VON HORHEIN bricht die Handschrift ab. Ausser dem aber sind zweytens noch von den in dem zweyten Theile der Zürcher Ausgabe befindlichen Gedichten abgeschrieben DER TANHUSER, VON BŮCHEIN und die ersten Lieder des HER NITHART (Samml. von Minnes. Th. 2. S. 58 bis S. 72). Die letzte Zeile, womit die Handschrift endigt, ist: ‚Nu seht ob ich ze frouwen wol an ir behalten si.‘ — Das beygefügte Verzeichniss der Dichter ist mit dem in dem zweyten Theile des Zürcher Abdruckes S. 261 und 262 befindlichen vollkommen gleichlautend.

Man kann, wenn ich nicht irre, in dieser Bremischen Handschrift fünferley Hände unterscheiden. Die erste geht bis zu den Liedern des Grafen CHŮNRAT VON KILCHBERG; die zweyte von da bis auf HER WALTER VON KLINGEN; die dritte bis zu der Zeile ‚Swer ane vorhte herre Got‘ (Samml. von Minnes. Th. 1. S. 128. Col. 2.); die vierte bis zu dem schon angeführten Worte ‚kumberliche‘ in den Liedern des HER BERNGE VON HORHEIN (Samml. von Minnes. Th. 1. S. 172 f.). Von der fünften Hand endlich ist abgeschrieben was im zweyten Theile der Samml. von Minnes. von S. 58 bis S. 72 steht. Die drey ersten Hände zeugen von Schreibern, die der alten Sprache kundig waren; die vierte Hand ist weit schlechter, und man sieht deutlich, dass der Abschreiber nicht verstand was er schrieb. Unter andern steht gewöhnlich nn statt m und m statt n, woraus zu schliessen ist, dass diese Buchstaben sich in der Original-Handschrift sehr ähnlich sehen müssen, um so mehr, da auch schon früher sich öfter n findet, wo der Zürcher Abdruck m hat, und umgekehrt. Diese vier ersten Hände bedienten sich durchaus der Lateinischen Buchstaben; von der fünften Hand sind die so genannten Deutschen Buchstaben gebraucht, und der Abschreiber war, wie es scheint, der alten Sprache etwas kundiger.

Die einzelnen Lieder jedes Dichters sind mit Römischen Zahlen bezeichnet, die Strophen mit Arabischen. Die Reimzeilen sind abgesetzt, wiewohl nicht immer ganz richtig. Interpunction ist nur an äusserst wenigen Stellen beygefügt.

Die Bremische Handschrift enthält, so weit sie geht, alles was in der Samml. von Minnes. abgedruckt ist (denn eine kleine unten S. 276 bemerkte Ausnahme kann eigentlich gar nicht als Ausnahme gelten); und sie enthält ein gutes Theil mehr. Meine Überzeugung, dass der Zürcher Abdruck lückenhaft sey, wurde durch diese Handschrift vollkommen bestätigt. Wie es aber möglich war, dass die Herausgeber vollständige Lieder in unverständliche Bruchstücke verwandelten, und wie es kam, dass sie manches schöne Lied ganz übergingen, das begreife ich nicht, und schwerlich ist jemand jetzt noch im Stande, eine befriedigende Auskunft darüber zu geben. Auf alle Fälle wünschte ich, bey der grossen Achtung, die ich für BODMER hege, dass er in seiner Vorrede zu dem zweyten Theil der Samml. von Minnes. die Stelle (S. V), in der er einiger wenigen ausgelassenen Strophen erwähnt, durchgestrichen oder weniger hochfärtig ausgedrückt hätte.

Die folgenden Bogen enthalten die Ausbeute, welche die Vergleichung der Bremischen Handschrift lieferte. Abschrift und Abdruck sind mit pflichtmässiger Genauigkeit besorgt worden; da wo es mir nöthig schien, nach Vermuthung gemachte Verbesserungen in den Text aufzunehmen, habe ich, wenige unbedeutende Veränderungen ausgenommen, die Lesart der Handschrift unter dem Texte angegeben. Die beygefügte Interpunction wird, wie ich hoffe, den meisten Lesern willkommen seyn. Interpunction ist, meines Erachtens, die einzige Zuthat, die den Kenner nicht stört, und dem Anfänger das Verständniss der Überreste des Alterthums gar sehr erleichtert. Dass sie an manchen Stellen, bey der freyen Wortstellung unserer alten Sprache, Schwierigkeiten hat; dass die eingeführte Bezeichnung derselben mangelhaft ist: das kann für den Herausgeber einer alten Schrift eine Ermahnung seyn, mit gehöriger Bedachtsamkeit und mit geübtem Gefühle zu Werke zu gehen, keinesweges aber ein Grund sie wegzulassen. Auch selbst wenn er irrt, kann er wenigstens das Verdienst sich erwerben, den richtiger sehenden zu Verbesserungen zu veranlassen. Wären die frühern Herausgeber alter Deutscher Gedichte so gefällig gewesen, den von ihnen besorgten Abdrücken die bequeme, den Gebrauch erleichternde Gestalt zu geben, in der man jedes neuere gedruckte Buch zu sehen gewohnt ist: so hätten diese Gedichte schon lange eine ungleich grössere Anzahl von Lesern, auch wohl von critischen und erläuternden Bearbeitern gefunden; ihre Trefflichkeit wäre weit allgemeiner anerkannt worden, hätte weit früher auf empfängliche Gemüther gewirkt, und Früchte mannigfaltiger Art hervor gebracht. Alte Handschriften zu lesen, ist nicht jedermanns Sache, und niemand, der eine Sprache lernen will, pflegt damit den Anfang zu machen; und doch sind wir gerade bey den vorzüglichsten Werken unserer alten Litteratur auf Abdrücke beschränkt, die beynahe eben so unbehülflich sind als eine Handschrift, und oben drein noch weit unzuverlässiger und fehlerhafter. Bey so bewandten Umständen darf ich mir daher wohl mit der Hoffnung schmeicheln, durch die Herausgabe dieser Minnelieder wenigstens die erste Bekanntschaft mit den alten Denkmahlen des Deutschen Gesanges erleichtert zu haben.

Zwar ist noch immer eine andere Erleichterung zu wünschen, die früher nicht gegeben werden konnte, die aber jetzt wohl bald mit Recht gefordert werden kann; ich meine die Festsetzung einer gleichförmigen alterthümlichen Orthographie. Allein diess ist ein Punct, über den erst die Stimmen gründlicher Kenner, der alten Sprache vollständig und ausführlich zu vernehmen seyn werden.

Recht sehr wird es mich freuen, wenn diese meine Arbeit dazu beyträgt, die Überzeugung zu befördern, dass es durchaus nothwendig ist, eine neue sorgfältige Vergleichung der Pariser Handschrift anzustellen, und die sich daraus ergebenden Berichtigungen des Textes bekannt zu machen. Ich bin weit entfernt, das Verdienst zu verkennen, das sich seit einigen Jahren mehrere Freunde der alten Deutschen Poesie auf mancherley Weise um das Studium derselben erworben haben. Vor allen Dingen aber sollten wir doch eilen, den vorzüglichsten Gedichten, die bereits gedruckt sind, die grösste mögliche Richtigkeit des Textes zu geben, ehe vielleicht ein unglücklicher Zufall die Handschriften vernichtet, aus denen diese Berichtigungen zu nehmen sind. Wie sehr besonders die MÜLLERsche Sammlung einer solchen Nachhülfe bedarf, weiss jeder Kenner, zu seinem Leidwesen, nur zu gut. So ausgemacht es auch ist, dass die allgemeinen Grundsätze der Critik, wie sie bey den classischen Sprachen in der höchsten Periode ihrer Bildung angewandt werden, bey ihrer Anwendung auf die alte Deutsche Sprache, und die darin geschriebenen und von Abschreibern und Umarbeitern oft so willkührlich behandelten Werke, gar manche besondere und eigenthümliche Bestimmung erfordern: so wahr bleibt es doch auf der andern Seite, dass für das gründliche Studium unserer alten vaterländischen Litteratur nichts erspriesslicher seyn kann, als wenn wir uns die genaue critische Sorgfalt zum Muster nehmen, die man mit so vielem Scharfsinn und unermüdet fortgesetztem Fleisse auf die Schriften der Griechen und Römer verwandt hat. Je sorgfältiger der Acker bestellt wird, desto erfreulicher wird die Ernte seyn.

Göttingen, December 1809.

INHALT.

ERGÄNZUNGEN
DER
SAMMLUNG VON MINNESINGERN
AUS DER
BREMISCHEN HANDSCHRIFT.

GRAVE OTTO VON BOTTENLAUBE.

Von diesem Dichter enthält die Handschrift folgende mit XI. bezeichnete Zeilen, wovon sich in der Samml. von Minnesingern (Th. 1. S. 16. a Zeile 2 v. u.) bloss der Anfang befindet.

Mir hat ein wib

Herze und lib

Betwungen und gar verhert!

Dú ist so gůt,

Swas si mir tůt.

Wil si, so wirde ich sanfte ernert;

Tůt si mir we,

Doch wil ich e

Betwungen sin von ir gewalt,

Danne ich verber

Die werden ger

Und ouch die sorgen manicvalt,

Die si mir machet

Und git.

Min froͤide swachet

Iemer sit.

Sweme si nu lachet

Zaller zit,

Des selde wachet

Sunder strit;

Gelúkes rat

Hat in den pfat

Geleret so,

Das er sol ho

Daruffe sweben,

Mit froͤiden leben.

Solde ich das sin,

So muͤste, an aller sorgen schin,

Das herze min

Erhoͤhet werden, sunder pin.

Ich, froͤide bar,

Ich gedenke ie dar,

(Als ich getar):

Wirt si gewar,

Das ich so var,

Ir eigen gar;

Si erzeiget ir

Genade an mir

Si ist ein wib,

Der ie min lib

Alleiner lebt,

Und iemer strebt

Uf den gedinge

Und selchen trost,

Das mir gelinge,

Und werde erlost

Der sorgen, dú mich twanc noh ie,

Sit ich verlie

Den můt an sie.

Min herze jach,

Sit si min ouge alrerst ersach,

Sin ungemach,

Das ime sit,

Bi siner zit

Beschach,

Das were dahin,

Und were ime sin

Komen und gewin.

Des wande ouch ich;

Nu tůt si mich

Gar sorgenrich,

Und meret mine clage.

Das verkeret

Und seret

Mine tage.

Min gemuͤte

Ist worden kranc;

Ich verwuͤte

Nach ir guͤte

Ane allen dank;

Iedoch darunder

Ist ein wunder

Nicht besunder,

Das ich liden,

Und miden

Můs si, reine,

Die ich meine

Nicht ze cleine.

Amme herzen

Hab ich smerzen

Und kumber

(Ich vil tumber!)

Manigen sumber.

Warzů wart ich ie geborn,

Sol ich iemer sin verlorn?

Ja hat ich si mir erkorn,

Das die wunden,

Ungesunden,

Mir verbunden[1]

Solten werden

Von der werden;

Nu ist min swere

Ir gar unmere,

Der ich lere

Wurde, ob mir dú frouwe min

Tete gůten willen schin.

Solde es mit ir hulden sin,

Das ich sprechen

Muͤste zir,

Was si zechen

Und rechen

Wolde an mir:

Sicherliche,

Ob das geschiht,

Imme riche

Ist min geliche

Danne niht.

Herze, sinne,

Minen můt

Hat dú minne

Mit gewinne

Also behůt.

Peir der Mere

Dulde swere

Dur Afrien,

Sin amien,

Von Navar.

Plei von Lone

Lie die krone

Und die sinne

Durch die minne

Drisseg jar.

Er was sorgenrich;

Das was kumberlich,

Doch ungelich

Der swere min,

Die mir tůt schin,

Von der ich dulde disen pin.

Es enstille

Ir gůter wille

In kurzen ziten

Ane biten;

Ich bin tot.

Sol min trúwe,

Ane alle rúwe,

Sus ein sterben

An ir erwerben;

Dest ein not,

Die ich gerne dol,

Und liden sol;

So rehte wol

Stet si mir an.

Ich selic man!

So suͤsse not ich nie gewan.

Iedoch swie gerne

Ich sterben lerne

Dur ir minneclichen lip

(Owe, si reine, selig wib!);

So denke ich doch,

Das si mir noch

Gerůche geben

Ein senfter leben.

Des valde ich ir die hende min,

Das ane ir zúrnen muͤsse sin,

Ob ich genende,

Und ich ir sende

Disen sanc.

Ir lob, ir ere

Ich gerne mere;

In froͤmdú lant

Tůn ichs erkant

Mit truwen, ane valschen wanc.

Wirt mir davon ein habedank,

Ich singe ir das

Ir lob noch bas

Erhoͤhet, ob ichs e vergas.

Mine frouwen

Sult ir schouwen

In so hoher werdekeit,

Das ir sol iemer sin gereit

Der eren krone,

Sit vil schone

Eht aller selden seldekeit

Ir beide hende hat geleit

Ir uf ir houbet.

Das geloubet

Alle mir:

Ob ir si seht,

Ir verjeht

Tugende michels me von ir,

Danne ich iu sage,

Wand ichs durch klage

Mines willen vil verbir.

Min frouwe ist gůt;

Iedoch si tůt,

Das wunneklichcn froͤiden gir

Mich vergat

Und lat,

Das mir kumberlichen stat;

Wand ich pflac

Manigen tag,

Das min froͤide nie gelac.

Owe der dinge!

Ich wenne, ich ringe

Uf einen wan,

Den ich han,

Dem ich iemer undertan

Wesen můs,

Dess mir bůs

Niemer wirdet, untz ein gruͤs

Mich enbindet;

Sa verswindet

Und erwindet

Alles klagen.

In minen tagen

Was sol ich von froͤiden sagen?

Sol ich heil an ir bejagen,

Swie das were,

Es were zit.

Alle swere

Ich gar verbere,

Ob si den strit

Genedecliche

Wolde ir geben

Endeliche;

E ich danne entwiche,

Ich ir gibe das leben.

Bi dem eide

Ich wil geloben:

Sin enscheide

Mich von leide,

Ich můs ertoben.

Das erwende,

Selig wib,

Und sende

Mir das ende,

Das min lib

Froͤide und minne

Und sinne

Von dir, kúniginne,

Gewinne!

Darnach ich iemer ringe

Und zellen ziten strebe.

Uf das hoh gedinge

Ich vil dicke schone lebe,

Das mir an dir gelinge,

Und enphahen muͤsse

Suͤsser minne gebe.

Wie suͤsse

Ich danne singe

Und erclinge,

Swenne ich froͤliche ob allen froͤiden swebe!

(Nun folgt unter XII. der zarte Wechselgesang: Were Cristes lon niht also suͤsse. — Samml. von Minnes. Th. I. S. 16. b.)

HER GOͤTFRIT VON NIFEN.

Was wohl der Grund seyn mag, dass von den funfzig Liedern dieses Dichters in den Züricher Abdruck, ausser vier ganzen, nur einige aus dem Zusammenhange herausgerissene Strophen aufgenommen wurden? Dass Wahl dieser Grund nicht war, das liegt am Tage. — Jene vier von Bodmer vollständig gelieferten Lieder sind hier ausgelassen, die einzelnen Strophen konnten ohne Übelstand nicht ausgelassen werden; auch nehmen sie kaum ein Paar Seiten ein.

I.

Owe, winter, din

Gewalt

Wil uns aber twingen!

Heide und ouch die blůmen rot

Die sint nu worden val;

So klage ich den gruͤnen walt

Und der vogel singen;

Darzů hat vil grosse not

Diu liebú nahtegal. —

We, was klage ich tumber vogel swere!

Ob eht ich der liebún liep in rehter liebe were,

Son clagte ich niht die vogel, noch der liehten blůmen schin.

Al min froͤide lit

An ir,

Dú wol mag vertriben

Swas ich sorgen ie gewan;

Der hat si gar gewalt.

Si ist dú minnecliche, lieb mir

Vor allen wiben.

Des bin ich, vil sender man,

In sorgen worden alt.

Das mag dú vil kúsche wol erwenden;

Wil dú gůte mir ir helferiche helfe senden,

Son darf mich nicht belangen der vil suͤsse bernden zit.[2]

Reinú wib dú sint

So gar

Von der diet gescheiden,

Das da heissent valschú wib;

Dest min herze vro.

Nu ist dú gůte valsches bar;

Davon můs mir leiden

Der vil valschen wibe lib.

Min herze stuͤnde ho,

Ob mir der vil gůten eine brehte

Mit ir guͤte hohen můt. We, was ich danne gedehte

Mit sange, das es erben muͤste an mines kindes kint!

Frouwe Minne, tůt[3]

So wol!

Lat mich des geniessen,

Das ich der vil gůten bin

Mit stete holt, ane allen wank!

Ob ich des geniessen sol,

So moͤht úch verdriessen,

Das si mines herzen sin

An froͤiden machet krank.

Si kan dehsen, swingen in der mâsse,

Und wil behuͤten, das niht bestieben lâsse

Ir roten munt, der mich vil dike machet hochgemůt.

Dú vil here wil

Mich lan

Nach ir grůsse sterben,

Ane aller slahte schulde gar:

Des můs ich trurig sin,

Und in senden sorgen stan.

In kan niht gewerben,

Das ir wolstenden ougen clar

Iht wellen růchen min.

Das clage ich dir, Minne, von der suͤssen,

Sit das si mir niht enwil min sende swere buͤssen.

Minne, fuͤge enzit, das es werde ein gemeines spil.

(Die dritte Strophe diese Liedes steht in der Samml. von Minnesing. Th. I. S. 22.)

II.

Summer, diner froͤidebernden wunne

Froͤwet sich maniges senden herzen můt,

Ob dú nahtegal iht singen kunne

Gegen des wunneclichen meyen blůt.

Ja si singet aber me,

Sit zergangen ist der sne;

Nu twinget mich min kumber aber als e.

Wie moͤht ich den kumber min erliden,

Ich entet es durh ein reine wib?

Disen sumer můs ich froͤide miden,

Es enwende ir kúscher wibes lip,

Dú mich her betwungen hat,

Unde mich in sorgen lat,

Und doch an ir eine al min froͤide stat.

Sit ich bin gebunden mit den banden,

Das dú senden heissent minne bant;

So mac si mich loͤsen mit ir handen,

Sit si treit so helferiche hant.

Frouwe ob allen frouwen min,

Wendent minen senden pin!

Durh úwer zuht lant mich bi froͤiden sin!

Disú lied wil ich der lieben singen,

Der ich lange her gesungen han.

Si kan beide dehsen unde swingen.

Dur ir guͤte sol si mich erlan,

Das ich niht in sorgen si,

Sit mir wont dú froͤide bi.

Vil selig wib, nu tů mich sorgen vri!

Sit an miner herzelieben frouwen

Gar min heil und al min leben lit,

Minne, so la dine guͤte schouwen,

Und scheide disen suͤssen strit.

Minne, min dich underwint,

Wan ich bin der sinne ein kint!

Nu bint die gůten, alde mich entbint!

(Die vierte Strophe dieses Liedes steht in der Samml. von Minnesing. Th. I. S. 23.)

III.

Wir suln aber schone enpfahen

Meyen, der kan froͤide bringen

Und vil maniger hande wunne,

Liehte blůmen, rosen rot.

Sit das uns wil froͤide nahen,

So suln wir mit froͤiden singen.

We im, der uns froͤide erbunne!

Dem si wernde froͤide tot!

Wol im, der uns froͤide mere,

Sit man lútzel froͤide hat!

We ime, der uns truren mere!

Wol ime, der uns leit verkere,

Sit dú werlt mit truren stat!

Lieblich bliken von den wiben,

Dar und dan, mit spilnden ougen,

Das kan sende swere buͤssen,

Und freut sende siechen man.

Es kan sendú leit vertriben,

Swa ein man sin liep siht tougen

Und vil minneclichen gruͤssen,

Und es lachelich sicht an.[4]

Lache, das mir sorge swinde,

Lachelich, ein roter munt!

Sit din lachen mich enbinde

Von den sorgen, das ich vinde

Froͤide: dast ein lieblich funt.

Reinú wib, durh úwer guͤte

Lant mich senden úch erbarmen,

Das mich dú vil wolgetane

Hat geheissen hinnanfúr.

Ob mich das durh niht enmůte,

Wan das man mich siht sust armen

In den froͤiden, froͤiden ane,

Das ist leider an mir spúr.

‚Hinnanfúr‘, das wort mir wendet

Froͤide; ich bin an froͤiden tot.

‚Hinnanfúr‘, das wort mich sendet

In den tot, ob es niht wendet

Ir munt gar durblúhtig rot.

Ich gesach von rotem munde

Nie so lacheliches lachen,

Als dú minnecliche lachet,

Swenne si liebe lachen wil.

Bas, dan ich erdenken kunde,

Kan si liebe liebi machen.

Swa sis liebe liebe machet,

Da hebt sich der wunnen spil.

Minne, wer, das si iht lache,

Swenne ich si mit ougen sehe!

Wiltu, das mir sorge swache,

Suͤssú Minne, an ir das mache,

Das si dir gewaltes jehe.

Ich můs wol von schulden sorgen,

Wie mir von der minneclichen,

Nach der ich zallen ziten brinne,

Miner swere werde bůs.

Beidú abent und den morgen

Sorge wil mir niht entwichen:

Das clage ich der suͤssen Minne.

Das die minnekliche ir grůs

Mir verseite und ouch ir hulde,

Das tůt minem herzen we.

Wer es doch von miner schulde,

Das ich kumber von ir dulde,

Son geklaget ichs niemer me.

IIII.

Selig si dú heide!

Selig si dú ouwe!

Selig si der kleinen vogellinen suͤsser sank!

Blůmen, loub, dú heide

Stant in maniger schouwe.

Die der kalte winter húre mit sinem froste twank,

Dien ist an ir froͤiden wol gelungen;

Als moͤht ouch ich an minen froͤiden wider jungen,

Troste mich ein roter munt, nach dem min herze ie rank.

Mir was, wie min swere

Hete ein lieplich ende,

Do mir seite ein botte, ich solde in froͤiden froͤlich sin.

Ich was froͤidebere,

Sorge was ellende

In mime herzen, do ich wande, ir mundes roter schin

Der wolde in min herze lieblich lachen.

Alse kan dú Minne ein wunder an uns beiden machen.[5]

Minne, tů mir swie du wellest! der gewalt ist din.

Roter munt, nu lache,

Das mir sorge swinde!

Roter munt, nu lache, das mir sendes leit zerge!

Lachen du mir mache,

Das ich froͤide vinde!

Roter munt, nu lache, das min herze fro beste!

Sit din lachen mir git hohgemuͤte,

Neyna, roter munt, so lache mir durh dine guͤte

Lacheliche, roͤseleht! Wes bedoͤrfte ich me?

Minnenklich gedinge

Froͤit mich mange stunde,

Das mich troͤste ein roter munt,

Des ich noch nie vergas.

Minnenklich gedinge,

Ob ich das da funde,

So kunde mir uf erde niemer werden bas.

Roter munt, hilf mir von den noͤten!

Ane Got so kan dich nieman alse wol geroͤten;

Got der was in froͤiden, do er dich als ebene mas.

Wolde mir dú here

Sende sorge ringen,

Das neme ich fúr der vogel sang

Und fúr der blůmen schin;

Und si nach miner lere

Růhte froͤide bringen

Mir, so were min truren krank,

Und wolte in froͤiden iemer sin.

Hilf mir, helferichú, suͤsse Minne!

Twinc die lieben, sam si hat betwungen mine sinne,

Untz si bedenke minen senelichen pin.

(Die zweyte und vierte Strophe dieses Liedes steht in der Samml. von Minnesing. Th. I S. 22; nur ist die vierte durch das Auslassen der siebenten Zeile ganz unverständlich.)

V.

Walt,

Heide, anger, vogelsingen

Sint verdorben von des kalten winters zit.

Da man blůmen sach ufdringen,

Da ist es blos. Nu schouwent, wie dú heide lit!

Das klage ich; so klage ich mine swere,

Das ich der unmere

Bin, der ich gerne lieb in herzen were.

Frouwe Minne, das ist alles din gewalt.[6]

Bar

Min herze in bernder wunne?

Das was, swenne ich sach ir wunneklichen schin

Und ir ougen, sam der sunne,

Dur min ougen lúhten in das herze min.

Darnach wart mir leit in kurzen stunden.

O we, minne wunden!

Wie hast du dich min sus underwunden,

Das ich sender, siecher bin noch froͤiden bar?

Bant

Dú Minne mich der suͤssen,

Und lat die vil lieben sunder truren gan?

Minne, wie wilt dus gebuͤssen?

Minne, ich hans da fúr, es si niht gůt getan,

Minne, hilf enzit! ich můs verderben

Und an froͤiden sterben.

Sol ich niht den roten kus erwerben,

So ist mir froͤiden straze in rúwen pfat gebant.

Los,

In rehter wibes guͤte,

Sach ich zeinem male ir küschen wibes lip.

Davon froͤit sich min gemuͤte,

Das ich dachte: ja, du reine selig wib,

Du macht mir wol minen kumber wenden

Und helfe senden.

Frouwe Minne, troͤstent mich vil senden,

Wan ich stan von úweren schulden froͤidelos.

Wer

Kan mich nu fro gemachen?

Nieman, dan ir minneklicher roter munt.

Wil mir der von herzen lachen,

Davon wirde ich sender, siecher wol gesunt.

Gůten wip, nu wúnschent, das dú here

Mich die strasse lere,

Wa ich usser leide in liebe kere.

Minne! hilf, das mich dú liebe ir liebe wer.

(Die dritte Strophe dieses Liedes steht in der Samml. von Minnesing. Th. I. S. 22.)

VI.

Hy,

Wie wunnenklich dú heide

Sich mit manigem spehen kleide

Gegen dem meigen hat bekleit!

Loup, gras, blůmen, vogellin, beide

Die man sach in manigem leide —

Gar verswunden ist ir leit.

Alsò mehte ouch mir verswinden

Sorge, dú von froͤide ie swant.

Wolde froͤide e sorge enbinden,

Sit das froͤide ie sorge embant;

So wurde ich sorgen fri.[7]

Do

Min ouge erkos die suͤssen,

Do wart mir ein lieblich gruͤssen,

Roͤseleht ein roter grůs.

Do dahte ich: dú ougen muͤssen

Dir vil senden kumber buͤssen;

Anders dir wirt niemer bůs

Sorgen, es enwende ir guͤte.

Dannoch was ir guͤte gůt.

Sam die rosen in touwen bluͤte,

Was ir munt rot als ein blůt.

O we! dannoch was ich vro.

Wer

Kan froͤlich fro beliben,

Wan bi reinen lieben wiben?

Hi, wie suͤsse name, ein wib!

Wip kan sendú leit vertriben;

Wol ir reinen lieben liben!

Ouch si hant so lieben lip,

Das mich nach in můs belangen;

Bi in ist dú wile unlank.

Swa liep lieb hat umbevangen,

Dast ein suͤsser umbevank,

Lieplich nach der Minne ger.

We

Der gar verlornen stunde,

Das mir senden nien enkunde

Lieplich kússen werden kunt

Von ir rosenvarwen munde!

O we, Minne, das din wunde

Mich so lange hat verwunt!

Ich bin von dir ungeheilet,

Ich gewan gegen dir nie heil.

Minne, das du sist verteilet!

Hab ouch dir der minne ein teil,

Du verwundest mich niht me.

Was

Doug minnekliches singen?

Wa sint wip, die kunnen twingen?

Wa sint man, die Minne ie getwang?

Wer kan stete froͤide bringen?

Wer kan sorge us herzen dringen?

Minne ie sorge us herzen drang,

Von der wibes ougenbliken

Da man sach ein suͤssen blig.

Si went sich der Minne entstricken;

Man sint sunder Minne strig:

Welt, davon trage ich dir has!

(Die zweyte Strophe dieses Liedes steht in der Samml. von Minnesing. Th. I. S. 22. 23.)

VII.

Wer gesach ie wunneklichen me den suͤssen meigen?

Wer gesach ie bas bekleit den walt und ouch die wunneklichen heide?

Wer gehort ie bas dú kleinen vogellin gesingen

Gegen der wunneklichen wunne in maniger suͤsser wunneklicher wise?

Da gegen froͤit sich manig herze, wan das mine alleine

. . . . . . . . . . . . . . . . . . . . . . . . . . . . . . . . . . . .

. . . . . . . . . . . . . . . . . . . . . . . . . . . . . . . . . . . . . .[8]

O we trútelehter lip, sol ich alsus verderben!

O we spilnder ougen schin! hei munt, gevar nach wunneklichen rosen!

Herze trut, ir wuͤstet an mir úwer vriges eigen.

Wie zimt wibes guͤte das, ob ich in senden sorgen sus verdirbe?

Liebú frouwe, ich habe iu lange her gedienet von kinde,

Des lat mich geniessen, seht, so wirde ich froͤideriche.

Ob des niht geschiht, so můs min spilende froͤide ein ende han.

Ir vil wunnenklichen wip, ir wolgemůten leigen,

Wúnschent, das mis herzen trut mich von den senelichen sorgen scheide.

So bitte ich die gůten, das sie lasse mir gelingen.

Suͤsse Minne, ob das geschiht, darumbe ich dine werden tugende prise.

Minne, du weist wol, es ist dú liebe, die ich da meine:

Hilf, das mir dú here troͤste min gemuͤte;

Ob des niht geschiht, so wirt mir sender sorgen niemer rat.

O we, Minne, sol ich niht den roten kus erwerben,

Und den suͤssen umbevank, darzů ir minneklichen lip, den losen?

Suͤssú Minne, maht du herzeliep an mir erzeigen,

Nu was treit dich fúr, ob ich nah der vil herzelieben in liebe stirbe?

Minne, ich můs verderben, ob ich niht die froͤide vinde.

Ach dur Got, vil selig wib, noch helfent helfeliche!

