CHAPITRE V.
LA POLICE & GOUUERNEMENT DES SAUUAGES.
[86] ON ne peut auoir plus de police, que de Communauté, [50] puis que police n'est autre, que l'ordre & regime de la Communauté. Or ces Sauuages n'ayants point grande Communauté ny en nõbre de personnes, puis qu'ils sont rares, ny en biens, puis qu'ils sont pauures, ne viuans qu'au iour à la iournee, ny en lien & conionction, puis qu'ils sont espars, & vagabonds, ils ne peuuent auoir grande police. Si ne peuuent-ils s'en passer, puis qu'ils sont hõmes & associés. Celle donc qu'ils ont, est telle. Il y a le Sagamo, qui est l'aisné de quelque puissante famille, qui par consequent aussi en est le chef & conducteur. Tous les ieunes gents de la famille, sont à la table & suitte d'iceluy; aussi est-ce à luy d'entretenir des chiens pour la chasse, & des cauots pour les voituriers, & des prouisions, & reserues pour le mauuais temps, & voyages. Les ieunes gens le [51] courtisent, chassent, & font leur apprentissage sous luy, incapables de rien auoir auant qu'estre mariés: car lors seulemẽt ils peuuent auoir chien & sac: c'est à dire, auoir du propre, & faire pour soy, toutesfois ils demeurent encores sous l'authorité du Sagamo, & le plus souuent en sa compagnie, comm'aussi plusieurs autres, qui manquent de parents, ou encores qui de leur propre gré se rangent sous sa protection, & conduicte, pour estre foibles d'eux-mesmes, & sans suitte. [88] Tout ce donc que les garçons conquestẽt, appartient au Sagamo: mais les mariés ne luy en donnent qu'vne partie, que si ces mariés se departant d'auecques luy, cõm'il le faut souuent pour la commodité de la chasse, & du viure, retournants apres ils payent leur recognoissance, & hommage en peaux, & [52] semblables presents. A ceste cause il y a des querelles, & des ialousies entr'eux aussi bien qu'entre nous, mais non pas si atroces. Quand quelqu'vn par exemple commence à s'emanciper, & faire le Sagamo, quand il ne rẽd point le tribut, quand ses gents le quittent ou que d'autres les luy soustrayent; & comm'entre nous, aussi entr'eux y a des reproches & mespris, cestuy-là n'est qu'vn demy Sagamo, c'est vn nouuellement esclos, comm'vn poussin de trois iours, la creste ne luy faict que de naistre: c'est vn Sagamochin, c'est à dire, vn Aubereau de Sagamo, vn petit nain. Et à celle fin que vous sçachiés que l'ambition a son regne encores dessous le chaume, & les roseaux, aussi bien que dessous les toicts dorés: Et qu'il ne faut point no9 tirer beaucoup l'aureille pour apprẽdre ces leçons.