20. Erzgebirgische Weihnachtslieder.
a. Dr Weihnachts-Heiligohmd.
Heit is dr Heil'ge Ohmd! Ihr Maad,
Kommt rei! mr gießn Blei!
Rick', laaf geschwind zor Hanne-Christ:
Se soll bei Zeitn rei!
Mr hoom ne Lächter a'gebrannt!
Satt nauf, ihr Maad! die Pracht!
Do drihm bei eich is a racht fei:
Ihr hatt ä Sau geschlacht!
Iech ho mr ah ä Licht gekaaft
Fer zwee-ä-zwanzig Pfeng.
Gih, Hanne, hul' ä Tippl rei:
Mei Lächter is ze eng!
Kaar! zind ä Weihrauchkerzl a',
Doß 's nooch Weihnachten riecht!
Und stell's neer off dos Scherbel hie,
Dos unnern Uf'n liegt!
Lott'! dortn off der Hühnersteig,
Do liegt menn Lob sei Blei:
Na, rafl neer net su dort rim,
Sist werd dr Krienerts schei!
Denn 's Mannvolk hot sei Fraad an wos,
Sei's ah an wos neer will:
Mei Voter hot's an Vuglstelln,
Dr Kaar, dar hot's an Spiel.
Iech gieß fei erscht! … Wann krieg iech dä?
Satt har! … enn Zwacknschmied! …
De Kaarlin' lacht: – die denkt gewieß,
Iech meen ihrn Richter-Fried!
Mr hoom ah sachzn Butterstolln
Su lank wie de Ufnbank:
Ihr Maad, do werd gefrassn warn!
Mr warn noch alle krank!
Mr hoom ah Neinerleer gekocht!
Ah Worscht mit Sauerkraut!
Mei Mutter hot sich o'geplogt,
Die ale gute Haut!
Rick'! brock de Sammlmillich ei!
Nasch ober net drvu!
Ihr Gunge, werft känn Respl ro'
In's Heilig-Ohm'nd-Struh!
War giht dä iber'n Schwammetopp?!
Nu Henner! ruhst de net?
Nu wart neer: wenn dr Voter kimmt,
Mußt warlich glei ze Bett!
Nä horcht neer mol in Uf'ntopp
Dos Rumpln und dos Geing!
Na, weil es neer net winsln thut!
– Denn sist bedätt's noch Leing.
Ne Heiling Ohmd im Mitternacht,
Do läfft statt Wasser Wei.
Wenn iech mich neer net färchtn thät,
Iech hult' enn Topp voll rei.
Denn drihm an Nachbersch Wassertrug,
Do stiht ä grußer Ma',
Und war net rachte Tatzn hot,
Dann läßt er gar net na'!
Lob'! hul' drweil benn Hanne-Lieb
Ne Votr ä Kannl Bier!
Und wenn de kimmst, do singe mr:
»Ich freue mich in dir –«.
Ihr Kinner, gitt in's Bett nu nauf:
Dr Seeger zeigt schu Ees.
Epp mir Weihnachtn widr erlaam? …
– wie Gott will, su gescheh's!
b. Ä annersch Weihnachtslied.
('n Hannerl sei Liedl.)
Schwenzelenz! heit bie iech fruh!
's wor mr lange Zeit net su!
Will heit Teewes machn!
Kinner, iech ho Gald wie Hei,
's känne lächt zwee Tholer sei:
Ja, drim ka' iech lachn!
Satt dos Heiligohmd-Licht a'!
's sei fei ruthe Bliemle dra'
Und ä klaans Gesprichl!
Ho zwee Grosch drfür bezohlt,
Salwer 's su schie a'gemolt
Wie ä Taffet-Tichl!
Fix! ne Krunelächter ro',
Dann iech zammgebitzlt ho
Und vergoldt su machtig!
Satt die golding Engele!
Zwischen Sträuchle wackeln se!
A! dos sieht su prachtig! –
Su! nu is er a'gezündt:
Ei wie schie dr Lächter brinnt!
's kloppt mrsch Harz vor Fraadn!
Ach, die Schwarzbeer-Sträuchle sei,
A'gesah bei Licht, su fei!
Thunne racht schie klaadn!
Söll de ganze Sach wos taang,
Müssmr ah ä Pfeifl raang:
Drim will iech aans stoppn!
Do – dr Kopp von Porzelie:
Is dar epper net racht schie?
Muß ne erscht auskloppn.
Noochert will iech hutzn gih.
Heit beschert ne Kinnern schie!
's is ju heit Bornkinnl!
Komme ah de Maadle nooch!
Bie dann Grethn gut mei Tog:
's is ä lus's Gesinnl!
Bie ä led'ger Boss und ho
Nooch enn Schatz ball dort, ball do
Schu gestrabt von Harzn: –
Ober dos is wunnerlich!
Kaane thut, als will se mich!
– na, iech ka's vrschmarzn! –
Gute Nacht drweil, ihr Leit!
Weckt miech morng ze rachter Zeit!
Morng giht's in de Mettn!
Wemmer su de halbe Nacht
Hot fei lustig zugebracht,
Kreicht mr in de Bettn.