CHAPITRE XXI. [i.e., xx.]
[193] LE COMMENCEMENT DES DISPUTES ENTRE LE SIEUR DE BIENCOURT, & LES IESUITES & LES CAUSES D'ICELLES, L'ACCUSATION, QU'ON FIT DE GILBERT DU THET, & SA DEFENSE.
[238] LA ioye fut grande aux secourus de ceste arriuée de nauire pour l'estroitte necessité où ils se retrouuoyent, & les frayeurs, qu'ils auoyent conçeu de l'aduenir. Mais ceste resiouissance ne fut pas longue, le sieur de Biencour n'estant point à son aise dés que Simon Imbert, luy eust porté nouuelles de l'association faicte auec Madame la Marquise de Guercheuille. Or parce que le Iesuite Gilbert du Thet, estant dans le nauire, quoy qu'il ne se fust meslé des affaires, toutesfois [194] n'auoit pas esté si borgne (comme l'on dit) qu'il ny eust tousiours veu d'vn œil; comme il en auoit charge, & commandement. Iceluy doncques pour s'acquitter de son deuoir, & garder le droit, s'en alla trouuer le sieur de Biencourt, en presence du P. Biard luy dit, Qu'il s'esmerueilloit bien fort, que Simon Imbert ayant eu l'administration de tout l'embarquement, ce neantmoins il n'auoit apporté aucun roolle, ny charte-partie, ny memoires de ce qui auoit esté embarqué, ny où, ny comment l'argent de Madame la Marquise auoit esté employé. Qu'il deuoit bien l'auoir faict au moins pour iustification de sa probité, & bonne foy mesmes, puis qu'il apportait plusieurs marchandises [240] qu'il asseuroit estre à luy en proprieté, & desquelles on pourroit auoir soupçon, qu'il se fust accommodé [195] au detriment de la dicte Dame, & d'eux. Qu'ils ne vouloyent point l'accuser auant que de l'auoir trouué coulpable, neãtmoins qu'auant aussi de le recognoistre non coulpable, il y auoit bien de quoy s'enquerir en tout cela, & mesmes de ce qu'il auoit vendu à Dieppe du bled, qui luy auoit esté dõné pour l'embarquement: chose qui tournoit au grand preiudice de l'habitation, laquelle defailloit principalement en victuailles. Item, qu'il comptoit sept barrils de Galette despensez durant le voyage, & il ne disoit rien que de ces sept il y en auoit deux, qu'vn certain Robert de Roüen auoit fourny pour sa part: car en ceste façon il ne falloit pas compter sur la compagnie sept barrils, ains cinq tant seulement. Qu'on supplioit ledit sieur de s'enquester de tout l'affaire prudemment, [196] & s'y conduire tousiours comme nous deuons par tout, auec charité, & retenuë. Telle fut la simple remonstrance, que luy fit le Iesuite, & le sieur de Biencourt a souuent depuis rendu tesmoignage, qu'on ne luy pouuoit indiquer ce mesnage, auec plus de modestie que lon fit. Neantmoins au lieu de faire ce dequoy on l'auoit requis, & à quoy il estoit tenu, il s'en alla rapporter le tout audit Simon Imbert, adioustant que le Iesuite coadiuteur l'auoit accusé.