CHAPITRE XXI. [i.e., xviii.]
LE VOYAGE DE QUINIBEQUI, & LE RETOUR À PORT ROYAL.
[218] NOVS auons remarqué peu au parauant, que ce voyage à la riuiere S. Iean, n'estoit qu'vn destour du plus grand entreprins aux Armouchiquois pour auoir du bled. Comme donc nous eussions ainsi transigé auec les Maloüins, nous mismes la voile au vent, prenants la route des Armouchiquois. Auant que partir, le sieur du Pont & Merueille prierent le P. Biard de vouloir demeurer auec eux; mais il leur respondit, [175] que pour lors il ne le pouuoit faire, d'autant que ce ne luy seroit point beau de quitter le sieur de Biencourt en vn voyage tant perilleux: Et qu'il importoit à sa charge de recognoistre les gens, & disposition des lieux; & peu à peu domestiquer le sens des Sauuages à la veuë, vs, & façon du Christianisme, les visitant, & leur en donnant quelq; goust de pieté, bien que ce ne fust qu'en passant. Mais qu'il esperoit auec la benediction de Dieu, le voyage accomply de venir passer l'Hyuer auec eux: & auec leur ayde composer son Catechisme. A quoy il pria le sieur du Pont de se preparer, s'enquerant des Sauuages de la proprieté des mots, qui peuuent correspõdre à ceux de nostre langue, & Religion. Et à fin qu'il le peust faire commodément, il luy laissa vne explication bien ample des [176] principaux articles de nostre saincte Foy.