XI.

By the hearth they sit.

And syþen by þe chymné in chamber þay seten.

Wy3e3 þe walle wyn we3ed to hem oft,

& efte in her bourdyng þay bayþen in þe morn,

To fylle þe same forwarde3 þat þay by-fore maden,

Þat chaunce so bytyde3 hor cheuysaunce to chaunge,

What nwe3 so þay nome, at na3t quen þay metten

Þay acorded of þe couenaunte3 byfore þe court alle;

Þe beuerage wat3 bro3t forth in bourde at þat tyme;

Þenne þay louelych le3ten leue at þe last,

Vche burne to his bedde busked bylyue.

Bi þat þe coke hade crowe3¹ & cakled bot þryse,

Þe lorde wat3 lopen of his bedde, [&] þe leude3 vch one,

So þat þe mete & þe masse wat3 metely delyuered;

Þe douthe dressed to þe wod, er any day sprenged,

to chace;

He3 with hunte & horne3,

Þur3 playne3 þay passe in space,

Vn-coupled among þo þorne3,

Rache3 þat ran on race.

¹ crowed (?).