CHAPITRE XVIII. [i.e., xvii.]
[164] LE VOYAGE À LA RIUIERE S. IEAN: & LA QUERELLE QUI Y SURUINT.
[208] I'AY dict cy deuant que le sieur de Biencourt auoit amené vne barque du Port aux Coquilles, à fin qu'auec icelle il peust faire vn voyage iusques aux Armouchiquois. Ainsi lon appelle les peuples, qui sont dés le quarentetroisiesme degré en bas vers le Sur-oüest. Leur commencemẽt est dés Chouacoët, & à ce qu'on dit, ils sont en grand nombre. La disette pressoit le sieur de Biencourt à ce voyage; parce que ces peuples labourãts, & faisants prouision de grains, il esperoit par le moyen de la trocque, ou autrement tirer d'eux quelque secours pour se munir contre la famine [165] qui nous attendoit au pas de l'Hiuer. Sa barque fut trop tard equippée pour vne si longue traicte: car nous ne fusmes prests qu'au troisiesme d'Octobre; & encores voulust-il aller à la riuiere Sainct Iean auant que de prẽdre ceste route.