Suͤssú Minne, frage si dur Got, was ich ir habe getan.

VIII.

Nu stet dú liebe heide bar

Der wunnenklichen blůmen und der liehten rosen rot;

Der walt hat sich entkleidet gar,

Des lident aber dú kleinen vogellin vil grosse not. —

Was klage ich tumber vogelin sang?

Wan klage ich niht die sweren zit,

Das ich der minneklichen han gedienet alles ane dank?

Si lone mir, si lone niht,

So ist si doch mis herzen trost und ouch dú vrouwe min.

Ich dien ouch ir, swas mir geschiht;[9]

Si můs dú erste und ouch min leste vnz an min ende sin.

Ir ougenblik der vie mich so,

Das ich von ir niht scheiden mag,

Swie selten mich dú herzeliebe hat gemachet fro.

Ach herre Got, wie schone ein wib!

Ja milter Got, wie rehte minnenklich ist sie gestalt!

Ja suͤsser Got, wie lieb ein lib

Gesach in Got, der ir vil reinen libes hat gewalt!

Ir spiegel lichten ougen clar,

Solde ich die mit gewalt ansehen,

So swuͤre ich wol, das mir gewühse niemer grawes har.

Wie gar unmassen sanfte tůt

Ein lieblich kússen und ein minneklicher umbevank!

Si liebet lieb und hoͤhet můt;

Da wirt dú sende sorge bi dem ungemuͤte krank.

Swer lieb bi herzeliebe lit,

E naher und e naher bas,

Da můs dú sende sorge lan der froͤide gar den strit.

Si ist tougen in mis herzen grunt,

Die ich von erst ze herzelieben frouwen mir erkos;

Davon so wirt es ungesunt.

Was schat der lieben, das si schoͤner ist und dabi los?

Von liebe kan ich niht gesagen,

Mir wart so liebes nie niht mer;

Des wolde ich uf genade gerne ein gluͤndes isen tragen.

VIIII.

Loup, gras, blůmen, vogel singen,

Vor dem walde und in den ouwen,

Uf der heide rosenrot,

Die der meige uns kan bringen —

Da mag man den rifen schouwen.

Doch klage ich ein ander not

Von der minnenklichen, suͤssen,

Dú mich lieplich solde gruͤssen.

Minne, das solt du mir buͤssen,

Sit ich mich der lieben ie ze dienste bot.[10]

Sit min sendes herze weinet

Nach der lieben, die ich da meine,

We, warumbe tůt es das,

Und ir herze ist unvereinet,

Das es nach dem min niht weine?

Minne, sich, das ist din has,

Den ich sender, siecher dulde

Gar an alle mine schulde.

Minne, hilf mir umb ir hulde,

Das si mich nach wibes guͤte troͤste bas.

Solde ich si vil minneklichen

Sehen, als ichs zeinen male

Sach, so wer min froͤide gros,

Und were in seldenrichen

Wan. Das mich ir minne strale[11]

In das sende herze schos:

Das din unverheilet wunde.

Ob ir trost mir die verbunde

Mit ir rosenvarwen munde,

Wer were an froͤiden danne min genos?

Ich wene, nieman kunne erdenken

Was man wunne bi den wiben

Vindet; si gent hohen můt.

Swer den sorgen welle entwenken[12]

Der sol stete an in beliben,

Wan si sint fúr truren gůt.

Swem si lieplich blikent tougen

In diu herzen mit den ougen,

Das weis ich wol, sunder lougen,

Das es von gemůten wiben sanfte tůt.

Ich han minnenklich gesungen

Der vil lieben und der Minne,

Doch lat si mich trurig stan.

So ist mir senden niht gelungen

An mines herzen kúniginne,

Davon wil ich singen lan,

Und wil mich nu von ir scheiden.[13]

Got der gebe gelúke uns beiden!

Wer aber ich ein wilder heiden,

Miner trúwe solt ich bas genossen han.

X.

Sich hat

Aber dú suͤssú zit verkeret![14]

Schouwent an dú wunnenklichen heide,

Die mit manigen blůmen stůnt beschoͤnet!

Kleiner vogellin truren aber meret,

Dien der kalte winter tůt so leide;

So ist der walt mit sange niht bedoͤnet.

Also můs ouch mir min froͤide entwichen,

Das mir nie von der vil minnenklichen

Kunde werden miner swere rat.

Wie kan

Iemer ieman sanfter werden,

Danne der lieb dur rehte liebe minnet,

Und im lieb in liebe froͤide meret?

Der hat himelriche hie uf erden,

Ob er sich gegen liebe wol versinnet,

Und in lieb in liebe liebe leret.

Minne kan sich liebe dur liebe lieben;

Das tůt si niht, wan eht Minne dieben.

Rehte liebe ist valscher liebe gran.

Es tůt

Sanfte ein lieblich umbevahen

Zwein gelieben, sit dú naht so langet.

Lieplich smuken nach der liebe willen —

Solt ichs tůn, ich seite wol wie nahen,

Sit das lieb bi liebe niht belanget

Lieb kan ........

Mangelt ein gantz Folienblatt, welches ausgeschnitten worden.[15]

XI.

Beschiht des niht, so můs ich eine

Sterben in vil kurzer vrist,

Sit du bist

Dú suͤsse reine,

Dú mir froͤide geben sol.

Hilfa, helferiches wib,

E das mir der lib

Verderbe! Suͤssú frouwe, so tůst du wol.

XII.

Was vervahet

Mich des wunnenklichen meigen zit,

Der uns nahet,

Und manigen herzen froͤide git?

Blůmen und vogelsank,

Der beider

Trost ist, leider!

Minen froͤiden alze krank.

Min gemuͤte

Hat betwungen ir vil suͤsser lip.

So mit guͤte,

So mit schoͤne, wart nie besser wip,

Als mir min herze seit.

Das wunder

Hat besunder

Got mit flisse an si geleit.

Ja verkeret

Mir ein wip die besten froͤide min.

Der ich geeret,

Von ir reinen tugenden, solde sin,

Dú hat so betwungen mir

Die sinne

Mit ir minne,

Das ich truren můs nach ir.

Ich wil singen

Gegen dem meigen minneklichen sang.

Swere ringen

Kan si, nach der min herz ie rang.

Troste mich dú frouwe min,

Dú gůte,

Wolgemůte,

Seht! so wolt ich froͤlich sin.

Mit ir gruͤsse

Mehte si mir wenden sweren pin;

Der so suͤsse

Froͤite mir das sende herze min.

Roͤselechter roter munt,

Scheit den strit,

Und hilf enzit

Mir! so bin ich wol gesunt.

XIII.

Selig, selig si dú wunne!

Selig si des wunnebernden meigen zit!

Selig si der vogel singen!

Selig si dú ouwe! selig si der walt!

Man siht blůmen manigvalt

Durh das gruͤne gras ufdringen,

Mer danne ich erdenken kunne.

Tanzen, springen

Suln die jungen wider strit.

Nieman, nieman kan erdenken

Was fúr seneliches truren besser si,

Danne ein kus von rotem munde

Und darzů ein minneklicher umbevank.

Da wirt sendes truren krank,

Es froͤit uf von herzen grunde.

Ermel flechten, bein verschrenken —

In der stunde

Wirt dú liebe sorgen fri.

Wafen! wafen úber die Minne!

Wafen wil ich úber si schrien iemer me.

Ich was ir daher gebunden,

Nu lat si mich trurekliche vor ir gan.

Si hat úbel an mir getan.

Si můs einem andern wunden

Herze, můt und al die sinne.

Wol befunden

Habe ich, das si tůt so we.

Frouwe, frouwe, selig frouwe,

Herzen trut, ir sint mir liep fúr ellú wib,

Der ich selten han genossen,

Davon ich niht mere fúrbas singen wil;

Es dúhte úch vil gar ein spil.

Iu hat dike min verdrossen,

Des ich mich vil trurig schouwe;

Vor beslossen

Ist mir froͤide und iuwer lip.

Wol dir! Wol dir, wibes guͤte!

Wol dir! das du selig iemer muͤssest sin!

Wol dir! du kanst truren swachen,

Swa dú Minne ein sendes herze hat verwunt.

Din vil rosevarwer munt,

So der lieplich wolde lachen,

San der rose in touwes blůte!

Froͤide machen

Kan din spilnder ougenschin.

XIIII.

Schouwent uf den anger!

Winter wert niht langer,

Kleine vogel twang er;

Dú heide ist worden swanger,

Si birt uns rosen rot;

Man horet vogel singen,

Man siht blůmen entspringen,

Dur das gras ufdringen,

Ir swere wil sich ringen,

Als in dú zit gebot.

Alsus enpfahen wir den suͤssen meigen.

Wol uf, ir húbeschen leigen!

Wir suln die froͤide heigen,

Vil froͤlich tanzen, reigen.

Ahi, solt ich mich zweigen

Mit ir,

Dú mir

Mag wenden sende not!

Lat mir sorge swinden,

Lat mich froͤide vinden,

Lat den chrieg erwinden.

Ir sult úch underwinden

Mis herzen, selig wip!

Frouwe, ir sult mir meren

Froͤide, leit verkeren,

Hohgemuͤte leren.

Minne, bit die heren,

Das mich ir kúscher lip

Troͤste: nu ist si doch min kúniginne!

Vil minnenklichú Minne,

Troͤste mine sinne,

Sit ich nach liebe brinne!

Ob ich den trost gewinne,

Der tag

Mir mag

Wol heissen leit vertrip.

Wer kan truren swachen?

Wer kan froͤide machen

Mit viel lieben sachen?

Wer kan lieplich lachen?

Ir mundes roter schin.

Wer kan truren wenden?

Wer kan sorge swenden,

Sende not vol enden?

Wer kan helfe senden?

Dú vil liebe frouwe min.

Dú mich hat von kinde her gebunden,

Si kan min herze wunden.

Das hab ich wol befunden,

Das ich bin úberwunden

Nu und zallen stunden.

Si sol

Mir wol

Dur reht genedig sin.

Wer kan lit vertriben?

Wer kan fro beliben?

Nieman, wan bi wiben.

Des wol ir suͤssen liben!

Si sint fúr truren gůt.

Als des meigen bluͤte

Froͤit ir wiblich guͤte;

Si gent hohgemuͤte.

Das got ir lip behuͤte!

Doch mir einú tůt

Selten liep, die ich mit truͤwen meine,

Dú suͤsse und dú vil reine,

Der helfe ist gegen mir cleine;

Der ich von kindesbeine

Gedienet han alleine,

Das sie

Noch nie

Getroste mir den můt!

Ach, wan solt ich schouwen

Liep mins herzen frouwen!

In den grúnen ouwen,

In lúft und ouch in touwen,

Wart liebers nie gesehen,

Das so lieblich were,

Gůt fúr sende swere,

Sam dú seldebere.

Wie wol ich das bewere,

Kunde ich ze rehte spehen

Ir munt, ir kel unde ouch ir wangen;

Dú hant mich gevangen.

Nach ir můs mich belangen;

Het ich den trost enpfangen,

So wer min leit zergangen.

Ich han

Noch wan,

Das mir wil liep beschehen.

XV.

Nu schouwent, wie dú heide

Mit liehter ougenweide

Sint verdorben, und der cleinen voglin sank.

Das schaffent kalde winde.

Der walt und ouch die linde,

Die sint nu beide ir gruͤnen loubes aber worden krank.

Jarlank

Tete sanfte ein umbevahen,

Ein lieplich druken, nahen.

Ich han gedingen, das mir werde ein suͤsser umbevank.

Swies mir so wol ergienge,

Das si mich umbevienge,

So muͤst ich von den suͤssen froͤiden sende sorge lan.

Ob ich den trost da funde,

Davon min leit verswunde;

So wolde ich us herzeleide in herzeliebi gan.

Ich han

Trost, das mich ir wiplich guͤte

Vor sender not behuͤte.

Sus segen ich mich des morgens mit ir, so ich wil ufstan.

Ein kuss von roten munde,

Der von des herzen grunde

Von zwein gelieben gienge, das tete innekliche wol.

Swa Minne ir liebi wege

Gelich, und das si pflege

Froͤide, davon wurden sendú herzen froͤiden vol.

Mir sol

Liep ein lieplich ende machen

(Davon zwei herzen erlachen,

Der lieben mir, das min ir), sit ich senden kumber dol.

Do ich die reinen gůten,

Die suͤssen, wol gemůten

Von erst ansach, darnach do wart min herze sorgen bar;

Do hat ich den gedingen,

Das si mich wolde dringen

Hin an der froͤide stat. Das hat sie mich enterbet gar.

Nim war,

Frouwe Minne, wie ichs meine,[16]

Das si so rehte kleine

Mich senden troͤstet, und ich doch mit trúwen diene dar.

O we, sol ich verderben,

Und in der sorge ersterben,

Frouwe Minne, und ir, vil selig wib, wie stat iu beiden das?

Vil minneklichú Minne,

Sprich, das min kúniginne,

Durch wibes guͤte, sich gegen mir ein teil bedenke bas.

Nu was

Toug mir gar ze langes biten?

Es wer wol in den ziten,

Das si mir solde lonen! — Minne treit den alten has.

XVI.

Ich hore aber die vogel singen,

In dem walde suͤsse erklingen;

Dringen

Siht man bluͤmen durh das gras.

Was

Dú sumer wunne in leide;

Nu hat aber dú liebe heide

Beide

Blůmen und rosen rot.

Meige kumt mit maniger blůt.

Tůt

Mir wol dú minnenkliche,

Seht, so wirde ich froͤideriche,

Sunder not, vil maniger sorgen fri.

Gunde mir dú seldebere,

Das ir trost mir froͤide bere;

Swere

Wolde ich sender lan.

Han

Ich trost, der ist doch cleine,

Sin entroͤste mich alleine.

Reine,

Selig wib, nu troͤstet bas!

Minne, hilf! es ist an der zit.

Sit

Min trost lit an der suͤssen,

So mag si mir swere buͤssen.

Nu durh was tůt si mir alse we?

Ob ir roter munt mir gunde,

Das ein kus die not enbunde:

Wunde

Von der Minne wurde heil;

Heil,

Gelúke, selde und ere

Het ich sender iemer mere.

Here,

Selig wib, nu troͤstent bas!

O we suͤsser, roter munt,

Wunt

Wart ich von dinen schulden,

Do ich der lieben muͤste hulden.

Das sint leit, dú mich noch machent gra.

Wunder kanst du, suͤssú Minne!

Minne, in diner glůt ich brinne;

Sinne,

Herze, můt hast du mir hin.

In

Min herze, sunder lougen,

Sach ein wib mit spilnden ougen,

Tougen:

Dannoch was ich vil gemeit.

Herzen trut, nu tůt so wol!

Sol

Ich sender fro beliben,

So sult ir von mir vertriben,[17]

Selig wib, die not, so wirde ich fro.

Wie zimt nu der suͤssen heren,

Das si mich kan truren leren?

Meren

Moͤhte si wol froͤide mir.

Ir

Vil minnekliches lachen

Kan mir sendes truren swachen;

Machen

Moͤhte si mich sorgen bar.

Owe suͤsser, roter munt!

Wunt

Bin ich an hohgemuͤte.

Roter munt, durh dine guͤte,

Nu sprich dar! du weist wol mine bette.

XVII.

Sumer, uns hat din schoͤne

Blůmen braht und vogel doͤne.

Walt, anger, heid in gruͤne stat;

Die hast du braht us noͤten.

Nu wil mich min frouwe toͤten,

Dú mich ane trost in sorgen lat.

Mich hat bevangen minnekliche ir lib.

Mit lieben dingen

Kan si twingen.

Hilf, troͤsterinne, selig wib!

Solde ich ein wib umbevahen

Liplich, ich weis wol wie nahen,

Mehte es so minneklich geschehen,

Das mich ir trost enpfienge,

Trut min liep, und das ergienge;

Man muͤste mich iemer froͤlich sehen.

Nu vinde ich niht, wan haslich versagen.

Mir benimt ir minne

Froͤide und sinne,

Des můs ich senden kumber tragen.

Wib und wibes guͤte

Sendent werendes hohgemuͤte.

Wib kunnen froͤiden wunder geben,

Wib kunnen froͤide machen.

Wib kunnen frúnde frúntlich lachen,

Wib liebent manne lip und leben.

Wib, was din trúwe wirde und ere git!

Wib, du kanst wenden

Leit, liep senden.

Was an wiben froͤide lit!

XVIII.[18]

We dir, winter ungehúre!

We dir! das du sist verteilet!

Heide und ouwe ist blůmen bar.

Swas mit froͤiden stunt noch húre,

Das hast du vil gar zerteilet.

Swas der suͤsse meige bar,

Das ist alles hingeleit

Von den suren, kalden winden.

Du wilt an uns niht erwinden:

Das dien kleinen vogellin leit!

We, der nahegender swere!

Wenne wil si mir die ringen,

Der min herze unsanfte enbirt?

Si sint mir ein teil ze swere.

In den sorgen můs ich ringen.

Ob si dan niht froͤide birt

Mir vil sendelosen man,

So verdirbe ich an dem libe.

Ist das ich niht fro belibe,

Ratent, ob ich fúrbas man.

Minne, heile minne wunden,

Die ich dulde zallen malen.

Wiltu, das ich sorge enber,

Sit du dichs hast underwunden;

Bit ir lib, den lieht gemalen,

Das er mir noh froͤide ber,

Sit er sich min underwant.

Frouwe, suͤsse, seldebere,

Iwer lon ist mir gebere,

So ist ouch min dienest zú gewant.

Si mag mir wol helfe senden,

Sit ich lebe in maniger sende;

So ist min weg hin zir gebant.

Si mag troͤsten mich vil senden,

Sit ich ir min herze sende,

Das dú suͤsse Minne ie bant.

Seht, so wurde ich noch gemeit,

Were, das ich si umbevienge,

Und das sis fúr gůt enpfienge,

Dú durh kúsche unkúsche ie meit.

Si mag sich des wol vermessen,

Das so schoͤne creatúre

Nie wart bi maniger zit geborn.

Man sol si niht zů den messen,

Den dú selbe schoͤne ist túre.

Alle untugende hat si verborn,

Si hat selde, si hat heil.

Hei, gewunne ich noch die kúnde,[19]

Das ich si erwerben kúnde,

Seht, so were min wunde heil.

XIX.

Merkent wunder u. w. Zwey Strophen.

(S. Samml. von Minnesing. Th. I. S. 23.)

XX.

Seht an die heide!

Seht an den gruͤnen walt!

Liehter ougenweide,

Der hant si gewalt,

Blůmen, loup, dú beide:

Mit manigem huͤbschen kleide

So sint si bekleit.

Dien tet vil leide

Der lange winter kalt;

Balde hinnen scheide

Sin twingen manigvalt!

Valwe loͤke, reide

Tragent junge, stolze meide;

Des sint si gemeit.

Var hin verwassen,

Vil gar verteilter sne!

Du můst uns aber lassen

Die blůmen und den kle

Uf des meigen strassen;

Dien tete du vil we.

Da die vogel sassen,

Ir sang gegen sange massen,

Die froͤiwent sich als e.

Mich wil betwingen,

Das mich durch lieb ie twang,

Das ich nu můs ringen,

Darnach min herz ie rank.

Ich wil aber singen

Der lieben uf gedingen;

Min trost an ir lit.

La mir gelingen,

Sit das mir nie gelang,

Minne, an lieben dingen;

So wirt min truren krank.

Si kan swere ringen,

Die sorge us herzen dringen;

Mir were lones zit.

Kus von ir munde,

Ich wene, er sanfte tůt;

Der ist zaller stunde

Noch roter danne ein blůt.

Eya, minne wunde!

Du machest ungemůt;

Ob din trost mir gunde,

Das mir ein kus die bunde,

So dúhte si mich gůt.

Mich hat gebunden

Der suͤssen Minne bant.

Minnekliches wunden,

Nach dir min herze ie swant.

Si hat niht erwunden,

Sich habe min underwunden

Ir munt rosen rot.

Minne und ir chunden

Die sint mir wol erkant.

Hette ich helfe funden,

So wer min dienst bewant.

Nu hat si mich funden

In truren zallen stunden,

Davon lide ich not.

Mich hat verseret

Ir liehter ougen schin.

Wer hat geleret

Die lieben frouwen min,

Das ir guͤte meret

Mir lange wernden pin?

Minne, swer dich eret,

Des můt wirt gar verkeret;

Nu bin ich doch din.

O we der swere,

Die ich von Minnen han!

Der ich sanfte enbere,

Wand ein vil lieber wan,

Der ist froͤidebere.

Dabi ist mir gevere

Dú Minne und ir has;

Si ist mir ze swere,

Davon ich trurig gan.

Ob ich sinnig were,

Des solt ich mich erlan.

Minneclichú mere,

Mir bernde froͤide bere.

Nu troͤste mich bas,

Lieblichú Minne!

Min sendes herze ist wunt,

Sit das ich brinne

Nach liebe zaller stunt.

Sorgen troͤsterinne,

Dir ist min iamer kunt;

Troͤste mine sinne,

Das ich den kus gewinne!

Sprich ja, roter munt!

(Die erste Strophe dieses Liedes steht in der Samml. von Minnesingern, Th. I. S. 23.)

XXI.

Lob von mangen zungen

Wart dem meigen húre gesungen

Von den voglin dur den gruͤnen walt:

Die hat nu betwungen

Und jemerlich verdrungen

Rife, sne, darzů der winter kalt;

Des vil manig herze truric stat.

Darzů truret ouch das mine

Nach dem froͤidebernden schine,

Der von ir vil rotem munde gat.

Mir was froͤide entsprungen;

Leider, nu ist mir niht gelungen

An der lieben, dú min hat gewalt.

Wer min sank erklungen

Ir, so muͤste ich wider jungen;

Sust bin ich in sorgen worden alt.

Frouwe Minne, gib mir dinen rat,

Alder ich lebe in sendem pine!

Frouwe, uf die gnade dine

Diene ich dir, swies mir darumbe ergat.

Ich han mine stunde

Vil gerungen nach dem munde,

Der so lieplich ist, durlúhtig rot.

Das mir nie enkunde

Werden heil mis herzen wunde,

Davon lide ich sender sende not.

Minne, sich, du last mich trurig gan.

Trost, der selden úbergulde,

Frouwe, gent mir iwer hulde;

Wan es můs doch an iu eine stan.

Ob ir trost mir gunde,

Das ein kus die not enbunde,

Die dú herze liebú mir gebot,

Und sich underwunde

Lieb, und daran niht erwunde;

So geschiede ich noch von sender not,

Die ich von der herzelieben han,

Gar ane alle mine schulde.

Frouwe, sende not ich dulde.

Nu, dur Got, was han ich iu getan?

(Die erste Strophe dieses Liedes steht in der Samml. von Minnesing. Th. I. S. 23., wo aber das letzte Wort der ersten Zeile ausgefallen ist.)

XXII.

We, was wunders lit an wiben,

Sit ir guͤte kan vertriben

Sendem herzen sende not!

Der in lieplich siht in ougen,

Mit gewalte und dabi tougen,

Dem ist al sin truren tot.

Ist im rehtú liebi bi,

So ist beiden danne wol;

Minne tůt si sorgen fri,

Si striket beidiu herzen in ein, und wendet kumberliche dol.

Wib, din minnenklich gebaren

Kan der senden herzen varen.

Wip, du bist ein suͤzer name;

Wib, du kanst wol froͤide meren;

Wib, du kanst wol froͤide leren,

Dir ist wiplich ere zame.

Wib, du gist ouch hohen můt;

Wib, du gist ouch froͤiden vil;

Wib, du bist fúr truren gůt:

Des můs ich iemer selig sin, du bist der welte wunne spil.

Heide und ouwe stůnt mit bluͤte

Gegen des suͤssen meigen guͤte;

Die sint beide worden val.

Darzů wil der winter twingen

Cleiner vogelin suͤsses singen,

Das si swigent úberal.

Das solt ich von schulden klagen;

So klage ich ein ander not.

Solt aber ichs der lieben sagen,

Mich iamert nach ir minne me, danne nach den liehten rosen rot.

Suͤsse Minne, mine sinne

Jamert nach der lieben minne.

Minne, hilf! est an der zit.

Minne, du kanst truren swenden,

Hohgemuͤte in herze senden;

Minne, din gewalt is wit.

Minne, ich bin dir undertan;

Minne, wis gewaltig min!

O we Minne! solt ich han

Ir minneklichen wibes lip, so were min truren gar dahin.

XXIII.

Nu siht man aber die heide val;

Nu siht man valwen gruͤnen walt;

Nu hoͤrt man niht der kleinen voglin singen,

Die sint geswigen úberal;

Ir stimme diu was manigvalt.

Die nahtegal die wil der winter twingen.

Der not klage ich, und dabi mine swere,

Die mir dú herzeliebe tůt;

Davon so bin ich ungemůt.

Nu ist si doch gůt

Dú liebe, unwandelbere!

Wa wart ie herzen me so wol,

Dan da zwei sendú herzen sint

Einmuͤtig, nach der suͤssen Minne willen?

Sie sint so tougen froͤiden vol,

Doch machet si dú Minne blint;

Si kan in beiden herzeleit wol stillen.

So froͤiwent sich besamen und niht besunder.

Swa herzeliep bi liebe lit,

Das wunnebernde froͤide git:

Dast ane strit;

Da tůt diu Minne ein wunder.

Sit das dú Minne wunder kan,

Warumbe tůt si wunder niht

An mir, und an der minneklichen suͤssen?

Nu bin ich doch ir dienestman.

Swie man mich in dien sorgen siht,

Das mag dú minnekliche mir wol buͤssen.

Vil herú Minne, twing die froͤidenriche,

Das si mir ir hulde gebe

. . . . . . . .[20]

Die wile ich lebe,

Ich diene ir eigenliche.

Wa wart ie múndelin so rot?

Wa wart ie bas gestalter lip?[21]

Wa wurden ie so froͤlichstendú ougen?

Dú mich hant braht in grosse not.

Genade, minnekliches wib!

Ach hette ich úwer suͤsse minne tougen!

Nu wissent, das ich gerne bi úch were.

Genade, rosevarwer munt!

Wan machest du mich niht gesunt?

Sprich zeiner stunt:

Ich wil dir buͤssen swere.

Nu lache, das ich fro beste!

Nu lache, das mir werde wol!

Vil roter munt, nu lache lacheliche!

Nu lache, das min leit zerge,

So wirde ich, sender, froͤiden vol.

Nu lache, das mir ungemuͤte entwiche!

Nu lache, das min sendú sorge swinde!

Nu lache mich ein wenig an,

Sit ich dir niht entwenchen kan,

Ich sender man,

Sit ich dich lieblich vinde.

Einmuͤtig, dast ein lieplich wort;

Einmuͤtig, das der minne gir;

Einmuͤtig, sendú herzen froͤide leret;

Einmuͤtig, das der liebe ein hort,

Swie doch dú minnekliche mir

Mit wibes guͤte selten froͤide meret.

Einmuͤtig, mange suͤsse fruͤde machet;

Einmuͤtig, froͤit ze maniger stunt.

Einmuͤtig, dast ein lieplich funt,

Swa roter munt

Gegen liebe lieplich lachet.

XXIIII.

Willekomen si uns der meige,

Der uns bringet mangerhande blůt,

Blůmen unde manigerleige,

Das dien kleinen vogelin sanfte tůt!

Doch můs ich verderben in den wunnen gar,

Es enwende ir munt, vil innenklichen rosevar.

Wibes ougenblike in guͤte

Siht vil dike in sendes herzen tor.

Swie dú here min gemuͤte

Also selten zuket hoh enbor,

Doch hab ich gedinge, das ich noh gelebe,

Das mir dú vil minnekliche ein froͤideriches ende gebe.

Wil si minen kumber wenden,

So bin ich an froͤiden wol gesunt,

Und ir guͤtlich helfe senden,

So das ir vil rosevarwer munt

Spreche ein wort, davon ich iemer fro beste:

Tůt si des niht, dú vil reine, seht, so ist mir iemer we.

Swas ich kumbers unde swere

Liden můs, des mag wol werden rat,

Swie si wil dú seldenbere,

Dú min sendes herze bi ir hat.

Si kan tehsen, swingen, beide als si sol;

Solde ich si underwilent schouwen, wie were mir so wol!

XXV.

O we liehten tage!

O we blůmen rot!

O we vogel sank!

O we gruͤner walt!

Nu wirt aber kalt,

Nu der winter lank:

Das ist der vogel not,

Und ir meistú klage.

Noch clage ich die schulde,

Das Dú seldenbere

Enterbet mich ir hulde;

Das sint mine swere,

Die ich von ir dulde.

Minne, wende ir suͤssen has!

Minne, frouwe min,

Tů mir helfe kunt!

Hilfe an der zit!

Bit das reine wib,

Das ir kúscher lib

Gegen mir lasse den strit,

Und ir roter munt

Mir tů helfe schin.

Seht, so wolde ich singen

Der Vil reinen suͤssen,

Dú kan swere ringen.

Kan si dabi kumber buͤssen,

Sol mir wol gelingen.

Minne, sich, des bist du wer.

Wip, din suͤsser nam

Und din werdekeit

Git vil hohen můt,

Dem der tugende hat,

Der untugende lat.

Wie wol das tůt,

Der wirt tugende bereit

Und dú rehtú scham.

Reiner wibes guͤte

Kan Wol froͤide leren,

(Si git hoh gemuͤte)

Dabi froͤide meren.

Got si mir behuͤte,

Die, der ich wol gůtes gan!

Mich hat lieber wan

In die froͤide braht,

Das ich wande sin

Von den armen gar.

Nu wirt ich gewar

An der vrouwen min,

Ir ist ungedaht,

Si wil lones lan

Mich in senden sorgen.

Mir Ist we ze můte,

Iemer an dem morgen

So sorge ich nah gůte.

Ich můs minne borgen;

Vrouwe min, wie stet das dir?

XXVI.

