In blasẏng of armẏs be .ix. quadrattis that is to saẏ .v. quadrate finiall and iiii. Roẏall
In blasyng of armys ther be .ix. quadrattis for to consider .v. quadrate finiaƚƚ and .iiij. Royaƚƚ. Fyue quadrate finiaƚƚ be theys. Gereri. Gerundi. Fretly. Geratly. and Endently.
¶ Gereri is called in armys whan cootarmuris ar .ix. quarteris dyuerse colowris.
¶ Gerundi is called in armys whan the cootarmure is of .ix. dyuerse colowris: &̄ a fusitarget with in the cootarmure of whatt colowre that hit be of
¶ Fretly is calde ī armys whan the cootarmure is counterfesid
¶ Geratly is calde in armys whan the cootarmure is powderd Bot a blaisar shaƚƚ not say he berith Ermen. Siluer powderd with Ermen Bot he shaƚƚ say he berith Ermen or ellis in sume armys he muste say demy Ermen: wich is to sai whitli Ermen
In so moch that ī the fifthe quadrat finiaƚƚ hit is determyned of the tokenys of armys. or I procede to hit: is shewed whatt maner of tokeny a gentyƚƚ man may weer.
A gentilman mai not weer tokynys of armys bot of steinīg colowre. that is to say his cootarmure ynyat or ellis I geratt with preciouse stonys
Gerattyng haue .ix. bagges of cootarmuris. First with croslettis. and of theym ther be .iiij dyuerse. and tho bene theys Cros fixyly. Cros paty Cros croslettis. and Cros flory
¶ The secunde bage is flowre delyce.
¶ The threde baage is roslettys
¶ The fowrith baage is prymarose.
¶ The fifthe baage is quynfolis.
¶ The sexthe baage is diaclys
¶ The seuenith baage is chappelettys
¶ The .viij. baage is Molettys.
¶ And the .ix. baage is Cressauntis that is to say halfe the moone. theys be powderygis of cootarmuris.
¶ The fifthe quadrate is calde Endently of .iij. diu̇se weis that is to say bebally lentally and fyesly.
¶ Bebally is calde ī armys whan a cotearmure is calde Endentyde of .ij. dyuerse colowris in the length of the cotearmure
¶ Lentalli is calde in armys whan ye cootarmure is Endentid with .ij. dyuerse colowris in the berde of the cootarmure
¶ Fyesly is called in armys .iij. manere weys Fesybagy fesy target and fesy generaƚƚ.
Fesy bagy is whan tokenys of armys be disseiuered from the cheef of the cotearmure to the right spleyer in the feelde
¶ Fesy target is whan a scogion̄ or an engislet is made in the mydduƚƚ of the cootarmure.
¶ Fesy generaƚƚ is calde in armys whan the cootarmure is Endentid with .ij. dyuerse colouris from the laste poynt of the cootarmure to the spleyer
The chefe is calde in armys the myddys of the cootarmure of the right syde.
Quadrat is calde in armys whan the felde is set with sum tokyn of armys.
¶ A quadrant finaƚƚ is called in armys whan the felde is discolourid with tokenis of armys hauyng no beest in the felde.
A Quadrant Royaƚƚ is calde whan the feelde occupyeth ye token of a beest or ony other tokyn set with in the coōtarmure to the nowmbre of fiue.
¶ The first quadrant is oon tokyn of armys allonli sett and whatt after his byrthe he beerith.
¶ The secunde quadrant Royaƚƚ is beryng in his cootarmur iij. thyngꝭ calde the tokenys of armys. that is to say iij. flowredelice in fylcyals .iij. rosis .iij. chapplettis iij. lebardis .iij. lyonys. and so the .iiij. quadrat Royaƚƚ is to bere a beest Raunpande: bebaly. lentally. and fessely.
Here shall be shewed what Cootarmuris restrẏal ben and weer the blaser shall begẏn to blase.
Thre cootarmuris be ther called restryaƚƚ in armys. Oon is whan a cootarmure is barri of dyuerse colowris to the poynt. and what colowre the poynt be of. the poynt is the felde. Ther the blaser shaƚƚ begynne.
¶ The secunde cootarmure restriaƚƚ is calde ī armys whan a cootarmure is paly of dyuerse colouris to the poynt. & whatt pale medyƚƚ in the poynt yt coloure is the felde The blaaser shaƚƚ blase from that colowre to the next coloure pale.
¶ The threde cootarmure restriaƚƚ is calde in armys whan a cootarmure is sentry of dyuerse colowris to the poynt and whatt settre mydyƚƚ in the poynt yt colowre is the felde. The blaseyr shaƚƚ blase from yt colowre to the next colowre of the lefte side of the cootarmure and blase the colowre sentri.
Merke what sentre Fixal Mangis Gorgis & other diuerse here now folowẏng be calde ī armẏs
¶ A Sentre in armys is called stakar of tentis.
¶ Fixiaƚƚ be called in armys mylner pykes.
¶ Mangys be called in armys a sleue.
¶ Gorgys be called in armys water bulgees.
¶ Elynellis be calde in armys .iiij. quadrantis truncholis.
¶ Oglys be calde in armys gonestonys.
¶ Tortlettis be calde in armys wasteƚƚ.
¶ Diaclys be called in armys scopprellys.
¶ Myrris be calde in armys merowris or glasses.
¶ Feons be calde in armys brode arow hedys.
¶ Tronkys be calde in armys any bestys hede or neck Ikytt chagikli a sonder.
¶ Demy is calde in armys halfe a best in the felde.
¶ Countretreuis is calde in armys whan halfe the beest is of oon coloure and that other halfe of an other coloure
¶ Eny cotarmure that berith a crosse to the poynt: the poynte is the felde. as Seynt George berith gollis fowre anglettis of Siluer. bot ayens this rule sum blaseris of armys repungne as hit is shewed in the boke foloyng.
¶ Theis .iij. termys. of. and. with shaƚƚ not be rehersed in armys bot onys any of thaym
¶ Ther be diuerse berẏngẏs of feeldẏs
Dyuerse beryngis of feeldis ther be ¶ Oon is beryng hole felde. hit is clepyd in armys claury
¶ The secūde is berīg too feldis. hit is calde ī armis Coūċli
¶ The threde is beryng too feldis in .iiij. quarteris: hit is calde in armys quarily
¶ Ther bene .iii. cote armurẏs grẏttẏ
Thre cootarmuris grytty ther bene in armys. Oon is called checky that is whan the felde is chekerd with diu̇se colouris
¶ The secunde is calde wyndi that is to say whan the felde is made like wawis of oon coloure or of diuerse colouris
¶ The threde is calde werry whan the felde is made like gobolettys of dyuerse colowris.