CHAPITRE XXIII. [i.e., xxi.]
VN VOYAGE DU PERE ENEMOND MASSÉ & VN AUTRE DU P. BIARD.
[244] LA reconciliation ayant esté faicte du depuis, & toutes choses pacifiées, les Iesuites se r'adonnans à l'estude, & apprentissage du langage Sauuaginois, estimerent vn bon moyen de s'y cõtraindre, & d'apprendre mieux les vs, façons, & vie du pays, s'ils alloyent, & demeuroyent auec les naturels, errants, & courants auec eux par monts & vallées; & viuants à leur mode quant au ciuil, [199] & corporel. Ils s'offrirent à Louys Membertou, pour en ceste façon demeurer auec luy, s'il luy plaisoit l'agréer: ce qu'il accepta fort volontiers. Le P. Enemond Massé, comm'il est courageux, voulut que cest'entreprinse fust pour luy; aussi fut-il iugé plus propre à cela par la cõmune voix de ceux de l'habitation, à cause de son industrie, & engin practic, idoine de trouuer tous remedes à tous inconueniens. Il s'en alla dõc auec Louys Membertou, & sa famille, au delà de la Baye Françoise à la riuiere S. Iean, & commença son nouitiat de ceste vie Nomadique, bien aspre de vray, & de fort essay.