Nu ist dú heide wol bekleidet

Mit wunnenklichen kleiden,

Rosen sint ir besten kleid;

Davon ir vil sorgen leidet,

Wan si was in mangen leiden;

Gar verswunden ist ir leid

Von des liehten meigen bluͤte,

Der hat mangerhande blůt:

Noch froͤit bas der wibe guͤte,

Wan die sint fúr sendú leit so gůt.

Swas ich je gesank von wiben,

Das beschah von einem wibe,

Dú ist mir lieb fúr ellú wib;

Von ir mag ich fro beliben.

Wil si, das ich fro belibe,

Das si spreche: fro belib!

So wolde ich in froͤiden singen,

Als ich her in froͤiden sank.

Si mag mir wol swere ringen,

Nach der ie min sendes herze rank.

Suͤsse Minne, maht du binden

Die, von der ich bin gebunden,

Dú min sendes herze bant.

Lat si mich genade vinden,

Die ich doch han selten funden,

Sit ich si in dem herzen vant.

Alse rehte minnenklichen;

Si ist so rehte minnenklich!

Ich wil si darzů gelichen:

Si ist den lieben wiben gar gelich.

XXVII.

Ich wolde niht erwinden u. w. Vier Strophen.

(S. Samml. von Minnesing. Th. I. S. 23.)

XXVIII.

Wol den wolgemůten wiben!

Wol dien mannen, die durh wip sint hohgemůt!

Sit ir guͤte kan vertriben

Sende not, des mir dú here niht entůt.

Nu ist sis doch dú liebe alleine,

Die ich vor allen wiben meine.

Frouwe, selig frouwe, reine,

Troͤstent mich! nu sint ir doch so gůt!

Solde ich davon froeide lassen,

Sit dú welt an froͤiden wil zergan?

Nein, ich wil mich sorgen massen,

Dur dú lieben, der ich her gedienet han.

Si hat so manges wibes guͤte,

Si ist gelich des meigen bluͤte,

Swie dú here min gemuͤte

Lat so lange in senden sorgen stan.

Willekom si uns dú wunne,[22]

Die der meige bringet, und dú schone zit,

Bas danne ich erdenken kunne.

Schouwent, wie der walt und ouch dú heide lit[23]

Mit so mangen blůmen schoͤne;

Da horte ich der vogel doͤne:

Darumb ich den meigen kroͤne,

Sit sin kunft der welte froͤide git.

XXIX.

Was froͤit mich der vogelin guͤte

Und des wunnenklichen meigen schin?

Sol min froͤiderich gemuͤte

Und min spilndes herze erwendet sin,

Das tet mir ein wib mit guͤte.

Das got noch ir eren huͤte,

Swie si mir nu treit vil senden pin!

Swa mitte ich verdienen kunde

Der vil schonen hulde, das tete ich,

Sit das mines herzen wunde

Unverheilet stent, si heile mich.

Davon mich ein wort enbunde,

Ob si spreche us rotem munde:

Trut geselle, es ist zit lones wider dich.

Mir mag sorge us herzen dringen,

Roter munt, din minnenklicher grůs.

Lat din lachen mir gelingen

An ir minne, so ist mir swere bůs.

Ir vil minnekliches twingen

An die brust, das mag mich bringen

An die stat, da minne mich froͤwen můs.

Wer kan truren bas verswenden,

Danne ein reine minnekliches wib?

Trost von wiben der kan wenden

Sende sorge; kúscher wibes lip

Der mag mir wol helfe senden.

So nige ich den lieben henden:

Wib, min froͤide von der sorge trip!

Kan mich ieman fro gemachen?

Ja, der lieben munt durlúhtig rot.

So můs al min truren swachen,

Scheidet mich ir trost von sender not.

Man siht mich vil froͤlich lachen,[24]

Das min herze můs erkrachen,

Machet mich dú liebe in froͤiden rot.

XXX.

Rife und anehank

Hat die heide betwungen,

Das ir liehter schin

Ist nach iamer gestalt;

Und der vogel sang,

Die mit froͤiden wol sungen,

Die sint nu geswin;

Darzů klage ich den walt,

Der ist umbekleit.

Dannoch kan si fuͤgen

.. herzeleit,[25]

Dú das wasser in kruͤgen

Von dem brunnen treit: nach der stet min gedank.

Ich brach ir den krug,

Do si gieng von dem brunnen.

Ich wart froͤidenriche,

Do ich die lieben sach;

Do si das vertrug,

Mir was sorge zerrunnen.

Harte minnenkliche

Dú liebe do sprach:

‚Ich han erebeit,

Das ist von iweren schulden;

Min frouwe tůt mir leit,

Das ich alles můs dulden,

Dú mich gester fúnf stunt dur úwern willen slůg.‘

Nu tů den willen min,

So hilfe ich dir us noͤten,

Und far sant mir hinne,

So bist du ane zorn.

‚Des enmag niht sin!

E liesse ich mich ertoͤten.

Miner frouwen minne

Were iemer me verlorn.

Einen schillig sol

Si mir und ein hemede;

Das weis ich vil wol,

Das were alles mir fremede.

So mir das nu wirt, so tůn ich iu helfe schin.‘

XXXI.

O we, winter, das din kraft

An uns ist so sigehaft!

O we kleiner vogilline singen!

O we liehten blůmen rot,

Dien der meige das gebot,

Das si dur das gras uf muͤsten dringen!

Nu ist der walt sis gruͤnen loubes ane.

Wafena!

Ja ist mir da

Dike we, und anders wa:

Das tůt mir dú liebe wol getane.

Es ist nu vil manig jar,

Das ir liehten oůgen clar

In min herze lieplich blihten tougen,

Und ir rosevarwer munt

Gegen mir tet sin lachen kunt,

Darus spilten ir wol liehten ougen.[26]

Seht, do wart ich siech von minne wunden

(Wafena!

Dest mir da

Dike we, und anderswa),

Die stant noch von der lieben unverbunden.

XXXII.

Sumer, nu wil din

Gewalt

Walt,

Den anger und die heide,

Beide

Kleiden: dast dien kleinen vogelin not.

Man siht blůmen manigvalt

Valt

An maniger stolzen meide;

Reide

Loke tragentz und múndel rot.

Seht, der froͤide was vil nach zergangen.

Ach mis herzen! ja můs mich belangen

Nach dem trútelehten libe: o we, wan wer er min!

Wil si, das mich leit

Verber,

Ber

Mir froeide von ir munde:

Wunde

Von der minne wirt vil schiere heil.

Das ir guͤte mich gewer!

Wer

Ist, der mir des verbunde?

Kunde

Ich flůchen, dem wúnschte ich, das im unheil

Were bi vil lange untz an sin ende.

Suͤssú Minne, suͤsse helfe sende!

Des ist not, sit ich von dinen schulden sorge ie leit.

Ach wie ist sogar

Liep gůt!

Gůt

Neme ich niht fúr die ich meine.

Si eine

Troͤste mich; das ist der Minne has.

Ir munt, roter danne ein blůt!

Blůt

Des meigen froͤit mich kleine.

Reine,

Selig wib, nu troͤstent bas!

Beschiht das niht, so můs ich gar verderben.[27]

Sol ich niht den roten kus erwerben

Und den trútelechten lip, so wirde ich froͤiden bar.

Ratent, wie ich das

Ervar.

Var

Ich umbe in allem lande?

Rande

Ich tusent mile, es wer bewendet wol,

Wie ich des geneme war,

War

Ich kerte us minne bande.

Brande

Si mich niht, so hete ich senften dol.

Sus hat mich dú minnekliche entzúndet;

Ich enweis, wes si sich an mir súndet.

Laschte si mich mit ir minne, mir wurde deste bas.

Minne, ich diene dir;

Du solt

Solt

Mir geben, minneklichen.

Richen

Macht du mich an froͤiden, das ist zit.

Ob mir das din helfe erholt;

Holt

Bin ich dir inneklichen,

Wichen

Můs von mir leit, das mir nahe lit.

Minneklichú minne, ich war gebunden

Dir von kinden ie; wiltu mich nu wunden,

Was tougt danne stetú trúwe? Minne, das verbir.

XXXIII.

Nu klage ich der kleinen vogellin swere;

Nu klage ich, dú heide ist blůmen lere;

So klage ich, das mir dú wunnekliche, seldebere

Hat beroubet mich der froͤiden sinne.

Sich, da bist du schuldig an, trut Minne!

Sit du weist, das ich so gar in deiner glůte brinne.

Das mag mir din trútelehter lip mit liebe buͤssen,

Und ir roter mund, der sol mich gruͤssen:

Tůnt dú zwei des niht, so klage ichs doch der reinen suͤssen.

Si mag mir wol minen kumber wenden

Und ir minnekliche helfe senden.

O we Minne, wenne wilt du troͤsten mich vil senden?

Wenne wilt du mir min truren swachen?

Wenne wiltu suͤsse froͤide machen,

Also, das ir roter mund mir lieplich wolte lachen?

Trútelechter lip, du, la mich liebe froͤide vinden!

Du macht mich von sender not enbinden;

Wilt du, herzen trut, so mag mir sendes leit verswinden.

Nu was hilfet, swas ich clage der heren?

Si wil mir enheine froͤide meren.

Suͤsse minne, maht du doch die minneklichen leren,

Das si fuͤge, das mir leit entwiche,

Sih, so wirde ich noch an froͤiden riche.

Tůt si das, so wirde ich fro, dú suͤsse minnekliche,

Also das mir wurde ein grůs von ir vil rotem munde,

Und ir kus mis herzen not enbunde:

Do ich si von erst ansach, das was ein suͤssú stunde.

XXXIIII.

Nu siht man dú heide breit

Wol beschoͤnet

Mit den liehten bluomen manigvalt;

Meige hat sich zin gekleit;

Wol bedoͤnet

Mit den vogelin stet der gruͤne walt;

In den ouwen

Mag man schouwen

Rosen rot:

Ach dur got! so lide ich aber seneliche not.

Ich sach einen roten munt

Lieplich lachen

Gegen mir senden, des ist niht ze lang;

Davon wart mir froͤide kunt.

Truren swachen

Kan si, do das in min herze drang.

Ich můs singen;

Des wil twingen

Mich ein wib,

Und der kúnig darzů, ir trútelehter loser lip.

O we roͤselehter grůs,

Wie du lachest,

So du herzeliebe lachen wilt!

Da wirt sender sorgen bůs,

So du machest,

Das dú liebe gegen der liebe spilt

Nach gewinne;

Da ist eht Minne

Nahe bi,

Und machet zwei geliebe herzen swere fri.

Herzen trut, min kúnigin,

Lat erwinden

Gegen mir noch den senelichen strit,

Sit ich úwer eigen bin.

Froͤide vinden

Wolt ich, frouwe, das wer an der zit.

Umbevahen,

Lieplich nahen,

Das tůt wol,

Und naher bas, ob ichs mit hulden sprechen sol.

Was ich her gesungen han,

Das vervahet

Mich vil kleine: dast mis herzen clage;

Davon můs ich singen lan.

Si versmahet,

Das min herze si in liebe trage.

Ja si denket

(Das mich krenket

Vil der tage),

Das ich ir niht gedienen múge: das ist mis herzen klage.

XXXV.

Sumer, din gewalt wil swinden;

Das mag man an der linden

Kiesen, dú ist worden val;

Uf dem walde und in den ouwen

Da mag man die rifen schouwen;

Darzů lat dú nahtegal

Ir vil froͤideriches singen,

Des wil si der winter twingen:

So kan mir dú suͤsse bringen

Sorgen vil dem herzen min.

Frouwe, ir sit min frouwe alleine,

Die ich vor allen wiben meine;

Des sult ir geniessen lan

Mich. Ich lebe in senden sorgen

Beide abent und den morgen.

Doch froͤit mich ein lieber wan

Und ein minneklich gedinge,

Das dú sússe Minne twinge,

So das mir an ú gelinge:

Daran alle min froͤide lit.

XXXVI.

Was der winter sorgen bringe

Dien vil liehten blůmen rot,

Was er kleiner vogelin twinge,

Doch klage ich ein ander not:

Der ich mich ie ze dienste bot,

Der ist min swere gar ze ringe;

Des bin ich an froͤiden tot.

O we, ja hat mich betwungen

Ir vil minneklicher munt!

An ir ist mir niht gelungen;

Swere dú ist mir worden kunt,

Sit ich fant so suͤssen funt

An der minneklichen, jungen;

Herze! dú hat dich verwunt.

XXXVII.

Ich solt aber, dur die suͤssen,

Gruͤssen

Meigen, walt, heide, ouwe

Und der kleinen vogel sůsses singen.

Liesse eht mir an ir gelingen

Trut min trost, mis herzen frouwe,

Das si minen kumber wolde buͤssen;

Seht, so wurde ich froͤideriche.

Truter lip, nu tů genedikliche!

Roter munt, du maht min leit verdringen.

Suͤssú Minne, sit din minne

Sinne

Krenket zallen stunden,

Wie solde ich ie mer danne fro beliben?

Lieber lip vor allen liben,

Heilet mir mins herzen wunden,

Das min froͤide lige an dem gewinne.

Tůt ir das, so wirde ich froͤidebere.

Selig wib, nu scheident mich von swere!

Minne, du maht mir min leit vertriben.

Ich han froͤide von ir eine;

Si eine

Troͤstet mich, ir guͤte;

Davon můs mir spilndú froͤide swinden.

Liesse si mich genade vinden:

Seht, so froͤite min gemuͤte,

Das mir wurde ir roter kus, ein kleine;

So wer ich vil manger sorgen ane.

Trútelehter lip, ich lebe in wane,

Das ich froͤide von iu muge enpfinden.

XXXVIII.

Nu hat meige walt, heide, ouwe

Wol bekleit mit maniger wunneklichen spehen wat:

Also hat mis herzen frouwe

Sich bekleit mit kleiden, das ir wunneklich anstat.

Wip —

Lich guͤte, schoͤne und ere,

Dabi reinen můt,

Dis gewant treit du vil here,

Das ir edelem herzen sanfte tůt;

Bi den kleiden lat sich vinden der vil trútelehte lose lip.

Ach! solt ich mich senden vinden

Bi den kleiden, die dú reine, minnekliche antreit,

So muͤse al min leit verswinden,

Und wurde an mangen froͤiden wol gemeit.[28]

Sol

Dú froͤide an mir verderben:

Dast mis herzen not;

So můs ich in jamer sterben.

O we suͤsser munt, durlúhtig rot!

Wie mich jamert nach den kleiden, sit si stant der lieben also wol!

Wil si minen kumber wenden,

Dú vil reine, minnekliche, der ich eigen bin,

So sol si dú kleit mir senden

Bi dem trútelehtem libe, so ist min leit dahin.

Kan

Mich ieman fro gemachen?

Ja, ir roter munt.

Wil mir der von herzen lachen,

So wirt ich an froͤiden wol gesunt.

Suͤsse Minne, bit die heren, das si troͤste mich vil senden man.

(Die zweyte Strophe dieses Liedes steht in der Samml. von Minnesing. Th. I. S. 23.)

XXXIX.

Es fůr ein búttenere

Vil verre in froͤmdú lant,

Der was so minnebere,

Swa er die frouwen vant,

Das er da gerne bant.

Do sprach der wirt mere

Zů zim, was er kunde.

‚Ich bin ein búttenere;

Swer mir des gunde,

Sin vas ich im bunde.‘

Do trug er sine reife

Und sinen treibelslagen.

Mit sinem umbesweife

Kunde er sich wol bejagen,

Ein gůt geschirre tragen.

Sinen tribelwegge

Den nam si in die hant

Mit siner slehten egge.

Si sprach: ‚heilant!

Got hat úch har gesant.‘

Do si so gebunden

Dem wirte sin vas,

Nebent und ouch unden,

Si sprach: ‚ir sint niht las;

Mir wart nie gebunden bas.‘

XL.

Von walhen fůr u. s. w. Zwey Strophen.

(S. Samml. von Minnesing. Th. I. S. 23.)

XLI.

Uns jungen mannen mag u. s. w. Drey Strophen.

(S. Ebendas.)

XLII.

Winter, du wilt aber twingen

Blůmen und der vogel sang,

Die man horte suͤsse erclingen

In der ouwe, dest niht lang.

Nu ist min hohgemuͤte krank;

Doch wil sich min froͤide ringen

Durh die, nach der ich ie rang.

Selig wib, suͤsse und reine,

Schoͤn und minneklichen var!

O we, das ir min so kleine

Nement mit spilnden ougen war!

Ich diend ie mit truwen dar.

Sit ich úch mit trúwen meine,

Lant mich niht verderben gar!

XLIII.

Liehter sumer, dú suͤsse wunne

Wil bi mangen froͤiden sin.

Bas,

Danne ich gedenken kunne,

Singent aber diu vogellin;

Dabi siht man schone in bluͤte

Boume stan: des meigen guͤte

Treit dem winter manigen has.

Nu ist der vogellin not zergangen;

Noch klage ich einander not.

We!

Ja můs mich des belangen,

Das ir munt, durlúhtig rot,

Mir niht wil die froͤide meren.

Suͤsse Minne, meht du leren

Si, das mir min leit zerge!

XLIIII.

Mich entroͤstet niht der walt und ouch dú heide,

Mich entroͤstet niht der kleinen vogellin singen;

Den tůt der kalte winter aber leide:

Dabi kan mich dú minnekliche twingen.

Was wend ir, das dú liebe, kúsche meine?

Nu ist sis doch, dú suͤsse, dú vil reine;

Wan lat si mir durh wibes guͤte bas an ir gelingen?

Dú minnekliche mag wol mit mir teilen

Ir wibes guͤte; die hat si beslossen.

Si mag mir mine sere wunden heilen,

Die si mir mit ir minne hat geschossen.

Vil selig wip, nu wende mine swere,

Und tůst du das, so wird ich froͤidebere.

Gedenke, das ich wibes guͤte selten han genossen.

XLV.

Nu siht man die

Gruͤnen heide

Wol bekleidet, wol geschoͤnet.

Schouwent an den gruͤnen walt!

Nu hoͤret man die vogelin singen

In den wunneklichen ouwen.

Die der kalte winter twang,

Die siht man in wunnen beide.

Vogel sang

Mit froͤiden doͤnet,

Wan ir stimme ist manigvalt.

Nů siht man die blůmen springen,

Der mag man ein wunder schouwen,

Sit der liebe sumer ist hie.

Manger froͤit sich

Gegen der wunne;

So leb ich in sender swere

Nach der lieben frouwen min,

Dú da kan so suͤsse lachen,

Swenne ir roter munt erlachet,

Und er liebe lachen sol.

Bas, danne ich erdenken kunne,

Kan si wol,

Dú seldenbere,

Kúsche und dabi wiplich sin.

Si kan mir die froͤide machen,

Das min herze an froͤiden krachet.[29]

Frouwe Minne, darzů sprich.

Minne, hilf das

Mir dú here

Mit ir liehten ougen brach[30]

Mine sende swere buͤsse,

Die ich von der schonen dulde.

Doch froͤit mich ein lieber wan,

Das si mir min leit verkere,

Wan ich han,

Dast ane lougen,

Von ir sendes ungemach.

Minne, sprich, das si mich gruͤsse;

Minne, wirb mir umb ir hulde:

Sost mir senden, siechen bas.

XLVI.

Nu woluf! gruͤssen

Wir den suͤssen,

Der uns buͤssen

Wil des winters pin,

Der uns wil bringen

Vogelin singen,

Blůmen springen

Und der sunnen schin.

Da man sach e

Den kalten sne,

Da siht man gras;

Von touwe nas,

Bruevent das

Die blůmen unde der kle.

Vorhin in walde,

Uf der halde,

Hort man balde

Wunneklichen schal.

In suͤsser wise,

Gar von prise,

Hohe, lise,

Singet dú nahtegal.

Der vogellin sanc

Der ist niht zekrank

Hin gegen dem meigen.

Megde! leigen!

Wir sun reigen

Den sumer lanc.

Des meigen bluͤte,

Des sumers guͤte

Hohgemuͤte

Git den vogellin.

Das hilfet mich kleine,

Wan dú reine

Troͤste alleine

Noch das herze min.

Ir brunes har,

Ir ougen clar,

Ir roter munt

Hat mich verwunt

Bis an den grunt,

Swie fro ich doch gebar.

XLVII.

Winter, du wilt aber vil verderben

Liehte blůmen, die doch schoͤne waren;

Und ein wib, dú wil mich froͤide ersterben,

Der ich pflag in froͤiderichen jaren:

Dú gůte, dú gůte, dú reine,

Die ich mit ganzen trúwen iemer meine.

Sit dú welt an froͤiden wil verswinden,

So moͤht ich wol lassen ungesungen.

Wan ein wib des war ich wolte erwinden,

Nach der ie min herze hat gerungen:

Dú gůte, dú gůte, dú reine,

Die ich mit ganzen trúwen iemer meine.

Wol gebaren und lieplich lachen,

Lieplich bliken dar und dan mit guͤte,

Das kan dú vil gůte wol gemachen;

Gegen ir troste froͤit sich min gemuͤte:

Dú gůte, dú gůte, dú reine,

Die ich mit ganzen trúwen iemer meine.

Wer gesach ie von so rotem munde

Minneklicher lachen und gruͤssen?

Den kust ich vil gerne, ob si mirs gunde,

Dú mir minen kumber kan gebuͤssen:

Dú gůte, dú gůte, dú reine,

Die ich mit ganzen trúwen iemer meine.

Dú reine ist vri vor missewende,

Der ich dienen wil gar eigenliche.

Ich bit ie, das si mir helfe sende;

Tůt si das, so wirde ich froͤideriche:

Dú gůte, dú gůte, dú reine,

Die ich mit ganzen trúwen iemer meine.

XLVIII.

Nu siht man aber die wunneklichen heide

In speher wat mit blůmen wol beschoͤnet;

Man hoͤret die vogellin in dem walde singen,

Den tet der kalte winter vil zeleide;

Nu ist aber der walt mit sange wol bedoͤnet,

Den hoͤrt man in dú oren suͤsse erklingen;

Si froͤwent sich gegen des suͤssen meigen bluͤte:

So sent sich min gemuͤte

Nach der vil reinen guͤte;

Das si mir Got behuͤte!

Swas ieman seit, so lit der wunsch an wiben.

Si kunnen in dú herzen lieplich lachen;

Ir loslich ougenblike tůnt froͤidenriche;

Ir reine guͤte kan wol leit vertriben,

So sis mit guͤte wellent lieblich machen.

Ze der froͤide ich in der welte niht geliche.

Ach ie doch das tůt mir niht dú reine, suͤsse,[31]

Die ich mit sange gruͤsse.

Got mir des helfen muͤsse,

Das si mir kumber buͤsse.

Ir wol geroͤter mund, ir liehten ougen,

Ir kel, ir kinne, ir roͤselehte wangen,

Die hant das sende herze min betwungen;

Do si darin geblihten lieplich tougen,

Darnach zehant do wart ich ir gevangen.

Darzů do kam dú Minne darin getrungen,

Si sprach: nu hab ich mich din underwunden.

Das han ich wol befunden

An minen senden wunden,

Die stent noch unverbunden.

Was treit úch fúr, fro Minne, ob ich verdirbe?

Was hilfet es úch, suͤssú seldenbere?

Durh Got, nu bin ich doch verselt úch beiden.

Was treit úch fúr, fro Minne, ob ich erstirbe?

Was hilfet úch min lange werndú swere?

Mich jamert, sol min herze von úch scheiden,

Sit ich úch han gedienet manige stunde.

Hei, kus von rotem munde!

Ob mir din trost des gunde,

Das mich dú liebe enbunde.

Ich wil den valschen und den ungetrúwen

Zeleide singen, und den edeln jungen

Zeliebe, und der vil lieben, die ich da minne.

Ir valsches herze kan den valsch wol brúwen.

So we in ie wart so we der valschen zungen,

Dú valschet in ir herzen und mit sinne.

Das schat mir niht: ob mich dú suͤsse reine

Wil meinen, als ich meine

Si, lieben alterseine;

So schat ir has mir kleine.

XLIX.

Nu ist manig herze vro,

Wan das mine; das můs iemer trurig sin,

Es enwende ir guͤte also,

Das ir guͤte troͤste mir das herze min.

Hei, nahtegal!

Suͤssen schal

Bringet uns des meigen zit.

Al min trost an einem reinen wibe lit.

Aller miner selden tag

Lit an der, diu mir das herze hat verwunt.

Niemant mich getroͤsten mag,

Wan dú schoͤne und ir roseroter munt.

Hei, wer aber das,

Ane ir has,

Das ichs umbevienge also!

Minne, sunder dinen dank, so were ich fro.

Minne, sunder dinen dank...

Hab ich das gesprochen, das ist mir leit.

Nu sich an, min lip ist kranc.[32]

Nieman mich getroͤstet, wan ir werdekeit.

Hei, Minne, sprich

Wider mich!

Sprich ein guͤtlich wort zů ir,

Das dú reine suͤsse tů genade an mir.

L.

Sol ich disen sumer lang

Bekumbert sin mit kinden,

So wer ich lieber tot.

Des ist mir min froͤide krank.

Sol ich niht ze den linden

Reigen: owe, dirre not!

Wigen, wagen, gugen, gagen,

Wenne wil es tagen?

Minne, Minne, trute Minne, swig! ich wil dich wagen.

Amme, nim das kindelin,

Das es niht enweine.

Alse lieb als ich dir si,

Ringe mir die swere min!

Du maht mich alleine

Miner sorgen machen fri.

Wigen, wagen, gugen, gagen,

Wenne wil es tagen?

Minne, Minne, trute Minne, swig! ich wil dich wagen.

LI.

Dú nahtegal dú sang so wol,

Das man irs iemer danken sol,

Und anderen kleinen vogellin.

Da daht ich an die frouwen min

Dú ist mins herzen kúnigin

. . . . . . . . . . . . .

. . . . . . . . . . . .

. . . . . . . . . . . . .

. . . . . . . . . . . .[33]

BRŮDER EBERHART VON SAX,
ein Bredier.

Nach dem Liede auf die heilige Jungfrau, das in der Samml. von Minnesingern Th. I S. 28...30 abgedruckt ist, findet sich in der Bremischen Handschrift folgender Anfang eines andern Liedes. Ob auch in der Pariser Handschrift nichts mehr steht?

Ewig geburt, gotlich ein lamp, vil megtlich gezwiget,

Verborgen ros in lilien blat, einvalt und doch gedriget,

Verholn und gevriget,

Und unerkant din wesendes wesen,

Vor allem wunder suͤsses wunder, wunderlich gemeret,

Sin kraft in siner wisheit als. . . . .

. . . . . . . . . . . . . .

. . . . . . . . . . . . . .

. . . . . . . . . . . . . .

. . . . . . . . . . . . . .

HER RUDOLF VON ROTENBURG.

I.

Kunde ich geloben die frowen min,

Als ich entstan

Ze rechte wol,

Mit trúwen das ich tete:

Der ich můs iemer mere sin

Gar undertan;

Min herze sol

Ir tragen wernde stete.

Ob ich si niht geloben kan,

So wissent doch,

Das die dir sint

Von Troie unz uf die Sone

Niender funden einen man,

Der spreche, noch

Ie sach ein kint,[34]

Das lebt wol alse schone.

Solde ich der frouwen haben wal,

Der leben stat

Uf hohem pris,

Fúr miner frouwen minne,

Von Maggun unz ze Portegal;

Mins herzen rat

Wer ir amis,

Von der ich lones sinne.

Was schate mir ein schwacher nit,

Ob mir dú schone gúnde,

Das ich ir diende zaller zit,

So vil ich danne kúnde?

Was leiden mannes were das,

Der mir der selde erbunde,

Ob ich erwurbe, ane ir has,

Das ich genade funde!

Es ist ein reiner sitte gůt

An frouwen, das

Si minnent die[35]

Gar ane strit

Mit stetem můte stent in ir gebande.

Daruf so húget min hoher můt;

Wande ich vergas

Der gůten nie,

Ze keiner zit,

Sit dem tage, das man si genande.

Wil si mir des gelouben niet,

Das ich ir bin,

Und lange was,

Gar undertan,

E ich si durh der ougen schin erkande,

Und ich mich nie von ir geschiet,

Und ie min sin

Ir tugende las

Uf gůten wan;

Des setze ich ir das herze min ze pfande,

Das mir nie wib so nahen kan

Und niemer sol.

Swie verre ich si,

So wissent das:

Die mine sinne stent in dem lande,

Da ich ir kunde alrerst gewan.

Mir tete wol,

Mohte ich ir bi

Getweln bas

Mit steteclicher fůge und ane ir schande;

So neme ich fúr der vogelin sang

Der wolgetanen minne,

Swie doch der nahtegalen klang

Mir troͤstet mine sinne.

Vil dike so der min gedank

Mit sorgen lebt hierinne;

Sie machet mir das leben kranc,

Mis herzen kúniginne.

Sin enpflege masse:

Von der strasse

Můs ich uf den smalen pfat,

Da sprichet mir dú sorge mat;

So můs ich froͤide miden,

Und grossen kumber liden.

Ob ich mit stete

Gut gerete

Nicht an ir erwerben kan,

So heisse ich niht ein selig man.

Si pfliget so vil der guͤte,

Davon das min gemuͤte

Dike singet

Und springet,

Uf genedeklichen wan.

Si ist ro rehte wol getan,

Das nieman si ensehe,

Wan der von schulden jehe:

Der also were,

Das er swere

Wolde liden dur ein kint,

Der wer an beiden ougen blint,

Wolt er si niht enminnen

Von allen sinen sinnen.

Uf aventúre

Ich diene ir húre,

Seht, darzů wol zwenzig iar,

Das ich so gros als umbe ein har

Ir kunde nie geniessen:

Es muͤsse si verdriessen.

Ovidius, der wise man,

Do der von erst minne pflag,

Do kunte er uns den sinen ban.

