CHAPITRE XVII. [i.e., xvi.]
VN VOYAGE FAICT À LA RIUIERE DE S. CROIX, & LA MORT DU SAGAMO MEMBERTOU.
[198] SVR la fin du moys d'Aoust de la mesme année 1611. le sieur de Biencourt ayant eu nouuelles, que le nauire du Capitaine Plastrier de la ville de Honfleur faisoit pescherie au Port aux Coquilles, à vingt vne lieuë de Port Royal vers l'Ouest: il se delibera de l'aller trouuer, à celle fin de luy recommander vn de ses gens, qu'il renuoyoit en France auec lettres, [156] pour presser le secours attendu, & representer l'estat pitoyable auquel on estoit. Le P. Biard l'accompagna; & ils rencontrerent ce nauire tant à propos, que s'ils eussent tardé d'vn demy quart d'heure, la commodité en estoit perduë: car ja il faisoit voyle pour reuenir en France. Estans dedans, nous apprinsmes que le Capitaine Platrier s'estoit resolu de passer l'Hyuer en l'Isle saincte Croix, & qu'il y estoit resté luy cinquiesme. Ceste nouuelle fit prendre resolution au sieur de Biencourt d'aller à Saincte Croix de ceste mesme tirade, auant que le Capitaine Platrier eust moyẽ de se fortifier: car il vouloit tirer de luy le Quint de toutes ses marchandises, & traicte, parce qu'il hyuernoit sur le pays. L'Isle Saincte Croix est à six lieües du Port aux Coquilles, au milieu d'vne riuiere.