Barclay the translatour tho the Foles.
To Shyp galantes the se is at the ful.
The wynde vs calleth our sayles ar displayed.
Where may we best aryue? at Lyn or els at Hulle?
To vs may no hauen in Englonde be denayd.
Why tary we? the Ankers ar vp wayed.
If any corde or Cabyl vs hurt, let outher hynder.
Let slyp the ende, or els hewe it in sonder.
Retourne your syght beholde vnto the shore.
There is great nomber that fayne wold be aborde.
They get no rowme our Shyp can holde no more.
Haws in the Cocke gyue them none other worde.
God gyde vs from Rockes, quicsonde tempest and forde
If any man of warre, wether, or wynde apere.
My selfe shal trye the wynde and kepe the Stere.
But I pray you reders haue ye no dysdayne.
Thoughe Barclay haue presumed of audacite
This Shyp to rule as chefe mayster and Captayne.
Though some thynke them selfe moche worthyer than he.
It were great maruayle forsoth syth he hath be.
A scoler longe: and that in dyuers scoles
But he myght be Captayne of a Shyp of Foles
But if that any one be in suche maner case.
That he wyl chalange the maystershyp fro me
Yet in my Shyp can I nat want a place.
For in euery place my selfe I oft may se.
But this I leue besechynge eche degre:
To pardon my youthe and to bolde interprise.
For harde is it duely to speke of euery vyce.
For yf I had tunges an hundreth: and wyt to fele
Al thinges natural and supernaturall
A thousand mouthes: and voyce as harde as stele.
And sene all the seuen Sciences lyberal.
Yet cowde I neuer touche the vyces all.
And syn of the worlde: ne theyr braunches comprehende:
Nat thoughe I lyued vnto the worldes ende.
But if these vyces whiche mankynde doth incomber.
Were clene expellyd and vertue in theyr place.
I cowde nat haue gathered of fowles so great a nomber.
Whose foly from them out chaseth goddys grace.
But euery man that knowes hym in that case
To this rude Boke let hym gladly intende.
And lerne the way his lewdnes to amende.