Ob si die naht ald den tag,

De keiner lib,

Man alder wib,

Die minne unrehte pflegen;

Der nîden schar

Die nemens war:

Das die vor kilchen legen!

Der blůmen schin

Sol iemer sin

Von ir gewalt gescheiden!

Dú heide hreit

Si unbereit

Den kargen und den leiden.

Mir tůt der kumber niht so we,

Den ich můs von in liden;

Davon, si tetens deste me,

Bete ich, sis gar vermiden.

Min reht ist, das ich von in dulde

Kumber und has.

Die mir miner frowen hulde

Erbunden, ane was,

Wanden si, das ich ins gulde,

Si heten mich bas.

Gar ane alle mine schulde

So nident si das,

Ob mir geschehe,

Das ich sehe

Ein wib, der ich bin undertan,

Und ie was, ane valschen wan,

Das sie mich umbevienge.

Der die darumbe hienge,

Die gůten lúten

Wendent trúten,

Da es nieman scheiden sol,

Das kunde ich vertragen wol.

Ich bin in niht geminne,

Swas ich davon gewinne.

Sorgen bůs

Tete ein grůs

Schone mir,

Der von ir

Keme; so

Were ich fro.

Verre bas

Tete das,

Danne ein wib

Minen lib

Hete wert.

Bas gewert

Wer ich hie,

Darnach ie.

Min gedank

Ane wanc

Stete pflag.

Untz ich mag

Alder kan

Sele han,

So můs das herze min

Ir iemer stete sin,

Uf den wan;

Wande ich han

Mich gar an si verlan.

Nu nimt genůge wunder,

Das ich so grossen kumber klage,

Und iedoch darunder

Ein so hoh gemuͤte trage.

Da han ich gůt gedinge,

Das si mir libes ende gebe,

Darnach ich iemer ringe,

(Das wissent!) aldiewile ich lebe.

II.

O we, das ich si miden sol

Ze keiner zit

Durh swachen nît,

Die ich můs iemer minnen!

Das tůt vil maniges herzen wol,

Der sinen můt

Hat gar behůt

Vor tougenlichen sinnen.

Ich bitte Got, das ime besche,

Als ich im gan,

Der mir erban

Ir minneklichen guͤte.

Wan hassent si den kalten sne,

Und gunden mir,

Ob ich an ir

Erwurbe ein hoh gemuͤte?

(Ja muͤste er han gelukes rat,

Der das verdienen wolde.)

Ich wene, es were ein missetat,

Ob ich si minnen solde.

Ich neme, swie es mir darumbe ergat,

Ir roten mund ze solde

Fúr tusent march; und ob der pfat

Flusse von rotem golde,

Des moͤhte ich senfter enig sin.

Geloubent das:

Mir tete bas

Der welte has,

Danne ob ich si ze langer zit verbere.

Mir tůt ir liehter ougenschin

Den lib so clar

(Dú rede ist war!),

Das man ein har

Sehe in dem herzen, swanne ich bur were.

Ich wil ir dienen ane zil;

Des habe ich reht:

En eben sleht

Wer ich ir kneht,

Ob si mir niemer liebes iht getete.

Ouch duhte mich der selden vil,

Das ich si sach,

Und mir geschach

Ein ungemach,

Davon ich ir můs iemer wesen stete.

Sin welle ir guͤte an mir began,

Uf der genade ich singe;

So můs ich stete unfroͤide han,

Swie mir daran gelinge.

Si sol mich niht verderben lan;

Wande ich uf gut gedinge

Mit trúwen ir bin undertan,

Und darnach iemer ringe,

Das ich ir ere

Gerne mere,

So vil als ich beste kan;

Wande ich si mir erwelet han

Us allen guten wiben.

Ich wil bi ir beliben,

Ob si es gerůchet.

Swer mich sůchet,

Dem zeige man mich da,

Weis got! und niender anderswa,

Unz ich der sele walde.

Vor dem gruͤnen walde

Suln wir beginnen

Schone minnen,

Si mich, und ich gerne si,

So wirde ich aller sorgen vri;

So lebe ich niht ungerne,

Ob mir der tagesterne

Gelit so nahe,

Und umbevahe

Ich si. Das lassen ane zorn;

Dú rede were eht gar verlorn.

Das nide swer der welle.

Solde ich davon die helle

Beschowen innen,

Selker minnen

Muͤst ich úh pflegen da zehant.

Ob es da were also gewant,

Das mir dú schone gunde,

Das ich ir, alse ich kunde,

Der blůmen breche;

Da gereche

Ich mine lange swere also,

Davon das min gemuͤte fro

Belibe zallen ziten.

Ob ichs kan erbiten,

So wirt mir alles des ich ger,

Ob ich da gůt gelúke han.

Der rede moͤhte sin min wer

Der Babest da von Lateran,

Das si mich wert

Des ich gegert

Nu lange han mit stete,

Alder aber giht:

‚Ich tůns niht,

Ob er mich iemer bete!‘

Es lit an ir

Swas iemer mir

Beschehen sol ze heile:

Si troͤste mich!

So hangen ich

An dem rades teile,

Da maniger hanget ane trost,

Der doch genaden dinget,

Das er von rúwen werde erlost,

Und darnach iemer ringet.

Ist das ich niht gewinne[36]

Lon von ir gewalt,

So můs ich gar ane sinne

Loufen in den walt.

Mines herzen kúniginne,

Der ich bin versalt,

Dú sol mir ir suͤsse minne

Teilen manicvalt.

So das geschehe

(Das ich spehe,

Weis got! nu vil mengen tag

Mit dienste, als ich beste mag),

Das mir ir schonen ougen,

Als ichs gemeine, tougen

Ze heile winken:

Solde ich hinken,

Dur das eine, tusend jar

An minen beinen, das ist war,

Das ich es gerne tete.

Uf alse gůt gerete

Sol ein man

Schaden han.

Es ist reht,

Das der kneht,

Diene wol,

Da er sol

Lon enpfan:

Also han

Ich vil gar.

Selten war

Nan si doch

Des ich noch

Ie gesprach;

Sin gesach

Nie durh das

Deste bas

Her ze mir:

Doch ich ir

Stete bin.

Min gewin

Was ie noch kleine da.

In gesůche anderswa

Niemer solt;

Unverscholt

Wer ich ir iemer holt.

Ich lide grosse swere,

Die ich doch iemer gerne dol,

Wie kumbe ich ir enbere.

Si tůnt mime herzen wol,

Swie si des niht geloubet,

Das ich ir holdes herze trage,

Dú mich der sinne roubet:

Damitte ich ir genaden jage.

Solde ich des Riches crone

Von rehte tragen iemer me,

Genige ich niht ir lone

So gros als umbe ein bone,

Mir tete dannoch ir laster iemer we.

III.

Ein hoher můt

Mich singen tůt

Disen wunneclichen sanc!

Schoͤne und gůt,

Hoͤfsch und frůt

Ist min frouwe, sunder valschen wanc,

Nach der min herze ringet.

Ir roter munt

Hat mich verwunt

Sere, durh der ougen schin.

Werde ich gesunt,

(Dast mir wol kunt)

Das můs gar an ir genaden sin,

Dú mich so sere twinget.

Hab ich des nît,

Das si mir lit

Naher danne ein ander wib:

Denselben strit,

Ane endes zit,

Wil ich liden umbe

ir werden lib,

Der mir noch froͤide bringet.

Herze und sin

Hat si mir hin

Mit ir schoͤnen zucht benomen.

Dast min gewin;

Wan ich ir bin

Eigenlicher danne irs hant vernomen,

Swie mir daran gelinget.

Hei, schoͤnest aller wibe,

Du, nim sendes war,

Wand ich dich minne gar,

E das der selden schibe

Mich hin verdruke dar

Zů der verzalten schar.

Si liebet mir

Von schulden alle tage,

Die ich, herze! dir nahest trage.

Unmere ich ir

Durh mine klage,

Das muͤse sich verkeren!

Ich bin geborn

Ze dienste ir werdekeit.

Dast gar verlorn,

So si mir seit:

Des mag ir zorn

Min herzeleit

Mit lihter kunst gemeren.

Ir ougen glast,

Ir roten mundes schin,

Machen mich gast

Der sinne min.

Der minnen last

(Das můs nu sin)

Wil mich an froͤiden seren.

Frouwe, aller tugende krone,

Tů mir der sorgen rat!

Wande dir gesichert hat

Vor allen frouwen schone

Min herze, swie es ergat,

Ane arge missetat.

Parcifal, der leit dur minne

Grossen kumber und not.

Mehoth pflag derselben sinne,

Wande es ime Amur gebot.

Glies und eine kúniginne

Minten sich unz an den tot.

Noch minne ich herzelicher

Dich lieben selicheit

Mit ganzer stetekeit.

Wirde ich iht lones richer

Von diner werdekeit,

Des wirt min froͤide breit.

Das dú maget Lavine icht were

Schoͤner danne min frouwe si,

Oder Pallas, dú witen mere:

Des gelouben bin ich fri.

Si kan froͤmden grosse swere

Und kan sorgen machen bi.

So gros ist, frouwe reine,

Din er und din gewalt;

Din selde ist menicvalt.

Ich bin din ungemeine,

Darzů bin ich gezalt,

Des wirt min froͤide balt.

Mir tumben ist also geschehn:

Ein lieb hat mir min ougen ersehn,

Des ich niemer sit vergessen kunde;

Dast ein reine, selig wib.

Nach ir lieben, roten munde

Sent sich al min lib.

Ohey, Ohey!

Sit ich die schonen erst ersach,

Von der ich han menig ungemach,

So nam mir ein minnekliches lachen

Alle die gedanke min.

Also kan si toren machen;

Dast an mir wol schin.

Ohey, Ohey!

Si hasset mich gar unverscholt,

Der ich bin mit trúwen holt.

Ich můs mich dem boume wol gelichen,

Der sunder rinden stat,

Unz min lib der minneklichen

Sich gefroͤmdet hat.

Ohey, Ohey!

Du hast doch, frouwe here,

Min herze und den gedank,

Ane aller hande wank,

Swar ich des landes kere,

Du lebst darane getrang;

Da mich dú minne twanc.

Dast ein kumber,

Si wil mir niht bas

Noh gelouben, das

Ich ir nie vergas,

Sit ich tumber

Erst da gesas,

Da man werde mas

Aller tugende vas

Diu hant die besten minne

Zwischen Paris und der Sal

Mit lobelicher zal

Mins heiles kúniginne

Wande in mins herzen wal

Stet aller wibe kal.

Ob das Riche

Were mir gesant,

Dannoch al dú lant,

Dú man erkant

Eigenliche,

Lies ichs in ir hant.

Dú min herze bant,

Aldar ich si vant:

So lieb ist mir din ere,

Die ich, frouwe, minnen můs.

Uf dinen werden grůs

Dien ich dir iemer mere

Von dem houbet unz uf den fůs;

Des wirt mir niemer bůs.

Beide, rot und wis,

Also hat der nature flis

Gemachet ir wengel var,

Und hat dabi ze wunsche gar

Gestalt ir minnerichen munt,

Gelich deme, als er spreche zaller stunt:

Kússe, kússe, kússe mich!

Alse tet ir nieman gerner danne ich,

Wolde sis versinnen sich.

Mir schadet ein not

(Und niht so vil),

Das ich si selten sihe,

Die ich iemer minnen wil.

O we wie wirt der sorgen rat,

Dazů man heiles noch der statte niene hat!

IV.

Hete ich niht anders leides me,

So wolde ich klagen den gruͤnen kle,

Den uns der rife und ouch der sne

Verderbet hat:

Daran geschiht mir leide.

Nu geht mir naher ander leit,

Das mir ein wib so gar verseit

Ir minne, die mit stetekeit

Gedienet hat

Min lib, min herze, beide.

Dú mir vor allen wiben

Ze frouwen můs beliben,

Wil dú mich verderben so,

Wer sol mich danne machen fro?

Ja wers ir súnde, ob si mir also tete.

Ich was ir ie getrúwe,

Und bin ir iemer núwe.

Schoͤner danne ein spiegel glas,

Herter danne ein adamas,

So ist ir das herze min an rehter stete.

Wol der Minne,

Dú min sinne

Leret

Und keret

Nach der besten einer, die man in alder welte erkennet!

Wol der guͤte,

Der gemůte

Machet,

Das mir lachet

Herze und al die sinne min, swa man si vor mir nennet!

E ich den kumber,

Den ich tumber

Dulde,

Durh ir hulde,

Liesse, lieber hette ich Rome und Engellant verbennet.

Und liege ich das,

So muͤsse ir has,

Der ich nienen vergas,

Min leit vertragen;

So wurde krank

Al min gesank.

Ir werden dank

Můs ich bejagen,

Des wurden tusent herzen lebende ane swere.

Swie min frouwe ir versagen

Wider mich verbere,

Son weis ich noch des kúniges niht, der mir geliche danne were.

Was hilfet si das riche gůt,

Die niht wibes minne minnent,

Und des niemer niht beginnent,

Das man nennet hohen můt?

Des hoͤfschen zimt den frouwen niht,

Swes herze unsanfte wol getůt.

Maniger suchet dur das jar,

Des er doch niht vinden wolde.

Sere man si hassen solde,

Die den wiben sagen unwar.

Swie kleine es mich doch frume,

Ich geloug in nie so túre als umb ein har.

Leider, si minnent alle niht als ich,

Die da wibes minne flissent sich.

Des sol min frouwe lan geniessen mich;

Ja enbin ichs niht, der valscher minne gert.

Valsches wil ich niemer werden wert,

Das hab ich her behalden drisseg vert.

Dú vil liebe und dú vil reine,

Die ich so herzelichen meine,

Erwirbe ich der niht ein vil kleine,

So fúrhte ich, das min sang erzage.

Swie min frouwe mir des gunde,

Das ich von ir minneklichen munde

Ir werden grůs bejagen kunde,

So verdurbe al mins herze klage:

Swie ich ir minne niht bejage,

So wissent, das ich allen froͤiden widersage.

V.

Ich tete gerne schin

Grossen pin,

Den ich nu lange han.

Wolde gelúke sin

Der venre min,

So muͤse ich sorge lan.

Swie mir daran gelinge,

Doch ratet, das ich singe,

Ein wunneklicher můt;

Ouch dunket es mich gůt.

Swer ere gerne jaget,

Der gevat ir deste me;

Des bin ich unverzaget,

Swies mir darumbe erge.

Ich bin ein selig man,

Das ich ie gewan

Als schonen sin,

Der mich geleren kan

Lassen und han,

Als ich spil under in,

Und ich wol kan gescheiden

Die lieben von den leiden.

Das mein ich an ein wib

Und ir vil gůten lib,

Dú mir die froͤide machet,

Der ich e nien gepflag,

Davon min herze lachet

Vil dike, als es wol mag.

Hohen můt ich nie gewan,

E ich die schonen ane gesach,

Dú mir tůt, das ich wol kan

Verdulden, leit und ungemach.

Min herze nie von wibe me

So rehte wol ze mir gesprach;

Das wolde ich wider reden e,

Do betwanc es mich, das ich nie verjach.

Kunde ich wol, so solt ich sagen

Von ir das beste, als ichs enstan,

Dú mir sol vil gar vertragen,

Das ich han den můt an si verlan.

Si hat beroubet ellú wib

An mir, und můs mich eine han.

Ja wage ich ere und ouch den lib;

Was moͤhte ich nu dur si began?

Si kan noch eren,

Wol verschulden

Lobes vil, den man ir tůt,

Und ouch bekeren

Nach ir hulden

Swen si wil. Si ist so gůt;

Wie moͤhte ich eine si verlassen?

Ane strit

Jo dienet ir

Das lant gemeine,

Und unverwassen,

Zaller zit,

Ist si von mir.

War tete ich danne mine sin,

Der mich das beste leret?

Jo erwurbe ich lihte den gewin,

Der manig herze seret.

Si hat dú Minne zeineme gaste

Nu vil manigen tag gezalt,

Das si ir sinne niht so vaste

Ziehen wil in ir gewalt

Als si die mine hat getan.

Ouch ist mir das ein ere,

Der ich wolde wesen an

Húte und iemer mere.

Min herze ist gros, und wart nie swach,

Das es getorste ernenden

Al solche swere und ungemach,

Dú mich tůt ellenden.

Ist min frouwe ein teil ze her

(Dur wen solde ich das wenden?),

So wirt min froͤide deste mer,

Wil si min not vollenden.

Der zwivel tůt mir leides vil;

Doch troͤstet mich gedinge,

Ob ich bin stete (als ich da wil),

Das mir vil wol gelinge.

Ich sage iu, wer den strit geriet

Das taten mine sinne.

Ine můt ir anders niet,

Wan das ich si minne;

So hat si mich gar gewert,

Des ich an si sinne.

Er ist vil wis, swer masse gert;

Des bin ich worden inne.

Ich han mich selben úberladen

Mit wunderlicher stete.

Buͤset nieman mir den schaden,

Das ziet sich ze ungerete.

Wer solte stete an wiben gelten,

Wan ein ungefuͤger man,

Der missetete und selten

Gutes iht verschulden kan?

So schone sinne,

Die gerieten,

Das si kan des besten warn,

Den sol dú Minne

Das verbieten,

Das an mir niht missevarn.

Sol mich vergan ir grosse guͤte,

Die min ouge an ir ersach,

So můs ich lan

Ein hoh gemuͤte.

Das ist mir ein ungemach,

Des ich niht vergessen wil;

Und lebt ich tusend jare,

So het ich iemer leides vil:

Das sage ich iu ze ware.

So gros ist min klage,

Das ich gar verzage,

Si enwelle ir widersage

Lassen, dú mir alle tage

Vil ze nahe gat.

Si sol den rat

Kiesen, der zen eren rehte stat,

Sit si sich noch so wol behuͤtet hat

Vor missetat.

Swie sere mich twinge

Si, von der ich singe,

Doch han ich gůt gedinge,

Das mir noch wol gelinge;

Wande ich wil den strit

Han alle zit,

Unz das si der not ein ende git,

Dú doch vil nahe zallen ziten lit

Mir iemer sit,

Sit si min gemuͤte

Gevie mit ir guͤte,

Nach der ich mich verwuͤte.

Swie sere man ir huͤte,

Doch bin ich der man,

Der ir wol kan

Verholne dienen, ob si mir des gan.

Was kan gewerren mime libe dan

Der mirs verban?

Dú Minne

Mine sinne

Betwungen so hat,

Das min herze stat

Mit sorgen, swies ergat.

Wie sol des werden rat?

Es ist ein missetat,

Das si mich eine lat.

Mir were

Vil swere

Min můt und krank,

Wan das si betwank

Min herze, des ist lang.

Das ich nach froͤiden rank

Und ouch vil dike sanc:

Des sage ich ir danc.

Nu ger ich niht mere,

Wan das dú schone mich ze rehte lere,

In der welte sol ichs iht began,

Davon ich múge haben wan,

Das si min genade welle han.

Swas ich nu von hohem můte

Ie gesprach, und ouch tet ze gůte,

Daran brachte mich min frouwe gůt;

Davon min herze und alder můt

Gerne zallen ziten das beste tůt.

Swer gerne nach eren wil ringen,

Der sol sinen můt betwingen,

Das er selten an ihte missetů.

Ja mag im wol daran gelingen,

Kan ers mit schoner fůge bringen,

So wol beide abent und frů,

Das im die besten sprechent wol;

Das helfet im dazů.

Er sol sin milte und niht ze here:

Das ist min tumbes mannes lere.

Wil er in der welte den pris bejagen,

Sunder valsch er sine sinne kere

Daran, das er mit zúhten mere

Sin froͤide. Tougenliche sol er tragen

Ein lieb; davon sin herze vro

Belibet zallen tagen.

Ja enmag ze stete

Nieman tragen ho

Den můt (swie gerne ers tete)

Noch rehte wesen vro,

Wan der ze hohe Minne hat

Gůten wan. Des herze stat

Vor falscher fůre wol behůt;

Dú minne twinget sinen můt,

Das er zallen tugentlichen dingen můs sin bereit:

Des wirt sin lob von rehten schulden wit und breit.

Ein man sol niht vermiden,

Durh boͤser lúte niden,

Er si dien frouwen zallen ziten undertan;

Und můs er davon kumber han,

Den sol er gerne liden.

Mag er si bringen inne

Verwentlicher minne,

Und das sin lib ist aller valscher sitte blos:

So můs sin froͤide werden gros.

Swel leit er des gewinne,

Er lasse ime sin der boͤsen nît ze lihter wis.

Was sol ein besser paradis,

Ob er mag vro beliben

Von wol gelobten wiben?

Ja klage ich min swere,

Das mir noch nie gelanc,

Swie gerne ich da were,

Da man nach froͤiden ranc.

Min herze ie gerne das beste riet

Den libe, swie es in doch niet

Vervahen kunde umbe ein har.

Dú wort dú dunkent mich niht war,

Das man sprichet, darnach man werbe,

Des werde meist dem man,

Und ich so herzeclich ze manigen stunden geworben han

Umb einer frouwen hulde,

Von der ich dike dulde

Al solich not, dú mime libe nahe gat.

Das mich so kleine das vervat,

Dast ane mine schulde.

Ich diene uf gůt gedinge,

Swie mir daran gelinge.

Min herze ist ir mit trúwen zallen ziten bi;

Von leide wirt es niemer vri,

Es si das si mich twinge

Mit ir wol stenden ougen,

Das si mich sehe tougen

An, minneclich also,

Das ich wol muge entstan,

Das si min genade welle han;

So wirde ich ane lougen vro

Und zallen ziten schon und wol gemůt.

Des hat si leider sich behůt,

Das si niht mit ir guͤte[37]

Troste min ungemuͤte.

Ich wil der schonen kúnden,

Das mir ist rehte als e was Gurasse,

Der in des sewes únden

Ertranc, davon das er ane masse

Minnet eine frouwen. Das si mich des erlasse,

Des bitte ich inneclichen

Die gůten, dú mich hat so gebunden,

Das in allen richen

Niemen lebt, der so gar verwunden

Si von starken rúwen, als ich bin zallen stunden.

So sere nie bevangen

Enwart noch Riter Gawan von Minnen,

Ich si in ir getwangen

Noch vaster. Wolde si sich des versinnen,

So moͤhte ich noch von ir vil suͤssen lon gewinnen.

Es ensi das si mich welle

Begnaden, so ist mir zallen ziten

Als eime, der in der helle

Můs mit rúwen Gotes helfe biten.

Ich stirbe, ob ich ze langer vrist mit solcher not sol striten.[38]

Ob ich von ir eine

Verdirbe, das ist kleine.

Wie lútzel mich das wundert!

Ja lagent tusent hundert

Ze Troie von Elenen tot.

Noch gerner mac man liden dur mine frouwen not;

Wan Got ein besser wib nie werden gebot.

Schoͤner lebt enkeine,

Wan die ich da meine.

In allen landen,

Die sie ie erkanden,

Oder hant gesehen,

Die muͤssen ir alle von waren schulden jehen,

Das dem, der si minnen sol, niemer kan bas beschehen.

Si sagent von Gúttinnen,

Die hievor minnen

Pflagen zallen ziten

In dien landen witen,

Das si weren schoͤne und gůt;

Hete die Got wol gesunt unz her behůt,

Si enmoͤhten gar gelichen niht der, die mich singen tůt.

Es wart nie niht so gůtes

Noh so hohes můtes.

Si kan mit schonen sinnen

Solich lop gewinnen,

Das ir die besten sprechent wol.

Von schulden ir ze gůte aldú werlt gedenken sol;

Swa si wont, da můs das lant von ir sin froͤiden vol.

Das ie so hoh das herze min

Geriet an ein wib so gůt,

Des můs ich fro von schulden sin.

Si hat vor valsche gar behůt

Ir userwelten gůten lip.

In schoner froͤide stet ir můt

Gehohet so fúr ellú wib,

Das mime libe sanfte tůt.

Min gemuͤte

Tůt der merkere spehen

Leides vil;

In getar vor huͤte

Niemer si reht angesehen

Als ich wil.

Des sol ir guͤte

Niemer mich engelten lan;

Wan, swa der lib

Ist, min gemuͤte

Wirt ir selten an.

Enchein ander wib

Enmag getroͤsten mir den můt;

Es ensi das si mir sende

Ein boten, der mit worten gůt

Mir kúnde ein liebes ende.

Glies leit vil manigen tac

Von liebe grosse swere;

Alienor desselben pflac.

Wie ungerne ich verbere,

Ich endiende ir bas, ald alse wol.

Der lib ist mir unmere

Ob ich si dike miden sol,

Bi der ich gerne were,

Ane kumber moͤht es sin.

Nu scheident uns die boͤsen,

Die huͤtent ir, so tůnt si min;

Got muͤsse uns von in loͤsen!

Mir was dú Minne ein teil ze gram,

Dú mich vil sere twinget,

Do si mir die masse nam,

Damit vil maniger bringet

Sin gemuͤte an solhen wan,

Da im vil wol gelinget.

Si moͤhte michs han erlan;

Min herze unsanfte ringet.

Nu han ich helfe noch den rat,

An den ich mich verlasse,

Wan der gůten, die mich hat

Betwungen ane masse.

Hey! wie si sich eret,

Ob si min leit verkeret,

Und mir die froͤide meret,

Dú vil manig herze leret

Leben ane twanc

Uf suͤssen sanc,

Der machet mengem man sin truren kranc.

Ouch tůn ich ir den ane valschen wanc

Uf gůten danc.

Nu seht wie ichs wage:

Ich seze ir ze lage

Beide frúnde und mage;

Kumt mir dan iht ze trage

Ir lon, des wirde ich alt.

Mir ward gezalt

Von der schonen ere manigvalt,

Der han ich funden vil in ir gewalt;

Des bin ich balt.

Nu enweis ich niht zeware,[39]

Wie min frouwe wil, das ich mich gebare,

Von der ich die grossen not enpfie;

Sin enwart mich noch ze rate nie.

Nu tete ich gerne das beste, wisse ich wie.

Swas mir geschiht ze leide,

Darumbe ich niener doch gescheide

Von der lieben minen steten můt.

Den sweren tag er wol vertůt,

Der sich versiht, das der abent werde gůt.

VI.

Das erste leit das erste wib

Dem ersten man

Geschaffen hat,

Der erste ie wart geschaffen.

Ir tumbe sinne, ir wibes kip

Verwist in an

Des tievels rat.

Die leien und die pfaffen,

Wissagen, kúnige und ellú diet

Hant leider sit

Engolten vil

Der súnden und der schulde,

Dú si von paradyse schied,

Und, in ir zit,

Ir froͤiden spil

Verlos und Gotes hulde,

Wa din nam git ane underbint,

Das, owe, nie

Wart e vor dir

Noch herze ser noch swere.

Das hant die alten und ir kint

Her gerbet ie,

Und darzů wir.

Ach Got, der leiden mere!

Des waren sidher, das ist war,

Dú frouwe und ir geselle

Und al dú welt funftusent jar

Mit jamer in der helle.

Si teten wol, si teten ark

(Das merke, swer der welle!),

Ie doch so was ir kumber stark

Und ander ungevelle.

Sit wůchs ein růte von Yesse,

Und us der růte ein blůme klar,

Uf den ein geist

Der sibenvalten gabe růwen wolde.

Das was ein magt, dú sit noch e

Enwart beruͤret umb ein har,

Von des volleist,

Der si geschůf, und den si tragen solde.

Ein stude es noch bezeichnet bas,

Die Moyses, der gůte man,

In fúre sach,

Das doch nit bran dú stude noch ir tolde.

In glicher wis ir lip besas

Der wise Got, der wunder kan,

Das nie zerbrach

Ir kuͤsche, dú sich varwet nach dem golde,

Das iemer stete ane ende wert,

Und das man von Arabe har

Dem keiser git

Ze hoher gabe in presente und in solde.

Sus hat du reine magt gegert

Der himel keiser, das ist war.

Sus giht David,

Des sprúche und des getihte dich hat holde.

Es wart ouch an dem velle erkant

Dem fuͤrsten Gedeone,

Das er eines tages betouwet vant

Nach sinem willen schone.

Das wunder hat uns sit ermant,

Wie Got von sinem trone

Zu dinem libe wart gesant,

Maget, aller megde ein krone!

Tron Salomones,

Růte Aarones,

Frouwe, suͤsse maget!

Du bist ze selden uns betaget.

Du gimme úber alle schoͤne,

Osanne wilder doͤne,

Du Margarite,

Du widerstrite

Viendes rate, boͤser ger!

Dir ist von ende der welte her

Behalden sunder swere,

Das du den kúnig gebere,

Der loͤsen wolde,

Als er da solde,

Adamen und sin kunne gar;

Und e was nieman, untz dar,

Der dir gelichen mohte,

Und dem ze můter dohte,

Der mit gewalte

Sus bestalte

Himel, erde und geschaft,

Die wisheit nie noch meisterschaft

Beslihte noch berihte,

Wan sin, der es da tihte.

Tohter schone

Von Syone!

Keiserinne!

Kúniges hort!

Der engel stimme

Und alle ir wort

Enkunden niht wol prisen

Dich, maget, in alle ir wisen.

Ezechiel sah durh ein tor

Den hohsten keiser von dir gan.

Das selbe tor

Wart e davor

Entslossen nie noch ufgetan,

Wan ime durh sich.

Sus hat er dich

Behalten zeiner porte,

Dú niemer me,

Noch sit noch e,

Ze nieman traf noch horte.

Du bist ein sal,

Der berg und tal

Bewachet und beslússet.

Du bist ein gelt,

Das al die welt

Begnadet und begússet.

Des lobent dich in widerstrit

Der sunne und ouch der mane.

Din lob, din ere sint beidú wit;

Dich lobt der Tremúndane.

Zimbal, er, und swas erklinget,

Das ist dir bereit.

Swas leben wil, und swas gedinget,

Das git underscheit,

Das es von dinen gnaden singet,

Sprichet und seit;

Wan uns von allen sorgen dringet

Din erbarmekeit.

Din lob die siren

Und die liren,

Harpfen, rotten kunden nicht

Volbringen: des dú warheit giht.

Es moͤhte niht beschrien

Tanbur noch symphonien.

Alle organisten

Mit ir listen

Kunden niht an dinen lobe

Erzeigen, in were dannoch obe

Ir melodie, ir wise

Des wunsches von paradyse.

Swer nu spil

Haben wil

Von der maget,

Dú verjaget

Hat die not

Und den tot,

Der bishar,

Lange swar,

Der si fro,

Spreche also:

Lob si dir

Hin von mir,

Kúnigin!

Selden schrin!

Sit din trost

Hat erlost

Alle die,

Die noch hie

Ir lebin

Uf gewin

Mit gedingen zů dir hant,

Und sich an dich verlant.

Den tů so,

Das si fro

Dort beliben sunder dro.

Der geist, der alle sinne

Enzúnden und erlúhten mag,

Der helfe uns, kúniginne,

Rehter sinne uf selden tag.

Also swer an dich dinge,

Ald dich von herzen minnen kan,

Das den din helfe bringe

Fúr den, der ende nie gewan.

(Nun folgen die Lieder, die in der Samml. der Minnesing. S. 32b. bis S. 35b. abgedruckt sind.)

HER HEINRICH VON SAX.

Von diesem Dichter fehlt in der Samml. der Minnes. folgendes, in der Bremischen Handschrift mit I. bezeichnetes Gedicht.

I.

Ich bitte úch, lieben gůten,

Das ir vernement minen pin;

Uch, werden hohgemůten,

Die wiben holt von herzen sin,

Und ouch úch, gůten frouwen,

Das ir gerůchent mine not

Dur úwer guͤte schouwen,

Wie gar ich bin an froͤiden tot.

Ein wib dú hat mich gebunden so,

Das ich gar ane alle froͤide bin;

Min lib můs eht iemerme sin unfro,

Si troͤste bas minen senden sin.

Si ist so gůt,

Das mich min můt

Gegen ir mit ganzen trúwen treit.

Ir roter munt

Hat mich verwunt,

Des ist min ungemuͤte breit.

Ir kel ist blank;

Der min gedank

Von ir eht niht gewenken mag.

Des bin ich gar

An froͤiden bar,

Sin mache minen herzen tag.

Min můt

Und ouch gar das herze min

Der suͤssen nien vergessen kan.

Vil gůt

Ist ouch dú liebe frouwe min;

Ich bin ir egen dienestman.

Mich hat verseret ir viel liehten ougen schin

Mit minnen geschossen in das sende herze min.

Wil si, so můs ich ane hoh gemuͤte leben;

Dú here dú mag mir ouch wol hohe froͤide geben.

Seht, als hat dú reine

Vor allen wiben min gar gewalt,

Die ich mit trúwen meine,

Und habe ouch min heil an si gezalt.

Sol mir wol gelingen,

Das můs eht an ir genaden stan,

Ich wil iemer singen,

Und diene ir gerne uf lieben wan.

Si hat mich gebunden so in ir bant,

Das ich mus eht ir gevangen sin.

Mich lat wol ir helferichú hant

Us banden, wil eht dú frouwe min.

Nu helfent mir wúnschen, ir werden man,

Und ouch ir reinen gůten wib,

Sit mich eht niht anders getroͤsten kan,

Wan ir vil minneklicher lib,

Das mich noh dú reine troͤste bas:

Das stet ir reinen guͤte wol,

Sit ir ouch min herze nie vergas,

Noch niemer vergessen sol.

Ir umbevanc

Mich schiede wol von sender not

Mit armen blanc;

Ich kuste ouch gerne ir múndel rot.

Swas ich gesinge

Das froͤit mich in herzen niht

(Ich tanze, ich springe),

E das mir lieb von ir geschiht.

Vil we tůt mir, das ich die frouwen min

So lange froͤmede; dast mir ze lanc.

Mich froͤite bas ir vil liehter schin,

Danne eht alder vogelline sanc.

So wil ich doch den jungen singen,

Was der sumer wunne hat;

Dur das si tanzen und springen.

Walt mit gruͤner varwe stat;

Nachtegal

Suͤssen schal

Singet, der vil sanfte tůt;

Meien blůt

Hohen můt

Git den vogellin úberal.

Heide breit

Wol bekleit

Mit vil schonen blůmen lit.

Sumer zit

Vroͤide git;

Davon suln wir sin gemeit.

Der kle

Den sne

Von hinnen vertriben hat;

Des suln wir alle

Mit schalle

Ouch in froͤiden wesen.

Mit mir

Sult ir

Da dú gruͤne linde stat.

Da suln wir reien

Den Meien,

Kleblumen lesen;

Da wirt dú kurzeweile gůt;

Dar kumt schoner frouwen vil;

Da wirt maniger wol gemůt

Und ouch sorgen vri.

Ahy!

Nu si

Vil selig, swer mit froͤiden lebe.

Sint fro!

Lebt so,

Das úch Got hoh gemuͤte gebe.

Man sol

Sich wol

Mit froͤiden froͤwen der sumer zit;

Si hat

Den rat,

Das si wol hoh gemuͤte git.

Der dos

Wirt gros,

Da wir zů ein andern komen,

Under der linden.

Von kinden,

Vil wol gemůt,

Die schar

Vil gar

Da sind; das habe ich vernomen.

Ir froͤlich singen,

Ir springen

Vil sanfte tůt.

Froͤide und froͤiderich gemuͤte

Suln wir diesen sumer han.

Heide und anger schone in bluͤte,

Da stent blůmen wolgetan.

Uf der heide und in dem walde

Singent kleinú vogellin

Suͤsse stimme, manigvalde;

Des suln wir in froͤiden sin.

Nu seht, wie mange wunne

Der sumer al der welte git,

Me danne ich singen kunne.

Was suͤsser wunne an ime lit!

Er kan uns froͤide machen

Der wunnekliche sumer gůt;

Mit manigvalden sachen

Git er der welte hohen můt.

Dú tal,

Dú val

Den winter e sint gewesen,

Da siht man ze ringen

Uf dringen

Kleblůmen vil.

Nu, wol uf! wol uf! froͤwent úch der lieben zit,

Dú vil manigen herzen dike sanfte tůt.

Al min froͤide an einem reinen wibe lit,

Dú mich dunket minneklich und gůt.

Ich wil ouch mit iu tanzen und springen me,

Swie mir in herzen niemer liep da von besche.

Ich wil ouch ussen

Fro gebaren zaller zit,

Und innan tussen,

Da min herze in sere lit.

Solde aber ich geleben,

Das dú liebe frouwe min

Mir froͤide wolde geben,

So wolde ich in froͤiden sin

Innen und usse mit froͤlichem můte,

Ob dú vil reine, dú here, dú gůte

Mich wolde enbinden. Dú suͤsse, dú reine,

Si ist wol gestellet, dú liebe, die ich da meine.

Davon wil ich iemermer und ane wanc

Dienen al die wile ich iemer lebe.

Wurde mir ir minneklicher habedank,

Das wer mir ein lieber funt, ein richú gebe.

Si hat alleine

Min fúr ellú wib gewalt,

Die ich da meine;

Ich han min heil an si gezalt.

Mich mag ouch machen

Ir suͤsser múndel rot

In herzen lachen;

Wil si ouch, ich bin an froͤiden tot.

Dis tanzes ist nicht mere,

Den ich von miner frouwen han gesungen.

Wúnschet, das si noch min leit verkere.

II.

Vil suͤssú minne u. w.

(S. Samml. der Minnesing. S. 35b. bis S. 37a.)

DER VON GLIERS.

Vor der Zeile: Kunde ich mit fůgen minen muot (in der Samml. der Minnesing. S. 42) steht in der Bremischen Handschrift folgendes:

Ich klage mich vil leide,

Die ich sender dol.

Si gelichent mich der heide,

Dú e stůnt blůmen vol,

Und nu der ane lit

Dú kalte winter zit:

Alse mide ich froͤide,

Der ich schoͤne pflag.

Min herze stet mir oͤde,

Das e gefúllet lag

Vil maniger frier wal;

Nu stet es wal chal.

Dú leit klage ich, und eine schulde,

Die ich doch ungerne dulde.

Ich habe, seht, der Minne hulde

Verlorn: dast ein not,

Dú mich vil rot

Und missevar vil ofte machet.

Des min weinender schaden wachet,

So jener slafet oder lachet,

Der nie gewan sende sere.

Noch klage ich mere:

Mir hat ein wib

Den tumben lib

Aller froͤide in ahte braht.

Das ist ein not,

Das ich den tot

Habe mir darumbe erdaht.

Als ich das klage,

Und irs sage,

So ist es ir gar versmaht.

Hie bedorft ich helfeklich gůtes rates zů,

Wie ich getů,

Das ich den můt,

Lib und gůt

Muge erbrechen gar von ir,

Alde aber bas,

Ane allen has,

Muge bringen wol hin zir.

Wil sich das wenden,

Und niht enden,

Seht, das muͤssen klagen wir,

Ich und ein jegeslich siech sender man,

Der mirs verban.

Doch ist ir leider kleine,

Die mir geraten kunden,

Wan si alters eine,

Dú mich hat gebunden.

Ir lib ist alse reine;

Si sol mich understunden

Minnen, die ich da meine.

Die mir des verbunden,

Die muͤsse has

Ane alles was

Sich fuͤgen bas,

Seht, umbe das

Si kunnen niht wan niden.

Ich bin in gram,

Si mir alsam;

An eren lam

Ist gar ir nam;

Ich sol si gerne miden.

Mir tůt vil we,

Das ich mich me

Von inen klagen můs,[40]

Danne es mir solde sin.

Dem tiefen se

Bevel ich e

Min houbet und minen fůs,

E ich der frouwen min

Iemer guten hulden enbere;

Mir were

Gar der lib unmere,

Gůt und alles das ich han.

Wa wart ie man

Von manigen dingen so betwungen?

Het ich tusent gůter zungen,

Ich kunde volle klagen niet,

Wie mir geschiet

Von senelichen sorgen

Abent, sehent, und morgen.

Hiebi wissent, dur das jar

(Des ist vil war)

Mir git du here

Sorgen mere,

Danne ich liebes nie gewan.

Es ist ir ere,

Das si kere

Kumber, den ich von ir han.

Minem můte

Mag dú gůte

Tůn mit lihten dingen wol.

Mich hat ir růte

In solher hůte,

Das ichs iemer minnen sol.

Were ich der sinne, das ich mich

Enstunde gůtes iht,

So hete ich liebe mir getan.

Swer mich des fraget, dem sage ich

Ein wort und anders nicht:

Ich han dur si untat gelan.

Des můs ich singen

Und ringen,

Wan ich si iemer minnen wil.

Ich můs dingen

Uf gedingen,

Wan si ist der froͤiden zil,

Der ich beginne,

Unz ich inne

Wirde froͤide: die hat si.

Mich tůt ir minne

Valscher sinne

Wendig, und wandels fri;

Ich můs dur si unstete lan.

Ich getar von ir gewenken niht;

Swie si mir tůt,

Ich heis es wol getan;

Des sols ir guͤte an mir began.

Swie mir wol oder we beschiht,

Ich heis es gůt;

Ich můs in ir gebotte stan.

Ob si mich twinget so,

Das ich von herzen fro

Werden niemer mag;

So klage ich manigen tag,

Den ich in wane,

Froͤiden ane

Han gesungen,

Und mich jungen

Tů gar alden.

Dú min walden

Wil unwert,

Das ist ein ungenedig leit.

Het si min doch dekeinen gert,

Min klage wer niht so breit.

Swer minen dienst wil ane dank,

Der můs min gar geweldig sin;

Ich tůn im doch mit willen krank,

(Das wirt wol an dem ende schin)

An eineg si, die herzeliebe frouwe min.

Alsus klage ich min not

Mit sange unz an den tot,

Alsam der elbes tůt,

Der keret sinen můt

Ze suͤssem sange,

E (dest lange)

E er erwende.

Solker mende

Můs ich dingen,

Suͤsse singen

Und ringen,

Als ein lib,

Der sich des todes wol versiht.

Si selig wib,

Warumbe lihtert si mirs niht?

Swenne ich erstirbe, so hat si

Velorn ein dienstman,

Der ir mit dienste ie was bi;

Das wolde si nie vergůt enpfan;

Ich liesse es sin, wolde sis noch vúr liebe han.

Moͤhte ich die welt betwingen gar,

Als e Rome Julius betwank,

Ich were doch iemer froͤidebar,

Si eine spreche habedank.

Ich wolde nicht ein keiser sin,

Das ich die lieben frouwen min

Gesehe niemer zallen tagen;

Sone wolde ich niht der krone tragen.

Ist es niht kleine,

Das ich si meine;

Si ist alles das ich bin,

Lib und sin.

Ich wolde ins riches ahte sin,

Und vallen in des babstes ban,

Das ich der lieben frouwen min

Solde heissen werder man.

Wurde das ein wares wort,

So were mir truren unbekort,

So wolde ich niht min suͤsses leben

Umbe alder welte wúnsche geben,

In selken sachen

Muͤste ich lachen

Ellú minen lieben jar,

Und wurde es war.

Doch bin ich uf gedingen fro;

Unz ich gedinge, so lebe ich ho,

Und wil mich niemer des verkunnen,

Sine sul mir ir minne gunnen.

Ja enbin ich ein heiden!

So bescheiden

Ist ir minneklicher lib.

Nu troͤste mich, das beste wib,

Mit dinen lichten ougen,

Das ich erkenne tougen,

Ob mich din sendebernder suͤsser munt

Mit gruͤsse welle tůn gesunt.

Si prisent alle sunder strit

Den sumer mit den blůmen rot,

Und hant des winters ane strit;

Si jehent, er habe gemachet tot

Vil vogelline in siner zit;

Swas ir genas, das was mit not.

Nu ist der winter alse kalt

Von uns gescheiden, sihe ich wol.

Gerichet loubes ist der walt,

Vil suͤssen sanges ist er vol.

Mit blůmen varwen mannicvalt

Du heide stet als si da sol.

Ist ieman der an herzeleit

Lebt, was der froͤiden siht!

Sich hant dú zit so wol geleit,

Das aldú welt genaden giht.

Min trome Gote sin geseit,

Ich wenne dest an mir en wiht.

Was singe ich tumber von der zit,

Dú mir so kleine froͤide git?

Mir sint die blůmen und der kle

Alsam der rife und ouch der sne;

Geliche liebe tůnt si mir.

Sich, Minne, das habe ich von dir!

Wer ich ein ungeduldig man,

So meniger, der nicht liden kan,

Ich were vor mengen jaren tot.

Sus lide ich kumberliche not

Mit zúhten, und tůn das so,

Das ich an dem ende werde vro.

Nu wil ich klagen minú leit,

Not, und al die swere, die ich han.

Mir wart von Minnen vorgeseit,

Wie si habe verderbet mengen man,

Den si mit keften úberlůt,

Und das ir, weis Got! niemen tůt

So rehte, der mit selekeit

Von ir gescheide ane herzeleit.

Der Minne dienen, ist ein not,

Die man wunder kume tragen mag.

Durh si leidet maniger tot,

Der ir doch mit herze trúwe pflag,

Sam Tristan (der mich rúwen můs,

Swie mir der rúwe niemer bůs

Werde), sam tet Pyramus,

Und ouch der kúsche Ypolitus.

Was hulfen alle die gezelt,

Die noh ie der Minne swert erslůg?

Es war so maniger erwelter helt,

Das ich můt uf Minne nie getrůg,

Und ich mich tumben des bewag,

Ine wolde niemer ganzen tag

Minnen dienstes sin gereit.

Nu stet es anders: dest mir leit!

Ich swimme an ein ze weres zil,

Und halde ein gar verlornes spil;

Fúr reht geschiht mir gross gewalt:

Des ist min rúwe manicvalt.

Ine bin so alt der jare niht,

So man mih gra des hares siht.

Mir ist der můt verseret so,

Das man mich niemer rehte fro

Gebaren siht. Wan sam der tůt,

Der niht erwern mag sin gůt

Ane flehen, wan fúre ims hin;

Der lachet herus und grinet hinin:

Alse selker smiere siht man vil

Von minem munde sunders herzen gir.

Ich tůn iu des ich niht enwil,

Und swas ich herze froͤide enbir.

Minne, das hastu getan!

Dune woltest mich erlan,

Ich enmuͤse haben wan,

Da es niemer kan vervan.

Ich han verkunnet trostes mich;

Gedinges bin ich worden arn.

Swer iemer muge, der troͤste sich;

Ich můs ze Truͤbenhusen varn!

Da erkennent alle min gemach!

Min beste rat ist we und ach.

Welch brůder mort er an mir rach,

Der mich in disen kumber trach?

Das dú Minne! Das si si

Von mir verwasin iemer me!

Wan lie si mich ir dienstes vri,

Als ich doch was gewesen e

Minú jar an disú zit!

Es ist ein jemerlicher strit,

Der niht anders trostes git,

Wan danne an dem ende tot gelit.

Nu bit ich Got, das er min not

Bedenke, das ich niht den tot

Genem dur alse selche tat.

Mir selben wil ich einen rat

Geben (het ichs e getan,

Ich hete noch ze liebe wan):

Das ist, sit ich bekumbert bin,

Das ich den lib und ouch den sin

Twinge; swer das beste tůt,

Und niht ze valsche stet sin můt,

Das ich des neme gůte war,

Und, als er vert, das ich so var.

Und tůn ich das, so weis ich wol,

Das mir gelinget, swar ich wil.

Warumbe niht? wand es so sol;

Wol tůnder lúte ist niht ze vil.

Wes entgulte ich armer dan,

Wirde ich ein reht tůnder man?

Ich sol von schulden hulde han.

Doch ist es, leider! so gewant,

Das menger mit vil gůter tat

Heiles lon noch nie bevant;

Und iender gut gelúke hat,

Dem dú schande hulde giht.

O we, das das nieman siht,

Alde es so rehte vil geschiht.

Seldebern, den heil verbirt,

Dem ie sin trúwe zuht gebar.

Mengem ungelonet wirt,

Des lib noch ie was schandenbar.

Das zeget manigen gůten můt.

Owe, so geschiht dem gůt,

Der niemer rehte wol getůt.

Doch rate ich eime gutem man,

Er habe sich nit sere daran.

Wir muͤssen doch von schulden jehen,

Und han ouch selbe wol gesehen,

Swer sin ding reht anevie,

Das es im dike wol ergie.

Wan vindet liehte der ein teil,

Dien niemer wil gevolgen heil,

So hilfet si doch zaller stunt,

Swanne sprichet al der welte munt:

Owe, das mit gůter tat

Der man niht gelúkes hat!

Minne, dir si vor geseit,

Wie heil, gelúke, selde tůt,

La dir iemer wesen leit,

Soldest iender han behůt.

Sit ane dich niemen si gemeit

Noch wesen mac, so sol din můt[41]

Dien besten lones sin gereit,

Und niht den andern alse gůt.

An dine genade wil ich mich

Ergeben, und si alles hin,

Swa du ie gesundest dich.

Vergib mir minen argen sin

Und ouch dú wort! La den gerich!

Ich weis wol, das ich schuldig bin.

Swas du gebútest, das wil ich

Leisten iemer uf gewin.

Von dir ensol ich noch enmac

Noch ouch enwil! das ist eht war.

Ich han enstanden, das din slag

Tůt kindes houbet grawú har

Halden; des ich mich bewag,

Ine wolde niemer minú jar

Dir gedienen ganzen tag.

Das rúwet mich, ich bin es clar.

Daran gedenke! des ist zit.

Ein man sol lassen sinen strit

Wider den (dest ere getan),

Der sine wer het gar verlan.

Ein man ist tusent manne her,

Die alle wen sin ane wer.

Alsus si ouch min wer verlan.

Ich wil zeinr andere rede van.

Ich mag ouch der vergessen nicht,

Von der mir disú not geschiht;

Das ist dú liebe frouwe min,

Von der sol nu dú rede sin.

Kunde ich mit fůgen minen můt

u. w.

S. Sammlung von Minnesing. Th. I. S. 42.

HER ŮLRICH VON GUTENBURG.

Vor dem Liede, das in der Samml. von Minnesingern abgedruckt ist, steht in der Bremischen Handschrift folgendes Gedicht:

Zedienest ir! von der ich han

Ein leben mit ringem můte,

Als ich nu lange han getan;

Und gan es mir dú gůte,

Dú mir tůt das herze min

Vil menger sorgen lere,

So wirt an mime sange schin

Der winter, noch dehein swere.

Ich wil si flehen unz ich lebe,

Das si mir froͤide gunne,

Und si mir lon nach heile gebe.

Si ist min sumer wunne;

Si seiget blůmen und kle

In mines herzen anger:

Des můs ich sin, swies mir erge,

Vil richer froͤiden swanger.

Ir guͤte mich vil lútzel lat

Dekeinen kumber muͤgen.

Der schin, der von ir ougen gat,

Der tůt mich schone bluͤgen,

Alsam der heisse sunne tůt

Die boume in dem touwe.

Sus senftet mir den sweren můt

Von tage ze tage min frouwe.

Ir schoner grůs, ir milter segen,

Mit eime senfte nigen,

Das tůt mir ein meien regen

Rehte an das herze sigen.

Des ist mir sanfter danne bas.

E mich verbere, sehent, das,

Ich trůg e alder welte has.

Er muͤget sich, swer mirs erban.

Ich si ir nie so froͤmde man,

Ich erdringe ir mere lones an!

Sol ich dekeine wile leben,

Mir wirt von ir vil lihte geben,

Darnach ein keiser moͤhte streben.

Das si mir underwilen tůt,

Das duhte ein andern man vil gůt;

Wan das doch hoher wil min můt,

Dem ich geziehen nienen mag.

Nu fúrhte ich eht der Minnen slag.

Ich erkennen nu vil mangen tag;

Er tůt mir leides dike vil.

Doch were ich gerne hin an das zil,

Da si da sol und lonen wil.

Nu, wol hin!

Es můs eht sin,

Und stige uf, das herze min!

Ich wene, ich iht engelte din,

Swenne ir zerehte wirdet schin,

Das ich lide disen pin

Von diner kur und diner bet,

Und ie mit zuhte schone tet

An widerwanc,

Sit mich erranc

Ir minnen swanc

In ir getwanc.

Nu ist ze lanc

Ir habedanc.

Das tůt mich kranc,

Des han ich mengen ungedanc,

Das lenget mir die kurzen tage,

Und núwent mir die alten klage,

Von der ich wande sin erlost.

Nu wil ich noch ir genaden trost

Betten, als ich han getan.

Ze heile muͤsse es mir ergan!

In enwil ir niemer abe gestan.

Doch troͤste mich min tumber wan,

Ein gůt gedinge, den ich han

Zer tugenden, der si vil begat,

Das si mich lihte niht enlat

Us ir gewalt.

Disen winter kalt

So ist bestalt,

Ich wurdes alt

Und sorgen balt

Und doch versalt

Ze manicvalt

Und were verlorn swar es noch galt.

Das swahte sere minen můt.

Nu růche ich, swas si mir getůt,

So lasse ich niemer minen strit.

Was ob si in scheidet an der zit?

Si sol es lan

Understan

Mit eteslichen dingen:

Das ist min rat.

Als es mir stat,

So enmac ir niht gelingen.

Swie si behabe an mir den sige,

So wissent, das ich tot gelige.

Des war, si sol

Gedenken wol,

Das es ir niht enzeme,

Ob si min leben,

Der ichs han ergeben

An ir genade, neme;

Si můs es iemer súnde han.

Des sol dú gůte mich erlan,

Dú mac sin

Gewaltig min:

Dest reht; ich bin ir eigen

Nu vil lange,

Swie es ergange,

Und ir gezeigen.

Des solt ich wol gewinnen fromen.

Dú gůte, dú mir hat benomen

Minen sin,

Der ich bin

Undertan,

Si růret mich an minen alten ban,

Den můs ich aber núwen.

Ich hupf ir uf der verte nach;

Mich leit ir suͤssen ougen schach,

Swar si wil.

Doch hoͤre ich vil

Von frúnden und von magen,

Warumbe ich schine,

In dirre pine.

Es enmac mich niht betragen,

Die wile ich weis in ir gewalt

Mines herzen trost so manicvalt.

Der ich pflag

Mengen tag,

Wie solde ich si verlassen?

Er irret sich,

Swer iemer mich

Darumbe wil verwassen.

Er schiede e Musel in den Rin,

E er von ir das herze min

Gar enbúnde.

Es ist in súnde,

Die mir niht geloubent.

Der ougen blic

Mich vil dic

Miner sinne roubent,

Die fúrhte ich als den donrslag,

Dem ich entwenken niene mag.

Ob ich die schoͤnen mac gesehen

In eime jare,

So enkan mir gůtes niht geschehen

Vor valscher luͤte vare;

Die nement des war,

Ob mir iht liebes widervar.

Es ist ein wunder, das ich trage

So kumberliche swere.

Alse dike so si miner klage

Mit genediklicher mere

Antwúrte git,

So froͤit den toren zaller zit.

Mit gůten sitten

Ich wil si aber und iemer bitten:

Frouwe, habe genade min!

Das zimt wol diner guͤte.

La mich ir iemer einen sin,

Der diner eren huͤte,

Als ich ie tet,

Und das niemer fůs getret

Us dime lobe,

Ich gelige under oder obe.

Si endarf niht merken, das ich strebe

Nach mines leides ende.

Ich můs es tůn die wile ich lebe.

Han ich es misswende,

Des enmag ich niet.

Min herze nie von ir geschiet,

Noch niemer wil,

Es gelde lútzel oder vil.

Nieman darf des wunder nemen,

Das si mich hat gebunden.

Ich enmac ir kreften niht gestemen;

So ist si obe, so bin ich unden.

Swas ich nu tůn,

Si hat bejaget an mir den růn,

Ich můs ir jehen.

Nu wol eht doch!

Es ist noch

Ie beschehen.

Alexander der betwanc

Dú lant von grosser krefte;

Doch můste er sunder sinen danc

Der Minne meisterschefte

Sin undertan,

Umb eine frouwen wolgetan,

Die er erkos.

Er enwart ouch nieme sigelos.

In eime wilden walde er sach

Sines herzen kúniginne:

Des muͤse er liden ungemach;

Er hete sine sinne

Vil nach verlorn.

Das ich die schonen han erkorn

Ze mime leben,

Des wirt mir lihte ein lon gegeben.

Nu wil ich aber bitten

Die gůten, als ich kan,

Dú mir mit schonen sitten

Und mir mit zúhten angewan

Von erst das herze min,

Das si sich bedenke noch,

Und rehter dinge pflege,

Und minen dienst doch

Nach gutem willen wege,

Und mich ir lasse sin

Gereit unz ich nu lebe,

Das ich niemer, swie es erge,

Dag von ir gestrebe,

Und das iemer me

Mine not und disen pin

Den ich nu lange dol,

Mit zúhten schone trage.

Des war joch tůt si wol,

Si endet mine klage,

Und wirt ouch verre schin

Ir guͤte und ir mange tugent,

Der vil verborgen wurde,

Solde ich verslissen mine jugent

Under dirre sweren burde.

Swenne si wil, ich bin gereit.

Si gebe mir ein geleit

Fúr kumber und fúr herzeleit,

Das ich ir ere si bereit,

Swar ich des landes iender kome,

Mit allen minen sinnen.

Des war, da wachset an ir frome,

Lat si michs lon gewinnen.

Ich enger niht grosser dinge zir,

Wan trostes mime leide;

Des han ich vil, swenne ich enbir

Ir suͤsser ougenweide.

Nu seht, ob es ein fůge si,

Swer mir die verteile.

Ich solde ir ofte wesen bi,

Wer es an mime heile.

Min leben wirt muͤlich und sur,

Sol ich si lange miden.

Das Floris muͤse durch Planschiflur

So grossen kumber liden,

Das enwas ein michel kumber niet,

Wan si gros ungeverte schiet,

Als es der alte heiden riet:

Si wart vil verre úber mer gesant,

Des můst er in mangú froͤmdú lant,

Da er si in eime turne vant

Von gůten listen wol behůt,

Da waget er leben und gůt,

Des gewan er sit vil hohen můt.

Das troͤstet mich, und tůt mir wol,

Von minem kumber, den ich dol:

Es geschiht gar swas geschehen sol.

Si sol wol wissen ane wan,

Swies mir darumbe sol ergan,

Wer si versendet z Endian,

Da were min varn vil bereit,

Das mer das lant und búrge treit,

Als rehte als ich si han erkant.

Swer mir nu leidet disú bant,

Der súndet sich und ert den sant.

Er kerte den Rin e in den Pfat,

E ich si liesse, dú mich hat

Betwungen, und doch schone stat

Von ir min herze, swies ergat.

Es duhte mich ein missetat,

Ob ich schiede alsus dervon.

Si ist miner trúwen wol gewon,

Unde weis si gar.

Swar ich var,

So můs ich dar

Nemen war,

Swenne ich getar

Vor einer schar

Ze nide gar;

Vor der so můs ich denken bar,

Und huͤten mich doch alle tage

Vil sere vor ir zungen slage

Und vor ir unrekante spehe.

Doch wil ich, das si sehe

Was mir geschehe,

Und wil dienen uf ir has.

Wolde si noch gelouben bas,

Das ich von ir niene wil,

Das were mir ein senftes spil.

Mines kumbers dest ze vil:

Was hilfet das, ob ich es hil?

Jo hat si mines lones zil

Gesetzet im wol tusent jar.

Ich můs verderben, des ist war!

Min arbeit

Mich niht fúr treit;

Mir ist verseit

Darnach ich streit;

Min herzeleit,

Das ist ze breit,

Das ich e leit;

Min lon, der ist noch unbereit.

Ich wene wol, mir si ze gach.

Si giht alrerst wan si dernach

Und versaget mir in spotes wis.

Des war, des hat si kleinen pris,

Das si mir git ze lone spot:

Si můs es iemer fúrhten Got.

Swas si mir tůt

Dast alles gůt.

Ich enmag ir niht entwenken,

Als es mir stat.

Doch swies ergat,

So solte si gedenken,

Das es guͤte niene zimt,

Das si mir gewerb und fůge nimt.

Si sprichet dike,

Das ich erschrike,

Froͤmdú wort von schimpfe;

Si tůt verdrert

Swes si gert

Vor den lúten mit gelimpfe.

Ich enmag mich schiere niht enstan,

Wan ich der sinne niene han

Bi mir gar;

Swar ich var,

So můs ich in ir lassen.

Des wirt wol schin,

Swenne ich den min

Guten morgen an der strassen[42]

Den lúten búte gegen der naht.

Ich ziere die zit gar ungewaht.

Es ist niht wunder,

Das ich sunder

Minen danc si mide,

Der ougen schin

Den kumber min,

Den ich nu lange lide,

Mit einem blike tůt verselt.

Ich han mir si vil rehte erwelt;

Ir vert mit der frouwen Sir de la Roschi Bise,

Die gesach nieman,

Er schiede dan

Vro, riche, und wise.

Ich wene wol, ir si alsam.

Wer moͤhte ir danne wesen gram?

Ich wil iu minen willen sagen:

Mac ich der gůten minne

Mit mime dienste niht bejagen,

Das ich niemer die sinne

Noch minen lib

Bekere an dekein ander wib.

Swie ich mich erhol,

Der gedinge tůt mir also wol,

Das ich wol weis, das si mir gan

Zedienen umb ir hulde.

Gewinne ich niht mere dran,

Ich wil si der schulde

Niht angehaben.

Swer mir ze rehte solde staben

Des einen eit,

Ich swuͤre wol, es were ir leit,

Sit ich der selde niene habe

Das si mir sanfte lone.

Ich enwil doch niht wesen abe,

Ich werde enbunden schone

Als ichs ger.

Ich můs iemer wesen der,

Der umbe ir heil

Ir treit ein schones leben veil.

Turius, der wart sanfte erlost

Von kumberlichen pine;

Das was sines herzen sunder trost,

Das er lag dur Lavine

So schone tot;

Der endet schiere sine not

In eime tage,

Die ich nu mange jare trage.

Ich weis wol, soltes sin

An dem gelúke min.

Ir guͤte, dú ist so manicvalt,

Si tete mich noch froͤiden balt.

Ich enwas niht selden los,

Do ich si mir erkos

In disem userkornen don

Uf gůten riche schonen lon.

Jedoch swie es mir erge,

So můs si iemer me

Nach Gote sin min anebet,[43]

Wan si niht wan gůt getet.

Ich ergibe mich und enbar

An ir genade gar,

Das si mir (darnach ich strebe)

Ein wunnekliches ende gebe.

II.

Ich horte ein merlikin wol singen u. w.

(S. Samml. von Minnesing. S. 48.)

SCHENK ŮLRICH VON WINTERSTETEN.

Vor der aus der Mitte herausgerissenen Strophe, womit sich die Lieder dieses Dichters in der Samml. von Minnesing. anfangen, steht in der Bremischen Handschrift folgendes, für dessen Vertheilung unter VIII. Numern der Herausgeber verantwortlich ist (denn in der Handschrift läuft alles in Einem fort), ohne jedoch auf seiner Vertheilung zu bestehen.

I.

Uf lieben wan

Ich alles gan

Der schonen, under ougen.

An allen wank

Ist min gedank

Bi ir, dast ane lougen.

Nu dinge ich doch,

Das si mir noch

Genade welle erzougen;

Und wurde mir

Ein grůs von ir[44]

Mit minnebliken tougen,

Seht, so wurde

Mine burde

Von mir also bar verjagt,

Das ich tumber

Minen kumber

Hete viel schiere davon verklagt.

Frowe Minne,

Twinge ir sinne,

Und ir herze, das si mir

Mit ir willen

Muͤsse stillen

Sende not, die ich han von ir.

Ich han

Den wan,

Der mich niht lat

Von dir.

Tů mir

Nu selhen rat,

Das mine

Pine

Wider dich

Und herzen

Smerzen

Enden sich.

Frouwe, din lachen

Das mehte mir machen

Der froͤiden vil, swachen

Die not,

Von der ich wachen

Můs dike dien sachen,

Davon min herze můs krachen.

Der tot

Were lihte

(Ob ich die bihte

Hete getan) mir besser noch vil,

Danne ich were

Lange in swere,

Und ich niht kunde wissen das zil;

Wande ich lange

Leitlich blange,

Darzů súftebernde klage

Solde miden.

Ich můs liden

Disen kumber alle tage.

Nu wol!

Ich sol

Vil gerne han

Dur dich,

Swas mich

Mag not bestan.

Nieman kan min gemuͤte

So gar betwingen.

Kúniginne,

Hilf darinne

Minem sinne,

E das ich tumber wuͤte.

La mir gelingen,

Troͤsterinne!

Sit ich brinne

In diner minne,

Als in der gluͤte

Ich mich verbruͤte.

Wil mir niht din roter munt

Und ouch din guͤte

(Die Got behuͤte!)

Tůn ein lieplich kússen kunt,

So ist min swere

Klagebere

Minen frúnden und ouch mir.

Ich můs sterben,

Ald erwerben

Froͤideberndes heil an ir.

Tůt si

Mich fri

Von selher not,

Das ist

Ein list

Mir fúr den tot.

Vil suͤsse,

Buͤsse

Mir den pin.

Du solt

Mir holt

Von schulden sin.

Wan ich dich meine,

Vil suͤsse, reine,

Mit trúwen. Froͤide, erscheine

Du mir,

Das ich alleine

Die swere iht beweine.

Min wille der ist niht kleine

Gegen dir;

Davon kere,

Dur din ere,

Mir zegute minen sanc.

Wil din hulde

Min unschulde

Erkennen, so ist min truren krank.

Frouwe, ich kroͤne

Dine schoͤne

Sunderbar fúr ellú wib;

Vor in allen

Můs gevallen

Mir din minneklicher lip.

Nemt war,

Wie gar

Ir kúscher můt

Vor schanden

Banden

Ist behůt.

Si hat

Den rat,

Der froͤide birt,

Swie er mir hernach kume wirt.

Davon truret

Und suret

Mir der můt und ouch das leben.

Junge und alde,

Erteilent balde,

Ob si mir helfe sule geben.

Die frechen

Sprechen

Alle: ja.

Des war,

Min har

Wirt anders gra.

II.

Sumers zit

Uns git

Ane widerstrit

Vil der wunnen in dien landen wit.

Kalder sne

Tet e

Kleinen vogelin we;

Gar zergangen was der gruͤne kle;

Davon gar

Stůnt bar

Liehter blůmen schar

Der anger, unwunneklichen var.

Seht, der hat

Dú wat,

Dú ime wol anstat,

Von des liehten meien hant getat.

Der kalde winter lanc

Dú kleinen vogelin twanc,

Darzů allen ir gesanc,

Das ir hoher můt wart kranc:

Des habe er undanc!

Darzů der gruͤne walt

Des argen rifen kalt

Harte schedelich engalt,

Wan sin loup das wart gevalt

Vil ungezalt.

Der vogellinen dos

Und ir vil suͤsser kos

Der ist also gros.

Werst an froͤiden ir genos?

Si sint sorgen blos.

Also were ouch ich,

Bedehte sich

Ein wib dur mich.

Die hat gegen mir ir gerich,

Dast ungemenlich:

Dis min klage,

Die ich trage;

Min herze stat in jamers wage.

Dirre pin

Můs sin,

Leider! lange min,

Wil si mir niht tůn helfe schin.

Alsus hat min frouwe gůt

Versenket minen můt,

Das er, leider! ist unfrůt.

Was dogt mir des meien blůt,

Ob si niht entůt

Durh mich ein kleine ding,

Das si spreche: froͤlich spring!

Ich wil lonen dir, nu sing!

Frowe Minne, si des twing.

Ane widerwing!

Mine sinne,

Minne,

Die ouge ich dir.

Verborgen

Sorgen,

Sich! das gist du mir,

Wan ich han von ir

Nicht me,

Wan we,

Sit minne mir gebot,

Das ich kunne

Unwunne

Und seneliche not.

Bit, ir mundel rot

Vil suͤsse

In gruͤsse

Lache mich an;

So ist sorgen vart

Mir gar verspart,

Von leide

Ich scheide

Senender man.

Des war, mir wart

Nie wib so zart.

Mir were

Kumber gar unmere,

Swie ir munt, nach rosen wol gevar,

Der swere

Tete mich lere,

Die ich han verborgen lange har.

Uf so rehten lieben wan

Wil ich froͤide han,

Und můs min truren furder stan.

Ich wil ane sorge leben,

Nach dien froͤiden streben.

Wil si mir hohgemuͤte geben,

So gewinne ich froͤiden vil,

Ob mir dú liebe wil

Teilen ir minnespil,

Nach der ich da harte kil

Ane trostes zil.

Si ist der minne ein bluͤndes zwi;

Swa ich in dem lande si,

So gedenke ich dike: Ahy!

Solde ich ir nu wesen bi,

Sorgen wurde ich fri.

Ir blik

Den strik

Mir hat gerihtet der minne, des war,

Darin

Ich bin

Gevallen gar an valschen var.

Wil si,

So ist vri

Min lip von selhem bande.

Ir jugende

Tugende

Erwelt hat, fúr die schande.

Wan sol

Vil wol

Gegenden ir ze den besten in dem lande,

Swer reht

Erspeht

Ir lip, und ouch ir kúsche wol erkande.

La, frouwe, mich niht engelten,

Das ich bin tumber sinne,

Wan ich vergisse doch selten

Ze gůte din; darinne

Min můt

Ist gůt,

Swie tumb er si gegen dir, dast ane lougen.

Nim war,

Wie gar

Ich dir ze dienste bin gebunden tougen.

Swenne ich

An dich

Gedenke, so ist min sorgen gar verswunden;

Darnach

Wirt gach

Ze den froͤiden mir, alda ze denselben stunden;

Also

Wirt fro

Gar min herze und min gemuͤte.

Si hat

Den rat,

Den man da heisset wibes guͤte.

Ir ougen

Vil tougen

Mir blikent dur min herze.

Ir lachen

Kan machen

Mir bitterliche smerze.

Si wil

Mich vil

Nach uf den tot betwingen.

Wil si

Dabi

Mir swere niht enringen,

Son kan

Nieman

Gepruͤven wol min hoveliches singen.

Nu wende

Und ende

Mine klage! La mir

An dir

Gelingen!

Frouwe,

Schouwe

Enzit die not,

E liebe

Enkliebe

Das herze min.

Dú swere

Were

Min bitter tot.

Vil suͤsse,

Buͤsse

Mir den pin!

Nu sih

An mich,

Troͤsterinne!

Din minne

Die sinne

Hat mir also hin genomen,

Das ich ir gar

Sten leider bar.

Dur dich

Wil ich

Leben; darinne

Beginne!

Gewinne

Der froͤiden mir la wider komen,

Das truren schar

Hin balde var,

So wolde ich froͤlich singen

Den kinden disen reigen,

Tanzen, lachen, springen

Bi pfaffen und bi leigen.

Ich moͤhte,

Toͤhte

Mir min sanc,

Noch mere han gemachet

Von ir,

Dú mir

Tůt froͤide kranc,

Und mine sinne swachet.

Ich sage

Die klage

Dien frúnden min!

Die mugen das alle schouwen,

Das nie

Vervie

Min langer pin

Gegen miner lieben frouwen.

Nu wende,

Vol ende

Und swende

Die not;

Des war, ald ich verdirbe.

Ich dulde

Ane schulde

Nach hulde

Den tot,

Ob ich iu niht erwirbe.

Sol min singen

Mir niht bringen

Wol gelingen,

Gůt gedingen,

Ane twingen?

Das lat úch erbarmen!

Min trost ist kleine.

Frouwe reine,

Die ich meine.

Froͤide erscheine

Mir alleine!

Troͤste mich vil armen!

Got wolde,

Ich solde

An den blanken armen,

Nach lone,

Schone,

Minnekliche, ganze naht erwarmen;

So were

Unmere

Swere

Mir, und wolde ouch von dien armen.

Heya, nu hey!

Geschiht es niht,

So ist gar ein wiht

Min froͤide, unde můs min herz enzwei.

III.

Nement war,

Wie gar

Was der meige vollen braht,

Des wat

Zergat,

Die der sumer hat erdaht.

Der sneit

Sin kleit

Beide uf berge und in dem tal,

Da sanc

Erklanc

Der viel lieben nahtegal,

Aller sorgen fri,

Uf gruͤnem zwi.

Ir můt

Was gůt,

Ze sange snel,

Da bi wunnen spil;

Si donde vil;

Ir stimme dú was hel

Und was froͤiden vol;

Si sank so wol;

Ir schal

Ergal

Al in den walt.

Kleiner vogelin dos

Der was so gros;

Si waren froͤiden balt.

Ir singen

Kunde bringen

Der welte hohen můt.

Du ouwe

Mit touwe

Stat, leider! unbehůt.

Der anger

Niht langer

Mag blůmen lieht getragen.

Dú heide

Stet leide;

Des můs ich lerchen klagen.

Dien kinden

Bi linden

Der schatte ist nu benomen.

Dú kunnen

Der wunnen

Nu leider niht bekomen.

Ir krenzel,

Ir swenzel

Die waren so gemeit.

Der winder

Hin hinder

Si twinget, dast mir leit.

Ich tumber!

Den kumber

Liese ich wol also sin,

Gebe húre

Mir stúre

Min suͤsse troͤsterin,

Dú wendet

Und endet

Wol mines herzen not.

Nein, suͤsse,

Das buͤsse

Mit dinem munde rot.

Din smieren

Kan zieren

Schone dich, vil selig wib.

Din lachen

Machen

Kan wol senden siechen man.

Din ougen

Vil tougen

Kunnen wol dur ganzen lip

In herzen

Smerzen

Fuͤgen. Frowe, sich daran!

Din jugende

Mit tugende

Hat so minneklichen schin;

Ich kroͤne,

Schoͤne,

Dich fúr al des meien blůt.

Ach, reine,

Nu meine

Mich, vil liebe frouwe min!

Von leide

Scheide,

Troͤste minen senden můt!

Und tůst du das,

Deswar so wirt mir bas,

Und swindet mein leit;

Sit ich nie vergas,

Swa man wibes guͤte mas,

Diner werdekeit.

Ich bin dir undertan,

Und dabi sunder wan

Dir ze dienste erborn.

Du solt geniesen lan

Mich, frouwe, das ich han

Dich mir userkorn.

Vor in allen

Gevallen

Můs mir din wiblich sin.

Nu ahte

Und trahte,

Wie ich din eigen bin,

Und lasse

Die strasse

Mir noch ze wunne zemen.

Din ere

Von sere

Sol mich ze froͤiden nemen.

Dú Minne

Mir sinne

Enzuket mit ungewinne;

Est wunder

Besunder,

Behabe ich den lip darunder.

Vil suͤsse,

Das buͤsse,

E das ich verderben muͤsse.

Ich stirbe,

Verdirbe,

Ist das ich niht heil erwirbe.

Sus můs ich in sorgen

Vil dike worgen

Den abent, den morgen

Und ellú zit.

Dú liebe, dú reine,

Die ich da meine,

Mir fuͤget den klagelichen strit.

Ach, frouwe, gedenke!

Die swere verkrenke,

Sit ich mit dienste niht wenke

Von dir!

Dur wiplich ere,

Mir leit verkere

Mit fůge, nach hovelicher gir!

Ach, frouwe,

Din schouwe

Gelichet den rosen im touwe,

Din guͤte

Der bluͤte

Des meigen, und din gemuͤte.

Nement war

Gar

Dar,

Wie mich dú schone twinget, swar ich var!

Min můt

Gůt,

Frůt

Wirt an mir, ob si lobeliche tůt.

Ich singe,

Ich ringe

Mit manigem dinge

Nach lones stat.

Dur trúwe,

Gip núwe

Mir froͤide, der ich dich ie bat.

Nu lone

Mir schone,

Dur rehte wibes krone,

Und wise

Mich lise

Ze froͤiden, sit ich dich prise.

Mit willen

Solt du mir stillen

Die senden not und mine klage;

So wurde

Mir jamers burde

Geringet, die ich da trage.

Mirst ande,

Das dir ze pfande

Min herze stet so lange her;

Das lasse,

Nach Minnen masse,

Mir ledig: dast min ger.

Nu blike

Mir dike

(Das loͤset die minnen strike)

Mit ougen

Vil tougen,

Und troͤste mich sunder lougen:

Dú sint so klare,

Das sprich ich zeware

Vil offenbare,

Und ist wol schin.

Din lieht antlútze

Fúr truren nútze;

Das ist an dem gelouben min.

Din munt, nach rosen

Gevar, kan kosen

Wol sunder losen

Der tugende wort.

Nu gruͤsse

Mich, suͤsse,

Mit suͤssem gruͤsse,

So vinde ich miner froͤiden hort.

Swer wunne

Kunne

Rehte spehen

An wibe

Libe

Und ouch ir můt,

Ir zúhte:

Túhte

Můs ir jehen.

Vor schanden

Banden

Si ist wol behůt.

Mit klůgen

Fůgen

Si ist erzogen,

Nach eren

Leren,

Tugende rich.

Ir wirde

Girde

Ist unbetrogen.

Ir minne

Sinne

Hat si zúhteklich.

Lop kan si verschulden wol,

Davon man ir sprechen sol:

Si ist tugende vol.

Dú reine fruht,

Ach, si ist so rehte gůt!

Doch besweret si mir den můt;

Dú froͤide hat von mir fluht.

Minne, suͤsse trosterin,

Tů mir diner helfe schin,

Alder ich bin tot!

Twinc die lieben alse mich,

Oder es wirt ungemenlich.

Ich lebe in sender not;

Mich krenket,

Versenket,

Swie Minne min niht gedenket,

E liebe

Zerkliebe,

Min herze gar zerstiebe.

Ich bin verseret;

Dú sorge mir meret,

Der froͤiden gedinge si keret.

Hindan

Wil Minne verleiten

Mit arebeiten

Mich also froͤidenlosen man.

Ich han nu lange

Mit minem gesange

Der froͤiden getrange

Gevolget nach;

Des ist dú Minne

Min meisterinne,

Und ist ir von mir gach.

Nu singen,

Nu singen!

Dannoch harte erspringen,

Den reigen,

Den reigen,

Pfaffen und leigen!

Nu lasse,

Nu lasse

Uns reigen an der strasse!

Die rifen,

Die rifen

Die went uns hie begrifen;

Hoppen

Und zoppen

Ze der stuben, da wir vinden die.

Gesungen,

Gesprungen

Wirt da bas danne hie.

Schouwen

Die frouwen!

Die helfent uns den reigen tretten.

Wunder

Bi sunder

Kumt ir dar ungebetten:

Gůte, Gůte,

Mit vil hohem můte;

Gese, Gese,

Darzů Agnese;

Gisel —

Ein risel

Hat si gemachet also glanz;

Jútel —

Ein bútel

Den bringet si an den tanz;

Hille —

Vil stille

Dú kumt geslichen zu zuns dar;

Anne

Kumt danne;

So gros so wirt dú schar.

Stolzen leigen, also tůt!

Singent dis gedoͤne!

Claren megde, ir lant niht abe,

Ir trettent an den ring!

Jederman neme in den můt

Sine frouwen schoͤne!

Jeder dirnen wirt ein knabe,

Alsust ein jungeling.

Lant den seiten

Vor bereiten,

Wie man da palliere.

Swer niht langen

Múge gedrangen,

Der ge fúr die túr.

Nach der gigen

Sol er sigen.

Swer es kunde wieren,

Lassa wichen;

Er sol slichen

Schone in lobes kúr.

Erwinden!

Erwinden!

Es wirt den kinden

Ze lenge, ze lenge,

Und ouch ze strenge.

Verirret,

Verirret

Ist der seite erkirret.

Nu hoͤren!

Nu hoͤren!

Er wil uns ertoͤren.

Gesungen

Den jungen

Het ich wol me; was hulfe das?

Swer gerne

In lerne,

Dem gelinge deste bas.

Min herzen

Von smerzen

Wil mit den seiten rehte enzwei;

Des wuͤfet

Und ruͤfet

Es lute: heja hey!

IV.

Swer die wunne

Wol pruͤven kunne,

Der si des gemant;

Wan dú zit ist wunneklich gestalt.

Wan mag schouwen

An velt, an ouwen;

Das ist mir bekant;

Die sint komen us leide.

Vogel singen

Vil suͤsse erklingen

Hoͤrt man úberal,

Sit ir stimme dússet dur den walt.

Wie gar schone

In suͤssen done

Schellet nahtegal

Und lerche úber heide!

Der anger lit

An allen strit

Mit blůmen wol bespreit;

Der meie dise varwe git.

Dú heide lachet,

Und machet

Maniger hande kleit;

Das ir truren verswachet.

Der boume blůt

Dú ist so gůt,

Und ouch das gruͤne gras,

Das dien ougen sanfte tůt.

Dem wit gevilde

Rifen wilde

Sint (swie vil der was)

Und snewes unbilde.

An disen stunden

Sint gar enbunden

Unden

Und ouch oben berg und alle gruͤne tal.

Noch ist min swere

Gar súftebere;

Were

Dú zergangen, seht so wold ich singen.

Ich můs in sorgen

Vil mangen morgen

Worgen,

Sit ir munt mich niht entroͤstet úberal;

Des lide ich kumber,

Ich sender tumber,

Krumber

Not mich niht mag senelicher twingen.

Von Minne

Sinne

Mir zerrinnen wil!

Si hasset,

Lasset

Mich gar ane zil!

Dú reine

Meine

Danne ein kleine

Mich,

Und stille

Ir wille

Wol bedehte sich;

So wurde ich fro.

Und keme es so,

Das mir noch wurde ir trost;

Seht, so stuͤnde min gemuͤte ho.

Wil si mir swenden,

Sorge wenden;

So wurde ich erlost,

Und muͤste min leit sich enden.

Si, selig wib,

Der nu min lib

Ist lieblich undertan,

Dú mag vil wol heissen leit vertrib.

Si, reine frouwe,

In liehter schouwe,

Sol mir froͤide lan!

Si gelichet rosen in touwe.

Ich kroͤne,

Schoͤne,

Frouwe, dich!

Du bist so minneklich!

Din jugende

Tugende

Nietent sich,

Und bist ouch froͤidenrich!

Mit eren

Meren

Kanst du wol

Din lob, mit wirde vol.

Vil suͤsse,

Buͤsse

Sende dol,

Sit ich dir dienen sol!

Ich kúnde

Súnde,

Dú du tůst an mir,

Sit das du mich búnde

In selhe gir.

Ich schine

In pine:

Das ist leider war

Uf dú besten trúwen mine.

Nu, geile,

Heile

Mir die wunde min;

Von der sorge meile

Wolde ich sin.

Ich lide

Nide

Von dir sunderbar;

Selig frouwe, die vermide,

Und gib mir rat.

Min herze hat

Gedinge hin ze dir,

Swie din guͤte mich in sorgen lat.

Ich moͤhte ersterben,

Sol min werben

Niht erschiessen mir,

Und in leide verderben.

Es ist ein not,

Sol ich den tot

Alsus verdienet han,

Sit die Minne truren mir gebot.

Dú Minne stoͤret

Und toͤret

Mich an allen wan,

Sit das si mich niht enhoͤret.

Es ist ein wunder,

Sol ich bisunder

Under

Minen danc verderben. Seht, das můs ich klagen.

Ach, frouwe, scheide

Von seneden leide

Beide

Mir den můt und alle mine sinne;

Sit ich erschrike,

So dine blike

Dike

Mir ein minnekliches lachen went versagen,

Und ich gedenke:

Ach, sender Schenke,

Wenke

Niht an dienste, so bejagest du minne.

Durh ere

Kere

Noch von sere

Mir

Gemuͤte!

Guͤte

Wiblich niht enbir,

Und mache,

Lache

Sorge swache!

Ahy,

Min burde

Wurde

Lihter vil dabi.

Vil reine fruht,

Dur dine zuht

La mich in froͤiden sin;

So hat ellú sorge von mir fluht.

Din munt, nach roͤte

Var, von noͤte

Neme das herze min,

E di Minne mich ertoͤte.

Nu sich darzu,

(Es niht ze frů)

Vil reine ein selig wib,

Alder in weis niht was ich sender tů.

Ach Got, wie lange

Selke plange

Hat min sender lip!

Nu hilf, das dú zergange!

Nement war

Gar Dar, War

Mir

Das herze meine

Den muͤt,

Wie kleine

Min guͤt

Mich tůt

Behůt,

Sit ich liden

Můs also langes niden

Von ir.

Ir has Las Bas

Das herze min unmeret

Dabi,

Und sweret

Sam bli,

Swie vri

Ich si.

Ir gemuͤte

Hat niht guͤte

Gegen mir.

Nu ist min

Sin Hin In

Senelichen dingen,

(O we!)

Sit bringen

Mag kle

Niht me,

Als e,

Selche wunne,

Davon mir truren kunne

Zergan.

Min strit

Git Nit, Sit

Das ich nach ir minne

So ranc,

Und sinne,

Betwanc.

Ir danc

Ist kranc

Al dar under

Gegen mir, sunder

Wan.

Minneklichú reine,

Nu sich,

Und meine

Du mich!

Sit ich

An dich

Sinne kere,

Du gib mir suͤsse lere

Und rat!

Lat si mich in kumber

Bestan,

Ich tumber

Můs lan

Den wan;

Ich han

Grossen smerzen,

Den si in herzen

Mir lat.

Ach, ich tore!

Sit ir ore

Niht enpfahet

Und versmahet

Minen sanc.

Dú vil schoͤne

Mine doͤne

Hoͤret kume.

Ich versume

Manigen danc;

Sit ir ougen

Nicht wen ougen

Mir ein smieren

Und ein lieblich zwieren;

Davon

Můs ich erben

Ein verderben.

In den sinne

Ich bin minne

Niht gewon.

Ich trage

Die klage

Vil minneklich,

Swie kleine

Dú reine

Mir froͤide git.

Gůt,

Můt

Túret mir,

Und herzen gir.

Swer

Der

Niht enhat,

Das gros unrat.

Wie sol min herze

Fro bestan,

Sol mir der smerze

Niht zergan,

Und mir niemer froͤide gelan?

Sol ich den kumber iemer han,

So lebe ich gar

In sorgen schar.

Sol ich verderben

Von der tat,

Das mich min werben

Niht vervat;

Git mir Minne vil kleinen rat:

Min můt darinnen trurig stat,

Und ist min leit

Unmassen breit.

Ich bin ane

Lieben wane.

Minnen drúke,

Dast ein ungelúke

An mir.

Ich gedinge,

Das si bringe

Mir noch wene,

Trost erkenne

Bas an ir.

Wie gezeme,

Das si neme

Mich in hulde

(Sit ich schulde

Niene trage),

Und si spreche,

Was si reche,

Dú vil klůge,

Das si fůge

Mir versage!

Got wolde,

Solde

Ir múndel rot

Mich erlan

Herzlicher not!

Minne

In sinne

Mir gebot,

Das ich han

Kumber uf den tot.

Frouwe, swache

Mir dú leit,

Und mache

Mir froͤide breit!

Von der sache

Wirt ich gemeit;

Und wirt mir heil,

So bin ich geil.

Gunne

Wunne

Mir, dur zuht;

Sost von mir ellú ungenuht.

Lasse

Masse,

Reine fruht,

Mir;

Zu dir

Hat min herze fluht.

Trut du, setze

Mich us klage,

Und ergetze

Mich alle tage,

Und letze

Mir sorgen wage.

Und kumt es so,

Ich wurde fro.

Supfe,

Gupfe

Leit hindan!

Wise

Mich lise

Uf minnen ban,

Sit ich noh froͤide nie gewan;

So wirt min můt

Unmassen gůt.

Swinde

Embinde

Mir den strik!

Loͤse

Und oͤse

Den selben rik,

Den mir tůt diner ougen blik.

Do ich dich sach,

Do schrei ich ach.

Lieb an ende,[45]

Sorge wende

Mir vil armen;

Wan erbarmen

Zimt dir wol.

Davon leite

(Niht enbeite)

Mich von swere;

Gerne ich were

Froͤiden vol.

Swa quale

Nimt wale,

Da wirt man gra.

Nie

Die

Pine min sendes herz verlie.

Tů, frouwe,

Sorgen mir noh bůs.

Vil gerne ich schouwe

Dinen grůs.

Unz uf den fůs

Dir nigen můs,[46]

Vil selig wib,

Min sender lip.

Sit ich dich prise,

Frouwe gůt,

Von leide wise

Mir den můt.

Vor sorgen flůt

Bin ich behůt,

Und wirt mir schin

Dú helfe din.

Gerne ich sunge

Me, und lunge

Dien, die singent

Und bringent

Disen sanc,

Durh ir ere

Fur min lere

Werdent hoͤne;

Dis gedoͤne

Ist in zelanc.

Ich gedinge,

Der ich singe,

Das si lerne

Doch vil gerne

Disen tanz.

Dú vil gůte,

Wol gemůte,

In ir jugende

Hat an tugende

Lobes kranz.

Wol uf, ir kint,

Sint

Fro! So

Můs Bůs

Sorgen sin.

Truren var hin!

Sin,

Můt Tůt

Geil Heil

Werden schin.

Wa ist nu Ůt,

Und Gůt,

Und tůt

Uns sorgen bar?

Júte und Hille

Und Wille,

Stille

Koment dar!

Springent froͤlich an den tanz!

Húre ist der sumer glanz,

Da wirt dú froͤide ganz,

Man siht da manigen kranz.

Frouwen, nu singent,

Und dringent,

Und springent

Húbsche trítte!

Rihtent ze minne

Die sinne

Darinne

Mit gůten sitte!

Pfaffen, leigen, trettent an,

Dien Got der selden gan.

Er ist gar ein selig man,

Der mit dien lúten kan.

Under dien linden

Bi húbschen kinden

Sorge můs verswinden.

Lachen

Machen

Kunnen,

Wunnen

Wol dú kint.

Eren den meien!

Singent und reien!

Ir sult úch zwien,

Heze, Meze,

Nese, Gese,

Goͤtelin!

Ich wil hoͤren, es ist zit.

Ich han der lúte nit,

Wan des reien ist ze vil;

Des ich erwinden wil.

Ir sint muͤde, dunket mich,

Es ist ungemenlich.

Schrient alle: heja! hei!

Nu ist der seite enzwei.

V.

Minne twinget mich

Mit aller kraft, das ich

Aber singe

Von der frouwen min,

Die ich minnen můs.

Wil si, so mag ir grůs

Machen ringe

Mir den pin.

Minne, wilt du mir,

Nach mines herzen gir,

Kumber wenden?

Ach, wan keme es so!

Der ich dienen sol,

Dú mac mir harte wol

— — — —[47]

Fúr die grosse dro.

Minne mac den man,

Den si des vil wol gan,

Trost erzeigen,

Dem sis willeklichen tůt.

Davon kapfe ich dar.

Nu nimet si min niht war;

Si wil neigen

Mir den můt.

Minne, tůs, durh zuht,

Und twing die reine fruht,

Das si meine

Mich uf herzelieben trost!

Ich bin ane wer;

Ir kraft ist mir ein her.

Ob ich seine

Wirde erlost.

Minne ist so gestalt,

Und so manicvalt,

Si, si, mich machet alt;

Dazů bin ich gezalt

Von ir schulden.

Si tůt mir so we!

Minne, hilf enzit,

Sit mir sorge nit

Gar ane widerstrit

Nahe dem herzen lit.

Ich můs dulden

Sende klage.

Minne, tů mir schin,

Dur die fůge din,

(Sul ich din eigen sin)

Froͤide dem herzen min

Eteswenne,

Das mir leit zerge.

Minne, sit das ich dol

Grosser sorgen zol,

Mache mich froͤiden vol,

Sit ich so rehte wol

Leit erkenne

Manige tage.

Minne, hilf enzit!

Min froͤide nider lit

Nu vil lange,

Sit du mich niht troͤsten wilt.

Ich bin unerlost!

Ich habe uf dinen trost

Mit gesange

Herzeleit!

Minne, tů min war,

Oder ich sten froͤidenbar

Iemer mere,

Swa ich in dien landen bin.

Nu gedenke an mich,

Und troͤste minneklich,

Durh din ere,

Mir den sin!

VI.

Ach, herzeliebe Minne,

Nim war,

Wie gar

Mine sinne

Stellent uf die gewinne,

Das mir froͤide niht zerrinne.

Solde ich die minneklichen

Frouwen

Schouwen

Tougelichen,

Sorge mir muͤste entwichen,

Und froͤide mich herzeklichen.

Ich vil tumber

Kumber

Můs liden;

Miden

Wil mich der froͤiden gemuͤte.

Lieb, nu scheide

Sorg und leide,

Beide,

Von mir din guͤte!

Sit ich singe,

Ringe

Mir swere!

Lere

Froͤiden bin ich zaller stunde;

Davon lache,

Sorge mir swache,

Mache

Froͤide mir kunde!

Wa sol ich liebe nu vinden,

Sit mir

Von dir

Froͤide wil swinden?

Lieb, du solt mich enbinden!

Daran solt du niht erwinden!

Noch gib mir froͤiden lere

Lieplich,

Sit ich

Dur din ere

Sanc singe, swar ich kere;

Scheide mich von herzen sere!

Schoͤne

Doͤne

Singe ich dir gerne.

Lerne,

Frouwe, den sanc, die ich kroͤne.

Swinde

Enbinde,

Mich! an den herzen

Smerzen

Lide ich von kinde.

Trut, la mich min gemuͤte

Ougen

Tougen

Diner guͤte,

E das ich sender wuͤte.

Minne, mich davor behuͤte!

Sol mir din suͤsse suren,

Min můt

Der tůt

Niht wan truren.

Bi selken nachgeburen

Mag ich langer niht geturen.

Davon wende,

Swende

Mir sorge!

Borge,

Frouwe, mir lieblich vor swere.

Dine blike

Mident mich dike.

Schrike

Sint mir gevere.

Owe waffen!

Strafen

Ich dulde.

Schulde

Machet mir niht, wan dú Minne.

Frouwe, sweine

Die not alleine!

Meine

Noch mine sinne!

Trut, minneklich und reine, vil suͤsse,

Gar seldenrich, ob din guͤte mich gruͤsse!

Io bin ich tot,

Sol ich lieb niht erwerben!

Es ist ein not,

Sul ich alsus verderben.

VII.

Ouge mir, Minne,

Gewinne!

Nicht sinne

Mir swache!

Rose in dem touwe,

Nu schouwe

Mich, frouwe,

Und lache!

Vor ungemuͤte

Behuͤte

Din guͤte

Mir sinne!

La mir gelingen

An dingen,

Dú bringen

Gewinne!

Selig si din roter munt!

Solt ich den kússen tusent stunt,

Ahi!

So wer ich von sender not;

Sus bin ich an froͤiden tot,

Owi!

Tugentrichú, reinú fruht,

Ir sunt ougen alle zuht

An mir!

Ich wolde ane sorge sin,

Wurde wir genade schin

Von ir.

Frouwe, nu tů mir so,

Das ich vil sender werde fro.

Du bist so tugentrich:

Wilt du, so můs zergan

Min leit und ouch min trurig wan,

Und froͤwe mich herzeklich.

Minne, tů minneklich!

Ze liebe lieblich fůge mich,

Ald ich sten froͤiden ane,

Und schrie heja hei!

Min sendes herze můs enzwei,

Und lebe in leiden wane.

VIII.

Ich wil aber disen sang

Singen der Minne;

Ich mag niht geswigen me.

Mir ist wirs danne e;

Nie so sere mir betwang

Lib und sinne

Dú vil liebe, sunder wan.

Ach, wie sols ergan?

Ach Got, sol ich

Sus verderben?

Lat si mich

Niht erwerben,

Das mich gruͤsse ir múndel rot,

Seht, so bin ich tot.

Lieb sich darzů!

Es ist niht ze frů!

Also tů!

Ach, was ich sorgen trage!

Owe, wie cleine

Mich vervahet swas ich kan!

Ach, ich sender man!

Ach, was hilfet swas ich sage!

Owe, dú reine

Tůt min herze tragen vro.

Ach, wie kumt das so?

Ach, Minne, la

Mir gelingen!

Ich bin gra

Von den dingen,

Das dú liebe smehet mich

Also vesteklich.

Lieb sich darzů!

Es ist niht ze frů;

Also tů!

Mir ist ungemach beschert

Lange mit leide,

Das ich niht gerůwen mag

Weder naht noh tag;

Ich bin froͤide gar behert.

Minne, nu scheide

Mich von sender arebeit,

Die min herze treit!

Ach, reine fruht,

Das verkere!

Wiblich zuht

An mir ere!

Sit ich gebunden bin,

Troͤste mir den sin!

Lieb, sich darzů!

Es ist niht ze frů!

Also tů!

IX.

Sumer wunne!

So du dine liehte tage erglentzen wilt,

Was kan in der werlte danne húgelicher sin?

Und dú sunne

Dringet liehten meien dur den gruͤnen schilt,

Der von loube schatten birt den kleinen vogellin,

Dú darunder singent froͤidenriche doͤne.

So gedenke ich: heja hei! wer hie bi mir die schoͤne,

Der ich vil gedienet han bi miner zit, so wurde ich fro.

Ja richer Got von himele, wan gienge es húre so!

Die gedanke

Nach der liebe hoͤhent dike mir den můt

(Toren, reht ist: vil gewunschen des er niht enhat).

Das sint kranke,

Froͤidebar, und sint doch underwilent gůt:

Manic man gedenket dike da sin herze stat.

Ich gedenke dike, und wúnsche, das dú sússe

Minen senden kumber, den ich dur si lide, buͤsse,

Der ich vil gedienet han bi miner zit, so wurde ich fro.

Ja richer Got von himele, wan gienge es húre so!

Touwig rose,

Gegen der sunnen du sich us ir belgelin

Hat zerspreitet, stant die wissen lilien nahe bi.

Dú vil lose

Hat mit guͤte dirre zweier blůmen schin

An ir libe, und ist aller missewende vri.

Wan mac si wol nennen zů dem wunsche gegen dem grale.

So gedenke ich alles lieb, wer hie dú liehte gemale,

Der ich vil gedienet han bi miner zit, so wurde ich fro.

Ja richer Got von himele, wan gienge es húre so!

Frouwe, ich bin

Din eigen diener iemer sit daher gewesen.

Sit ich die vil minneklichen sach so wol gestalt,

Miner sin

Der hat ir lip vor allen frouwen us erlesen;

Es enwart an tugenden nie kein wib zu zir gezalt.

Liesse si mich dienstes und trúwen noch geniessen,

Der mich beider gegen der lieben niemer wil verdriessen,

Der ich vil gedienet han bi miner zit, so wurde ich fro.

Ja richer Got von himele, wan gienge es húre so!

Dú vil reine,

Seldebere, der ich eigen diener bin,

Dú ist gar an allen wandel, ganzer tugende vol;

Wan ein kleine,

Das besweret, leider! dike mir den sin.

Si ist gegen miner bet ze strenge: das bevinde ich wol.

Nu beginnet maniger sprechen: das tůt si mit eren.

Das sint schalke! Daran sol dú liebe sich niht keren,

Der ich vil gedienet han bi miner zit, so wurde ich fro.

Ja richer Got von himele, wan gienge es húre so!

(Die dritte Strophe dieses Liedes steht — aber bis zur Unverständlichkeit entstellt — in der Samml. von Minnesing. Th. I. S. 59.)

X.

Nu ist dú liehte heide val,

Rife wil si twingen.

Singen

Můs ich aber von des winters krefte.

Suͤssen sanc der nahtegal

Wil er gar verdringen;

Bringen

Kan er leit mit siner meisterschefte.

Nement war,

Wie winter gegen uns ziehe!

Leider! kreftig ist sin schar:

So ist der sumer schiehe.

Fliehe!

Winter hat das messer bi der hefte.

Was klag ich der vogel sanc

Und die liehten heide,

Beide,

Sit min leit ist worden klagebere?

Nach der ie min harze ranc,

Dú tůt mir so leide.

Scheide,

Frouwe, mine lange wernden swere!

Swanne ich sihe

Ir liehten ougenblike,

Von ir swenken ich vergihe,

Das ich danne erschrike.

Dike

Tůt ir fremden gros mich froͤiden lere.

XI.

Ist iht mere schoͤnes u. w.

Fünf Strophen, welche (die letzte ausgenommen) sich alle mit der Zeile schliessen:

Ich dahte: alter húte wagen, des bist du so gra.

(S. Sammlung von Minnesing. Th. I. S. 59. 60.)

XII.

Der sumer mit gewalde hat

Bekleidet walt und ouwe;

Der anger wol geblůmet stat

In suͤssem meien touwe;

Dú heide breit

Hat gruͤne kleit

An sich geleit,

Ist mir geseit,

In wunneklicher schouwe.

Min frouwe ist gůt,

Swie si doch tůt

Mich ungemůt.

Min ungemuͤte ist gar ze gros,

Als ich úch wil bescheiden.

Ich sten ir helfe leider blos,

Dú mich in senden leiden

Mit froͤmder tat

An allen rat,

Swies mir ergat,

Nu lange lat

Als einen wilden heiden.

Min frouwe ist gůt,

Swie si doch tůt

Mich ungemůt.

Ich lobe ir kúsche und ouch ir lip,

Ir schone und ir gebarn.

In gesach nie minneklicher wib

Bi allen minen jaren.

Swie das mich nie

Ir lob vervie,

Doch sang ich ie,

Dort unde hie,

Swa ie die besten waren.

Min frouwe ist gůt,

Swie si doch tůt

Mich ungemůt.

Sol ich niht herzelieb bejagen,

Noch hohe froͤide erwerben;

So mac ich doch von schulden klagen

Und můs von leide ersterben.

Kumt ir gerich

So grimelich

Als úber mich,

So scham si sich,

Sol ich alsus verderben.

Min frouwe ist gůt,

Swie si doch tůt

Mich ungemůt.

Mich bant ir liehter ougenblik,

Und wil mich niht enbinden.

Ich want mich in ir minnestrik,

Und kan mich niht entwinden.

Sus wart ich wunt

Zer selben stunt.

Hey, roter munt,

Nu tů mir kunt:

Sul ich genade vinden?

Min frouwe ist gůt,

Swie si doch tůt

Mich ungemůt.

XIII.

Komen ist der winter kalt,

Der vil manig herze hat erschreket.

Da e stůnt der gruͤne walt,

Das ist nu mit dúrren risen besteket.

Dú heide stat ir varwe bar,

Der anger al der blůmen schar;

Die rifen sint gevallen dar:

Des hat sich des meien zit enbleket.

Sol ich tumber

Disen kumber

Iemer tragen,

Das můs ich klagen.

Was klage ich des meien blůt,

Die rifiere, die vil liehten ouwen?

Wan klage ich nicht minen můt,

Den mir mit geberden hat verhouwen

Ein wib, die vil genaden hat,

Swie si mich doch dar ane lat.

Wie zimt ir solchú missetat,

Sol man mich in leide lange schouwen?

Sol ich tumber

Disen kumber

Iemer tragen,

Das můs ich klagen.

Herzelieb und herzeleit

Trage ich, doch mit ungelicher wage.

Swas min herze liebe treit,

Seht, das widerwigt min frouwe trage;

Swas aber ich leides han von ir,

Das wiget si vollekliche mir.

Min leit das ist ir herzen gir,

Swie ich doch mit dienste ir hulden jage.[48]

Sol ich tumber

Disen kumber

Iemer tragen,

Das můs ich klagen.

Ir gebaren minneklich

Kan min hohgemuͤte wol geswachen;

Und ir lachen inneklich

Das kan si so rehte suͤsse machen.

Ir spiegel liehten ougen klar,

Ir roter munt mich sunderbar

Verderben wil (dast, leider! war):

Wenne wil mir der ze froͤiden lachen?

Sol ich tumber

Disen kumber

Iemer tragen,

Das můs ich klagen.

Mir tůt inneklichen we,

Můs ich ir das kunden mit gesange.

Wil si, das ich singe me,

Der ich han gesungen her vil lange,

So gebe mir lacheliche ir grůs;

Ze hant so wirt mir sorge bůs,[49]

Und nige ir nider unz uf den fůs.

Frouwe, fuͤge, das min leit zergange!

Sol ich tumber

Disen kumber

Iemer tragen,

Das můs ich klagen.

XIV.

Swer nu verholner minne pfligt,

Den wil ich warnen: es ist zit,

Das er von liebe scheide.

Ob er den lib niht ringe wigt,

So huͤte er sich, swer tougen lit!

Alsus warne ich si beide.

(So sang ein wahter an der zinne wol)

Sit ich geliebe warnen sol,

So gebe ein lieb vil lieben kus,

Mit nahem umbevange, und scheide sich von liebe alsus.

So we mir! sprach das reine wib.

Dis weken tůt mir also we.

Wie wil der tag so gahen?[50]

Si umbevieng ir frúndes lib.

Si sprach: sol ich dich iemer me

Mit armen umbevahen?

Vil minneklichen er si umbevienc,

Manig kus da herzeklich ergienk,

Si lagen beide dem gelich

Wie si die naht mit liebe der minne pflegen froͤiderich.

Der frouwen ougen wurden rot.

Das si ir lieben frúndes brust

Mit trehen gar bererte.

Des heldes trúwe im das gebot,

Das si vil dike wart gekust,

Als in dú Minne lerte.

Er druhte ir liehtes wengel an das sin;

Er sprach: vil suͤsse troͤsterin,

Min herze an dir niht wenken kan,

Min trúwe ist gegen dir stete. Er kuste si, und schiet von dan.

XV.

Minne fuͤget dike leit

Mit vil sender arebeit,

Der min herze ein wunder treit.

Minne dú hat den gewalt,

Wil si, ich wirde an froͤiden balt,

Anders ich bin abe gezalt.

Minne, swer dich minnet,

Und dich minnen můs,

Der ist unversinnet,

Wirt ime kumbers bůs,

Er vermidet dinen grůs.

Ich bin din,

Minne, habe genade min!

Mich gruͤste ein vil roter munt

Minnekliche zeiner stunt,

Sit was ie min herze wunt.

Also traf dú Minne mich

Mit ir strale grimmeklich

In min herze tougelich.

Von der Minne gruͤsse

Mir dú not geschach,

Dú mir da so suͤsse

Dur min herze brach.

Owe, das ichs ie gesach!

Ich bin din,

Minne, habe genade min!

Ir zimt wol swas si getůt;

Si ist mit zúhten hohgemůt,

Vor untete wol behůt.

Minne hat gehuset dar;

Si ist nach schoͤne lieht gevar,

An ir ist der wunsch vil gar.

Swer die zit vertriben

Bi der liben sol,

Der můs allen wiben

Iemer sprechen wol;

Wan si ist aller tugende vol.

Ich bin din,

Minne, habe genade min!

(Die dritte Strophe steht in der Samml. von Minnesing. Th. I. S. 60.)

XVI.

Sumer wil uns aber bringen

Gruͤnen walt und vogel singen;

Anger hat an blůmen kleit;

Berg und tal in allen landen

Sint erlost us winters banden;

Heide rote rosen treit;

Sich froͤit al dú werlt gemeine.

Nieman truret, wan ich eine,

Sit mir dú vil suͤsse, reine

Frúmt so manig herzeleit.

Swer vil dienet ane lon

Mit gesange,

Tůt ers lange,

Der verlúret manigen don.

Ich wil al den lúten kúnden,

Das si lebt mit grossen súnden,

Der ich ie was undertan,

Di si hat an mir verschuldet,

Sit min herze kumber duldet,

Des wil si sich niht entstan.

Wie mag si di súnde buͤssen!

Mir wart nie ein lieblich gruͤssen;

Davon wir uns scheiden muͤssen:

Ich wil urloub von ir han.

Swer vil dienet ane lon

Mit gesange,

Tůt ers lange,

Der verlúret manigen don.

Frouwe, dú mir vor in allen

Wilent muͤste wol gevallen,

Noch vernemt ein liedelin!

Ir sint, ane lougen, schoͤne;

Doch ist schoͤne dike hoͤne:

Das ist leider an ú schin.

Nu wil ich min singen keren

An ein wib, dú tugende leren

Kan, und alle froͤide meren:

Seht, der diener wil ich sin!

Swer vil dienet ane lon

Mit gesange,

Tůt ers lange,

Der verlúret manigen don.

Werdú Minne, ich wil dich strafen;

Du bist gegen mir harte entslafen,

Sit ich struhte in dinú bant.

Ich bin diner wise ein tore,

Min sang gat dir fúr din ore,

Diner helfe ich nie bevant.

Hilf! ich bin mit spilnden ougen

Wunt ins herze, sunder lougen:

Das tet mir ein wib so tougen,

An der ist wol dienst bewant.

Swer vil dienet ane lon

Mit gesange,

Tůt ers lange,

Der verlúret manigen don.

Minne, heile mine wunden,

Die mir in vil kurzen stunden

Von der strale din geschach!

Mich hat ob zwein liehten wangen

Sere ir ougen blik gevangen.

Ach, was ich dar under sach

Ein roten munt von roͤte brinnen!

Das betwanc mich in dien sinnen,

Das ich si můs iemer minnen;

Ir blik mir dur min herze brach.

Swer vil dienet ane lon

Mit gesange,

Tůt ers lange,

Der verlúret manigen don.

(Die zweyte, vierte und fünfte Strophe dieses Liedes steht in der Samml. von Minnesing. Th. I. S. 60.)

XVII.

Ich solde den liehten sumer loben,

Des han ich mich versumet her.

Das lant ist niden und dabi oben

Geblůmet nach mis herzen ger.

Dú zit uns bringet núwe fruht;

Frid und frůt ist uns bereit.

Ir Swaben, nemt die alten zuht

Herfúr, so tragent ir eren kleit;

Mit zuht ir sin gemeit!

Swem ich singe,

Swies erklinge,

Swas ich sage,

Doch trage

Ich klage.

Min klage ist, das mich hat verwunt

Ir minneklicher ougenschin,

Ir liehte varwer, roter munt

En mitten in das herze min.

An schoͤn, an kúsche und ouch an zuht

Ist si fúr ellú wib gelobet;

Ir wunnebernden reinen fruht

An tugenden nieman úberobet,

Wan das si an mir senden dobet.

Swem ich singe,

Swies erklinge,

Swas ich sage,

Doch trage

Ich klage.

Min klage ist, das ich sende not

Von der vil herzelieben han,

Und si mir das noch nie enbot,

Ich sold in ir genaden stan.

Ir rede ist gegen mir gar verswigen,

Das si nie wort ze mir gesprach.

Sus hat die liebe mir verzigen:

Das ist min klagendes ungemach.

Owe, das ich sie ie gesach!

Swem ich singe,

Swies erklinge,

Swas ich sage,

Doch trage

Ich klage.

Min klage ist ungerihtet mir,

Wie gůte gerihte der kúnig hat.

Ob ich nu klagte das von ir

Das si mich in den sorgen lat,

Wer ehtet si danne uffen reht,

Wan si wirt von mir niht genant?

Nu lant gerihte wesen sleht,

Es si dem rihter wol erkant,

So ist ungerihtet sa ze hant.

Swem ich singe,

Swies erklinge,

Swas ich sage,

Doch trage

Ich klage.

Min klage die mag wol enden sich,

Ob dú vil herzeliebe wil.

Si tůt gegen mir unminneklich:

Das ist an ende und ane zil.

Ach Got, wie lange sol das weren,

Das si tůt ungenade an mir?

In mac ir hulde niht emberen,

Und han doch kleinen trost von ir:

Sus hindert sich min herzen gir.

Swem ich singe,

Swies erklinge,

Swas ich sage,

Doch trage

Ich klage.

(Die vierte Strophe dieses Liedes steht in der Samml. von Minnesing. Th. I. S. 60.)

XVIII.

Es ist niht lang, das ich mit einer minneklichen frouwen

Begunde húbscher klaffe vil,

Die ich von herzen minne.

Ich sprach: lant úwer tugende an mir und úwer guͤte schouwen!

Ich bins, der ú da dienen wil

In můt und in dem sinne.

An worten und an werken hant ir min gewalt.

Úwer tugent manicvalt

Sol mich des geniessen lan,

Das ich júch vor allen frouwen in dem herzen han.

Ich bin iu holt!

Ir sint min golt,

Min hort, min edelgesteine!

Uffen sele und uffen lip,

Und darzů uf ellú wib

Acht ich gegen úch sicherlichen kleine.

Si sprach: die rede hant ir wol tusent frouwen e gekúndet;

Ir wenet lihte toͤren mich;

Ir sint ein lugenere!

Der ir da singent, und úch hat das herze gar entzúndet,

Dú ist iu lieber vil danne ich.

Mirst úwer klaffe unmere.

Ir wenet, das ich si der mere ein goͤichelin.

Eft ein ander danne mich!

Ich erkenne si vil wol,

Dú iu das herze dike tůt in leide jamers vol.

Ir Gouchgovolt,

Der sint ir holt!

Und ahtet si vil kleine

Uffen úwern toͤrschen lib;

Wand si ist gar ein biderb wib.

Úwer minne ist allenthalb gemeine.

Do swůr ich manigen eit, si were dú, der ich da singe,

Und sprach: ir sulnt mich schelten niht,

Wan ich bin úwer eigen.

Ich bin ú herzelichen holt, swie mir daran gelinge.

Swas iemer mir davon geschiht,

Ich wil ú dienst erzeigen;

Wan in gesach uf erde nie so reine fruht.

Schoͤne und alle wiblich zuht

Hat Got selbe an úch geleit,

Swie das ir mir nu ein teil der zúhte hant verseit.

Ich bin úch holt!

Ir sint min golt,

Min hort, min edelgesteine;

Uffen sele und uffen lip,

Und darzuͤ uf ellú wip

Acht ich gegen úch sicherlichen kleine.

Si sprach: ir soltent frouwen loben, da man úch bas geloubet,

Und úwern dienst bieten dar,

Da man úch dienstes bette.

Ich weis wol, wa si wont, dú úch der sinne gar beroubet.

Da nimt man úwer kleine war;

Si giht ir sint unstete.

Ein biderb wip mag an úch werwort vinden wol,

Da von man úch schúhen sol.

Ir hant ungetrúwen můt,

Da von iu diu minneklich unminneklichen tůt.

Ir Gouchgovolt,

Der sint ir holt!

Und achtet si vil kleine

Uffen úwern toͤrschen lib;

Wand si ist gar ein biderb wib.

Uwer minne ist allenthalb gemeine.

Ich sprach: vil liebú frouwe min, nu troͤstent mir die sinne!

Si sprach: ir sunt von hinnen gan.

Wie lange went irs triben?

Sold ich fúr froͤmden kumber sin gegen ú ein troͤsterinne,

Des muͤst ich iemer laster han

Gegen allen gůten wiben.

Ja enbin ich nicht, dur die ir lident selken pin.

Ich sprach: ja ir, frouwe min!

Si sprach: das ist rehte erlogen;

Ir hant hin und her damit vil manig wib betrogen.[51]

Nu saget mir niht

Was iu geschiht;

Wan ich geloube iu kleine.

Uwer trugehafter lib

Hat betrogen manig wib.

Alsus so schiet von mir dú sússe reine.

XIX.

Sumer wunne ist hin gekeret;

Winter wil begrifen

Liehte blůmen und den kle.

Kleine vogelin sint verseret

Von den kalten rifen;

Da bi siht man ouch den sne.

Owe wunneklicher ougenweide,

Die man sach uf anger und uf heide!

Die stant nu in leide:

Das tůt minem herzen we.

Sol min herze fro bestan,

So můs Minne

Mine sinne

Růwen lan.

Owe súfteberer sorgen,

Du min herze twinget!

Ach ich froͤideloser man!

Die trage ich vil unverborgen

— — — — — —[52]

Darnach des mir Minne erban.

In weis noch niht, was die Minne richet,

Das si mine froͤide so zerbrichet,

Sit min zunge ir sprichet

Nicht wans beste so ich kan.

Sol min herze fro bestan,

So můs Minne

Mine sinne

Růwen lan.

Lieb in herzen! lieb in ougen!

Lieb in minen sinnen!

Lieb, vor valsche wol behůt!

Lieb in liebe, sunder lougen!

Lieb, ich můs dich minnen,

Swie mir din genade tůt.

Liebes lieb, du hast mich mit gewalte

Lieblich braht in sorge manigvalte,

Liebes lieb, nu walte

Liebe gegen mir, frouwe gut!

Sol min herze fro bestan,

So můs Minne

Mine sinne

Růwen lan.

Gut gebaren, schoͤn an libe

Hat dú minnekliche,

Kúsche in herzen sunder wan.

Wer gesach an keinem wibe,

Dú sich ir geliche,

Und die tugende moͤhte han,

Der si pfliget? Min frouwe unwandelbere

Alle frouwen lassen ane swere;

Es sint warú mere,

Der můs ich ir bigestan.

Sol min herze fro bestan,

So můs Minne

Mine sinne

Růwen lan.

Es ist dike das gesprochen,

Swer gewaltig were,

Der solt doch genedig sin.

Dis reht ist an mir gebrochen.

Dú vil seldenbere

Dú ist gar gewaltig min,

Und han doch genade da niht funden;

Wan ir trost ist gegen mir gar verswunden,

Dú mir zallen stunden

Tůt ir ungenade schin.

Sol min herze fro bestan,

So můs Minne

Mine sinne

Růwen lan.

XX.

Tougenlichen lag verborgen

Bi liebe ein ritter wol gemůt.

Davon pflag der wahter sorgen;

Er sang: ‚swer hie lit umbehůt,

Ob der behalten wil den sinen lip,

So weke in minneklichen, reine wib!

Er ist ze lange hie gelegen;

Davon so gebe er dir den morgensegen.‘

Des erschrak dú minnekliche.

Si daht: ‚owe der leiden zit!

Erst entslafen senftekliche,

Der hie an minen armen lit.

Den wil der liehte tag von mir verjagen;

Davon můs ich an froͤiden verzagen.‘

Si kust in slafent an den munt,

Und sprach: ‚der wahter tůt den morgen kunt.‘

Da wart ir kus vergolten;

Ein widerkussen da geschach.

Ach, si lagen als si solten!

Dú frouwe us rotem munde sprach:

‚Tů ritters ere an mir vil senden schin!‘

Er sprach: ‚vil herzeliebe frouwe min,

Ich wil dir mine froͤide lan;

Sich lieb, dú sol dir hie ze pfande stan.‘

XXI.

Sumer diner lieben kúnfte

Bin ich fro! Du hast gewalt!

Diner hohen sigenúnfte

Froͤit sich anger und der walt.

In dem walde hoͤrt man singen,

Kleine vogelin suͤsse erklingen;

Uf dem anger schone entspringen,

Siht man blůmen manigvalt.

Dú zit wart nie so wol gezieret.

Ich han des meien blůt erzwieret;

Die wil ich prisen mit gesange,

Swie doch min kumber wert ze lange.

Ich bin tumb, das ich min langes leit den lúten singe;[53]

Manger spricht: seht! dest war, es wigt in harte ringe.

Ich wer sicherlichen tot, wan das mich nert gedinge,

Das ich noch den kumber min ze liebem ende bringe.

Sol ich iemer fro bestan,

So Minne und dú vil minnekliche mich von sorgen lan.

Rehte blůmenzit des meien,

Vogel singen hilfet niht.

Sihe ich tanzen unde reijen,

Swes dú werlt ze froͤiden giht;

Doch so trurent mir die sinne.

Ungemuͤte wont mir inne,

Sit mir von der suͤssen Minne

Weder lieb noch trost geschiht.

Mich hat der wessen Minne strale

Verwundet niht zem ersten male;

Der alte kumber hat mich sere

Verwunt. Was sol dú rede nu mere?

Minne wil ir alten ungenade an mir nu núwen;

Ich gelebte nie so gar in kumberlichen rúwen;

Si wil mir in sendem herzen grosse sorge brúwen;

Der ich ie getrúwe was, dú wil mir niht getrúwen.

Sol ich iemer fro bestan,

So Minne und dú vil minnekliche mich von sorgen lan.

Mich nimt wunder, ob dú reine

Habe gesetzet in ir můt,

Das si mich in herzen meine,

Sam si mit den ougen tůt:

Seht, so můs ich gar verderben.

Moͤht ich liebe blik erwerben,

Darnach in ir gruͤsse sterben,

So wer doch das ende gůt.

Si smehet mich mit liehten ougen,

Wer ich ir in ir herzen tougen,

So muͤsten ougen nach dem herzen

Mir buͤssen kumberlichen smerzen,

Den ich nu vil lange han von sus getanen sachen.

Dú viel liebe wolte mir ze froͤide nie gelachen,

Doch můs ich ir mit gedanke nahtes dike erwachen,

Das man moͤhte hoͤren mir das herze us jamer krachen.

Sol ich iemer fro bestan,

So Minne und dú vil minnekliche mich von sorgen lan.

Swa man minnekliche lachet,

Hat da Minne nicht gewalt,

So ist ir hoher pris verswachet,

Sol si da sin abe gezalt.

Wan mag wol an miner vrouwen

Minnekliches lachen schouwen.

Ist dú minne an ir verhouwen,

So ist si doch dar nach gestalt,

Swer ir vil liehten ougen sehe,

Wie der nach minem sinne jehe.

Dú schone hat vil hoh gemuͤte,

Kúsche, und rehte wibes guͤte.

In gesach nie schoner wib und also wol gebaren,

In gesach so roten munt bi allen minen jaren,

In gesach nie wibes lib so reinen und so claren;

Doch kann si wol mit geberden mannes herzen varen.

Sol ich iemer fro bestan,

So Minne und dú vil minnekliche mich von sorgen lan.

Ob dú liebe fúrhtet súnde,

Dem tut si doch niht gelich.

Hat si gůter lúte kúnde,

Die sint mit ir súnden rich,

Das si ir nit gebent ze bůsse,

Das si muͤste mir vil sůsse

Lachen, und in liebem grůsse

Gegen mir nigen minneklich.

Ir bihter han niht rehter sinne;

Si geltent minne mit unminne:

So wirt der súnden deste mere.

Si solten wisen rehte lere.

Ob si mir ir grůs verseit, der ir han wol gesprochen,

Sa ze hant wirt minne mit unminne an mir gerochen,

Si hat an getrúwen frúnde trúwe gar zerbrochen;

Da von ist min hoher můt in leide gar betrochen.

Sol ich iemer fro bestan,

So Minne und dú vil minnekliche mich von sorgen lan.

(Die erste und die beiden letzten Strophen dieses Liedes stehen in der Samml. von Minnesing. Th. I. S. 60.)

XXII.

Ich wil der vil lieben singen

Disen sang,

Dú min herze tougelichen

Hat verwunt.

Si kan swere an allen dingen

Machen krank.

Nieman kan sich ir gelichen:

Dast mir kunt.

Nu warumbe lobte si,

Moͤht ichs niht beweren

Mit ir zúhten wol?

Si ist vor allem tadel vri,

Und vor boͤsen meren;

Dabi ist ir herze tugenden vol.

Frouwe, ir hant mich úberwunden

Sunderbar

Iu ze dienst in kurzen stunden:

Das ist war!

Tugentrichú, reine frouwe,

Selig wib!

Ougent an mir úwer guͤte

Und alle zuht.

Als dú rose in meijen touwe

Ist úwer lib,

Und der gelije in wunne bluͤte

An siner fruht.

Ich wil úwer diener sin,

Nach den suͤssen lone,

Das ir troͤstent mich,

Und ir wendent minen pin.

Aller tugende ein krone,

Gar an allen wandel, minneklich!

Frouwe, ir hant mich úberwunden

Sunderbar

Iu ze dienst in kurzen stunden:

Das ist war!

Wunneklicher ougenweide

Ich nie gesach,

Danne der vil wol getanen

Múndel rot.

Si ist vor allen herzeleide

Ein schirm, ein tach.

Swer si siht, der muͤs sich anen

Sender not.

Wil dú Minne mir gestan

Gen der minneklichen,

Seht, so wurd ich vro,

So wolde ich die sorge lan

Us den herzen slichen.

Minneklichú Minne, fuͤge es so!

Frouwe, ir hant mich úberwunden

Sunderbar

Iu ze dienst in kurzen stunden;

Das ist war!

XXIII.

Sumer ouget sine wunne,

Das ist an der zit.

Prúve er wol swer rihten kunne,

Was materie lit

An dem walde und uf der heide breit.

Wan mag schouwen,

Wie die ouwen

Stant bekleit,

Was der anger liehter blůmen treit.

Est ein alt gesprochen wort:

Swa din herze wont, da lit din hort!

Ich hab endelichen funden

Einen schoͤnen hort;

Den kos ich mir zeinen stunden;

Nust min herze dort

Bi dem horde, der mir fuͤget pin.

Dú vil reine,

Wandels eine

Můs mir sin

Hort in dem vil senden herzen min.

Est ein alt gesprochen wort:

Swa din herze wont, da lit din hort!

Min hort kan wol tugenden horden

Und hohen můt.

Dú mir ist ze horde worden,

Dest min frouwe gůt.

In der guͤte lose, wolgestalt

Ir gebaren

An den jaren

Mich tůt alt,

Swie ir tugende doch si manicvalt.

Est ein alt gesprochen wort:

Swa din herze wont, da lit din hort!

Maniger der hat hort verborgen,

Des er troͤstet sich.

Min hort git mir niht wan sorgen,

Unde smehet mich.

Min vil lieber hort ist mir also

Gar unnuͤtze.

Minne schuͤtze,

Cupido

Traf min herze, sit bin ich unfro.

Est ein alt gesprochen wort:

Swa din herze wont, da lit din hort!

Minne dú ist gewalteklichen

Allen dingen obe.

Ir kan niht uf erde entwichen,

Es gevahe ir klobe.

Wisheit, hort, du beide nigent ir.

Minne, suͤsse!

Kumber buͤsse

Nach der gir!

Twinge minen hort geliche mir!

Est ein alt gesprochen wort:

Swa din herze wont, da lit din hort!

(Die erste Strophe dieses Liedes steht in der Samml. von Minnesing. Th. I. S. 61, nur mit einer verschiedenen Leseart in der dritten Zeile.)

XXIV.

Winter leide

Gruͤne heide

Hat verderbet, und den walt.

Wan mag schouwen

An den ouwen,

Da lit nu der rife kalt.

Ich wirde alt

Von selken dingen.

Noch klage ich ein ander not,

Das dú liebe mich wil twingen,

Der ich mich ze dienste ie bot.

Ich wil singen,

Zoren bringen,

Das ich nach ir jamers won.

Jamers schrike,

Lide ich dike:

Das tůt minem herzen we!

Ich vil tumber

Disen kumber

Liden můs aber als e.

Swies erge,

Ich můs doch sorgen

Beide naht und ouch den tag,

Das ich abent noch den morgen

Si niht sol noch sehen mag.

Unverborgen

Můs ich worgen

In ir bande, dunket mich.

XXV.

Nu ist der arge winter hie,

Der uns wil betwingen aber (leider!)

Die blůmen und den kle.

Owe, der zerfuͤrt uns ie

Meijen sinú wunneklichen kleider!

Ich sorge, wies erge!

Wissent, wer den winter lang

Also můs vertriben

Ane lieben umbevanc,

Wie mag der beliben,

Sin froͤide werde kranc?

Liep gedinge tůt mich geil,

Ich gewinne heil.

Owe lieblich naher smuk!

Owe minnekliches umbevahen!

Und owe guͤtlich kus!

Owe herzelicher druk!

Wenne sol ich sender den enpfahen?

Joch singe ich umbe sus.

Doch gedinge ich, das ir můt

Und ir wiblich guͤte,

Dú mich froͤlich singen tůt,

Hoͤhe min gemuͤte.

Si ist so rehte gůt.

Liep gedinge tůt mich geil,

Ich gewinne heil.

Wer gesach ie frouwen lip,

Der ir lachen also wol gezeme

Und ir vil werder grůs?

Es ist manig schone wib,

Dú doch niender ist also geneme:

Des man ir sprechen můs.

Swenne ir rose roter munt

Und ir liehten ougen

Blikent in mins herzen grunt

Lachelichen, tougen,

So wirt ich wol gesunt.

Liep gedinge tůt mich geil,

Ich gewinne heil.

Wol dir, minneklichú fruht!

Wol dir! du hast froͤiderich gemuͤte,

Und doch mit rehter scham.

Wol dir! du hast wiblich zuht.

Wol dir! du hast userwelte guͤte

Mit rehter kúsche alsam.

Wol dir! du bist userkorn,

Liep und wandelbere.

Wol dir! wan du bist verer zorn

Und fúr sende swere

An dise werlt erborn.

Liep gedinge tůt mich geil,

Ich gewinne heil.

We, warumbe tůt si das,

Das si mir das herze niht enbindet

Von sender arebeit?

Sicherlich ir stuͤnde bas,

Sit si mich

So sigelosen vindet,

Das si min sendú leit

Uf genade neme an sich,

Doch in lieben troste,

Also das dú gůte mich

Von den banden loste:

So lepte ich wunneklich.

Liep gedinge tůt mich geil,

Ich gewinne heil.

XXVI.

Heide, walt und anger, wol bekleit,

Die hant sich entbloͤsset: dest min klage.

Kleiner vogelin truren ist mir leit,

Die der winter twinget alle tage.

Noch trage

Ich in minem herzen grosser swere,

Sunder strit,

Das mich lat in sorgen dú vil seldenbere

Lange zit.

Wol im, der ze liebe hat den trost,

Das er sender leide wirt erlost!

We mir! we der súftebernden not,

Das ich trost von liebe niht enhan,

Sit dú Minne dienen mir gebot,

Der ich bin mit trúwen undertan!

Ich lan

Mich an ir genade sicherlichen;

Si ist so gůt.

Wer mag nu an hohen froͤiden bas gerichen

Mir den můt?

Wol im, der ze liebe hat den trost,

Das er sender leide wirt erlost!

Reine kúsche, tugentriche sitte

Si hat in ir herze; rehte scham,

Selde und ere wont der lieben mitte

Noch in rehter wibes guͤte alsam.

Mir kam

In das herze ir minneklich gebaren,

Do ich si sach.

Des lide ich, vil sender, nu bi manigen jaren

Ungemach.

Wol im, der ze liebe hat den trost,

Das er sender leide wirt erlost!

Nieman mag der Minnen han gewalt.

Si tůt dike we und ofte wol.

Er mag wol ze selden sin gezalt,

Den si tůt mit willen froͤiden vol.

Ich sol,

Leider! noch bevinden, ob dú Minne

Froͤide gebe;

Si tůt ungenade mir in minem sinne,

Swie ich lebe.

Wol im, der ze liebe hat den trost,

Das er sender leide wirt erlost!

XXVII.

Wol becleidet stet dú heide,

Anger und der gruͤne walt.

Bi der liehten ougenweide

Hoͤrt man stimme manigvalt

In den ouwen, vogelin doͤne.

Meije wart noh nie so schoͤne,

Den ich mit gesange kroͤne,

Noch so rehte wolgestalt.

Frouwe, sich,

Du solt mich

Troͤsten, sit ich minne dich!

Sich froͤit aldú werlt gemeine

Gegen der wunneklichen zit.

Nieman truret, wan ich eine,

Sit si mir niht froͤide git,

Der ich diene in ganzen trúwen;

Dú wil minen kumber núwen.

Ich lebe in vil starken rúwen

Von den meren iemer sit.

Frouwe, sich,

Du solt mich

Troͤsten, sit ich minne dich!

Ane Got so hat min nieman

Den gewalt, als si wol hat.

Itewisset mich des ieman,

Stuͤnde es dem als es mir stat,

Er geloupte mir zeware.

Der ich diene sunderbare,

Wie dú miner jungen jare

Froͤide nider sigen lat![54]

Frouwe, sich,

Du solt mich

Troͤsten, sit ich minne dich!

Wer gesach ie creatúre,

Die man weis in wibes namen,

Also schone, also gehúre?

(Dú darf sich des niht beschamen!)

Also kúsche und also gůt,

Also tugenthaft in můt,

Und an eren so behůt?

Dú ist ein selig wib, benamen!

Frouwe, sich,

Du solt mich

Troͤsten, sit ich minne dich!

XXVIII.

Ich wil allen lúten

Belúten

Mins herzen klage,

Und wie grossen kumber

Ich tumber

Nu trage,

Wie mich sorge twinget,

Und singet

Doch mir der lip.

Seht! das můs ich liden

Durh miden

Ein wip.

Des můs ich den jamer schriken,

Leider! undertenig sin.

Ich lige in ir minnen striken,

Das ist an mir worden schin.

Si kan senden smerzen

Us herzen

Vertriben

Wol:

Rose ob allen wiben,

Man si nennen sol!

Wa ist nu dú schoͤne?

Ich doͤne

Und nige ir gar.

Ich wil aber gruͤssen

Die suͤssen

(Nement war!)

Schone mit gesange.

Swie lange

Ich ir froͤmde si,

Doch so hat ir jugende

Vil tugende;

Dabi

Hat si guͤte ein michel wunder

In den herzen zaller stunt;

Und si doch vorus besunder

Mir das herze hat verwunt.

Si kan senden smerzen

Us herzen

Vertriben

Wol:

Rose ob allen wiben

Man si nennen sol!

Wenne sun ir ougen

Mir tougen

Ze blike varn,

Und dú suͤsse junge

Mir swunge

Den arn,

Und mich umbevienge:

So gienge

Mir sorgen hin;

Seht! so wolt ich scheiden

Von leiden

Den sin.

Wafena, der lieben stunde!

Wenne sol ich die geleben,

Das ich von ir roten munde

Solte ein lieblich kússen nemen.

Si kan senden smerzen

Us herzen

Vertriben

Wol:

Rose ob allen wiben

Man si nennen sol!

(Die erste Strophe dieses Liedes steht in der Samml. v. Minnesing. Th. I. S. 61.)

XXIX.

Winter, din gewalt

Selwet blůmen manigvalt;

Dú zit ist also gestalt:

Und dú vogellin

Lident aber grossen pin;

Ir schal můs geswigen sin.

Wan mag schouwen

An den ouwen,

Da lit nu der sne,

Da man blůmen brach:

Uf der heide

Stent mit leide

Rife und ouch der sne.

Dast min ungemach.

Wes habe ich gedinge,

Sol min singen

Mir niht bringen

Froͤiderich gedinge?

Winter und der sne

Tůt mir niht reht so we;

Sorgen hab ich dannoch me.

Swies min herze gert,

Des bin ich noch niht gewert;

Est unneher danne vert.

Dú vil gůte

Minen můte

Sus hat angesiget,

Das ich bin unfro.

— — — —

— — — —

— — — — —

(So unvollendet steht dieses Lied in der Handschrift.)

XXX.

Sol ich nu verstummen

Dur den winter lang?

Des war ich wil uns tummen

Singen disen sang!

Mirst ein hohgemuͤte

In minen lip geflogen

Von ir, dú wibes guͤte

Ie was unbetrogen.

Sist mir zallen ziten in dem sinne,

Der ich nie vergas,

Wan si wendet minne mit unminne,

Der ich stete has.

Si kan truren swachen,

Das ist mir wol kunt;

Ach, froͤlich lachen

Kan ir roter munt.

Si mag mir wol bringen

Froͤidenrichen můt;

Darnach wolt ich ir singen,

Swie si mir joch tůt.

Es wiget ungeliche

Liebe mir gegen ir;

Ich bin ir sicherliche

Holder danne si mir.

Minne, wis geliche mit der wage,

Sit das ich bin din!

Neina, tůs, e mich der zit betrage,

Suͤsse troͤsterin!

Si kan truren swachen,

Das ist mir wol kunt;

Ach, froͤlich lachen

Kan ir roter munt.

Gib ein liebes ende

Mir, vil selig wib!

An alle missewende

Lebt din kúscher lib.

Lieb vor allen vrouwen,

Schoͤne, minneklich,

La dine tugende schouwen,

Unde troͤste mich!

Tůst du das, so bin ich froͤidebere.

Mines herzen trut,

Lieb, nu wende mine sende swere

Stille und úberlut!

Si kan truren swachen,

Das ist mir wol kunt;

Ach, froͤlich lachen

Kan ir roter munt.

XXXI.

Ich wil aber singen!

Doch moͤht ich von sus getanen dingen

Bas súften und klagen.

O we grosser leide!

Mich froͤit niht der anger noch dú heide,

Noch singen noch sagen;

Mich froͤwet niht der tamber noch dú gige;

Hoͤre ich harpfen und rotten, an dem můt ich sige.

Von der einen, der ich dike nige;

Můs ich die swere tragen.

Ich han leit und ungemach,

Sit ich si von erst gesach.

Ach! und aber ach!

Dú vil suͤsse reine

Achtet uf mich senden kleine,

Den tůt si wol gelich:

Da begat si súnde.

Swie vil ich des mit gesange kúnde,

Doch lebt si froͤmdeklich.

Mir tůt we, das si mich senden smahet,

Und dú liebe minen sang niht in ir ore enpfahet;

Davon kumber mir in herzen gahet,

Des bin ich sorgen rich.

Ich han leit und ungemach,

Sit ich si von erst gesach.

Ach! und aber ach!

Grůs von rotem munde,

Der vergat mich leider zaller stunde;

Des můs ich froͤiden lan.

Lieblich ougenblike,

Die vergant mich zwirent also dike.

Wie sol min leit zergan?

Mich froͤit niht dú sunne noch der mane.

Nieman kan mich troͤsten, wan dú reine, valsches ane.

Wil dú minnekliche, wol getane,

So mag ich fro bestan.

Ich han leit und ungemach,

Sit ich si von erst gesach.

Ach! und aber ach!

Ich hab ir gesungen

Und gesprochen vil mit lobender zungen,

Das beste das ich kan.

Wil si des vergessen,

So hat ungemuͤte mich besessen.

Trut Minne, sich daran!

Wig, das dú liebe ste geliche,

Ald das si mir us gedanke entwiche!

Jamer tůt vil dike sorgenriche

Mich froͤidelosen man.

Ich han leit und ungemach,

Sit ich si von erst gesach.

Ach! und aber ach!

Swer mir gůtes gunne,

Und der minen kumber merken kunne,

Der spreche ir iemer wol.

Der si lopt mit worten,

Der hat mine gunst an allen orten,

Das ich verdienen sol.

Ich bin ir gebunden gar fúr eigen.

Den si gůtes gan, der ist gescheiden von den veigen.

Wolde si genade an mir erzeigen,

So wurde ich froͤiden vol.

Ich han leit und ungemach,

Sit ich si von erst gesach.

Ach! und aber ach!

XXXII.

Sumerlichú wunne

Zieret wol den gruͤnen plan.

Berg und tal

Sint bekleit;

Nach den touwe sunne:

Meijen disú kleider sneit,

Sunder wan,

Uberal.

Swer wil

Bla,

Rot, gruͤn, gel schouwen,

Uf den anger, in den ouwen,

Der siht da

Wunne vil.

Minne, twinge mir den sin!

Wiblich guͤte

Min gemuͤte

Zuket hin.

Swie vil meije bringet

Froͤiden und sin liehten tage,

Doch trure ich

Von der not,

Das mich Minne twinget

Und der lieben munt so rot.

Dest min klage,

Sicherlich!

Ich han

Ir

Den můt erzeiget,

Das sich ir gebot neiget

Alse min gir,

Sunder wan.

Minne, twinge mir den sin!

Wiblich guͤte

Min gemuͤte

Zuket hin.

Mir ist wol ze můte,

Swenne ich die vil lieben sihe.

Alle zit,

Dur das jar,

Dú vil reine gůte

Tůt mich truren, das ist war.

Ich vergihe

Sunder strit,

So si

Tůt

Der not geliche

Sam trure herzekliche,

Sost min můt

Froͤiden fri.

Minne, twinge mir den sin!

Wiblich guͤte

Min gemuͤte

Zuket hin.

Lieb, la liebe werben

Lieblich zwischent mir und dir!

Lieb, la mich

Liep dir sin!

La lieb niht verderben,

Liep, und tů mir helfe schin!

Frouwe min,

Minneklich!

Ich bin

Ir

So gar gebunden,

Dú mich twinget zallen stunden,

Das si mir

Nimt den sin.[55]

Minne, twinge mir den sin!

Wiblich guͤte

Min gemuͤte

Zuket hin.

Zuht und ellú schoͤne

Hat min frouwe, ach, selig wip!

Wiblich scham

Ouch dabi.

Fúrbas ich si kroͤne;

Sist vor missewende vri

Lieben lip

Ob alsam

— — — — —

(So abgebrochen steht dieses Lied in der Handschrift.)

XXXIII.

Winter, dine kalte rifen,

Kalde winde und ouch der sne,

Swas die gruͤnes mugent begrifen,

Des gesiht man jar lanc me

In so wunneklichen schine.

Seht! das las ich alles sin;

Wan ich lide grosse pine

Von der lieben frouwen min.

Des wil dú reine

Gelouben vil kleine,

Wan si hat gemeinen grůs mir gar verzigen,

Und lat mich sender not ze pfande ligen.

Von welhen schulden

Můs ich dulden?

Ald wavon

Hat si mir ir grůs verseit? Deswar ich bins ungewon.

Solt ich wúnschen mir ze heile

Darnah als min wille stat,

So neme ich ze minem teile,

Fúr swas nu ieman gůtes hat,

Das dú reine in wibes guͤte

Spreche: lieb, ich bin dir holt!

Das froͤit min gemuͤte

Bas danne aller Kriechen golt.

Des wil dú reine

Gelouben vil kleine,

Wan si hat gemeinen grůs mir gar verzigen,

Und lat mich sender not ze pfande ligen.

Von welhen schulden

Můs ich dulden?

Ald wavon

Hat si mir ir grůs verseit? Deswar ich bins ungewon.

Nieman ahte mir gen gůte

Froͤide und froͤiderichen můt!

Froͤide in edels mannes můte

Tůt bas dan alles sin gůt.

Wurde mir ein lieplich smieren

Von der frouwen min bekant,

Und ein minnekliches zwieren;

Das neme ich fúr tusent lant.

Des wil dú reine

Gelouben vil kleine,

Wan si hat gemeinen grůs mir gar verzigen,

Und lat mich sender not ze pfande ligen.

Von welhen schulden

Můs ich dulden?

Ald wavon

Hat si mir ir grůs verseit? Deswar ich bins ungewon.

Unwerde und gar unmere,

Húre unwerder danne vert,

Bin ich, der ich gerne were

Gar vor allen dingen wert.

Si tůt niender dem geliche

Sam si welle erhoͤren mich.

Nu neme ich fúr Tútsche riche,

Das si bas bedehte sich.

Des wil dú reine

Gelouben vil kleine,

Wan si hat gemeinen grůs mir gar verzigen,

Und lat mich sender not ze pfande ligen.

Von welhen schulden

Můs ich dulden?

Ald wavon

Hat si mir ir grůs verseit? Des war ich bins ungewon.

Frouwe, schoͤne, minneklich!

Frouwe, kúsche, wolgezogen!

Frouwe, in guͤte froͤiderich!

Wunsch hat an iu niht gelogen.

Ach, solt ich úch kússen tougen,

Das were unvergolten gelt,

An den munt und in dú ougen,

Das neme ich fúr alle die welt.

Des wil dú reine

Gelouben vil kleine,

Wan si hat gemeinen grůs mir gar verzigen,

Und lat mich sender not ze pfande ligen.

Von welhen schulden

Můs ich dulden?

Ald wavon

Hat si mir ir grůs verseit? Deswar ich bins ungewon.

XXXIV.

‚Der tag uns nahet!

Wer niht versmahet

Disen warn sang,

Den ich hie singe;‘

(Ein wahter lute schrige)[56]

‚Swer bi trut lige

An armen blang,

Der hebe sich ringe;

Uns nahet bald ein liehter tag;

Ich fúrhte melde, dú nie gelag

Ze solhem dinge.‘

‚Owe uns beiden!

Wir muͤssen scheiden!‘

Sprach das reine wib

Mit trehenden ougen.

Ein umbevahen

Und smuken nahen

Lieb an liebes lib

Ergienc da tougen.

Der ritter sprach ze der frouwen sin:

‚Gebút mir lieb! wan ich bin din,

Dast ane lougen.‘

‚Nu scheidest hinnen!

In minen sinnen

Wart mir nie so we‘

(Sprach dú vil reine). —

‚Des můs ich sorgen,

Vúr disen morgen

Nach dir iemerme;

Min froͤide ist kleine.‘ —

Dú frouwe sprach: ‚gedenke an mich,

Sit ich in rehten herzen dich

Mit trúwen meine.‘

XXXV.

Bi liebe lag

Ein ritter tougenliche

Die naht bis an den tag.

Der minne enpflag

Mit im dú minnekliche;

Die minne er widerwag,

Bis das der wahter sang: es tagt!

Das von in beiden wart geklagt.

‚Ach, herzeliebú frouwe min,‘

So sprach der ritter wolgemůt, ‚ich wenne es muͤsse ein scheiden sin.‘

Es wart niht lang,

Das da mit nahem smuke

Ergie ein umbevang

Mit armen blank

Und herzelichen druke,

Der lieb gen liebe twanc.

Dú frouwe sprach: ‚min sender lip

Und ich vil súfteberndes wib

Bin iemermere an froͤiden fri,

Sol ich dir, herre, niemerme geligen alse nahe bi!

Owe und ach!

Der jamerbern scheiden

Ir beider herze brach.

Das da geschah[57]

Von den gelieben beiden,

Das schuͤf in ungemach.

Der ritter sprach: ‚gehabe dich wol!

Din lip ist maniger tugende vol.

Min herze dir belibet hie.

Si sprach: ‚so fuͤre min herze hin!‘ Der wehsel da mit kus ergie.

XXXVI.

‚Verholnú minne sanfte tůt,

(So sang ein wahter an der zinne)[58]

‚Doch sol sich lieb von liebe scheiden!

Darnach so wende er sinen můt,

Ist ieman tougenliche hinne;

Deswar so tůt er wol in beiden.

Er sol sorgen,

Wie er von hinnen kere.

Est an dem morgen.

Volge er miner lere,

Sit das ich in warnen sol,

So tůt er wol,

Und sint sin ere.‘

Der frouwen dienerinne klůg

Erhorte da des wahters singen.

Darinne erschrak dú vil getrúwe;

Dú mer si hin ze der frouwen trůg.

Si sprach: ‚wol uf, und lant ú lingen!

Der tag ist komen!‘ Da hůb sich rúwe.

‚Est ane súnde,‘

(Sprach dú tugentriche)

‚Der in so fúnde.

Ligen minnekliche.

Erst entslafen; nu sich hie!

Ich weis niht, wie

Ich entwiche.‘

Die rede erhorte der werde gast,

Da er lag bi der minneklichen,

Bi lieber brust an blanken armen;

Davon in slafe do gebrast.

Er sprach: ‚sol ich von hinna strichen?

O we, das můs Got erbarmen!‘

Beider sinne

Wurdent da verseret

(Das schůf fro Minne),

Froͤide gar verkeret.

Da schied leid der wunnen spil;

Der trehene vil

Wart da gereret.

XXXVII.

Nu hat sich der sumer mit vil maniger hande kleide

Wol gezieret; schouwent an den anger, lieht gevar!

Lute singet vogel in walde und uf der gruͤnen heide:

Manig herz ist von der wunne worden sorgen bar.

Was toug mir vúr leit des meijen bluͤte,

Das ich lange trage, es wende der vil reinen guͤte?

Owe lieb, geschehe das,

Mir wurde bas!

Trost von der vil gůten — wenne sol ich den enpfahen?

Lieb von der vil lieben hete ich gerne: es were wol zit.

Wil si minen dienest also vesteklich versmahen,

Was mir danne kumberlicher sorge in herzen lit!

Neina! wúnschet alle, das dú Minne

Mir geliche twinge ir herz, ir můt und al ir sinne.

Owe lieb, geschehe das,

Mir wurde bas!

Han ich ir gedienet tougenliche her von kinde,

We, wes súndet sich dú herzeliebe danne an mir!

Hie bivor was ich vil bas der froͤiden ingesinde,

Do lies mich dú minneklich, nach mines herzen gir.

Mir mag lieb noch lieblich ende machen,[59]

Troͤste mich ein heinlich grůs, ein winken und ein lachen.

Owe lieb, geschehe das,

Mir wurde bas!

Werden manne, ir sunt den tugentrichen reinen wiben

Uf genade in dienste gerne wesen undertan.

Nieman kan den lúten noch der werlte vro beliben,

Wan von liebes troste, der sichs rehte wil entstan.

Nu ist min trost von der vil lieben kleine:

Das mag si mir wenden wol, dú minnekliche, alleine.

Owe lieb, geschehe das,

Mir wurde bas!

Minnekliches lachen, wunneklicher ougen blike,

Brune brawe, liehte varwe uf wengel, múndel rot

Hat ein wib, dú fuͤget minen kumber alse dike,

Das ich lide jamers pin und dabi sende not.

Ach genade, frouwe! ich bin din eigen;