L'amant
Voulentiers dist il monseigneur
Se dieu plaist j'en feroy devoir
Et vous remercie de lonneur
Que vous a pleu me faire avoir
A moy n'a pas tant de savoir
Que je le sceusse bien comprendre
Mais dieu qui chascun fait pourvoir
le vous vueille en sa gloire rendre
Ainsy cest amant fut logié
Et faisoit liberallement
Ce qui luy estoit enchargié
Dont tous l'amoient entierement
Cy endura lors grand tourment
Car a l'entree paye on la disme
Mais tout portoit paciamment
Sans en faire semblant ne sisme
Toutesfoys a une journee
Du prin temps qu'on dit sur l'erbette
Damp prieur vers l'après disnee
Sy trouva a sa saincturette
iii ou iiii brins de violette
qu'il portoit pour seignier ses heures
Dont grant cririe fut lors faicte
En le ramenant bien des mures
Cy fut le povre homme effrité
Je vous assure et bien esprins
Combien qu'a dire verité
Il n'avoit pas trop fort mesprins
Car pensés qu'il avoit aprins
A porter boucqués et sentir
La les plus rouges y sont prins
Ne ne puet bonne amour mentir
Quant a ung soir bien sur le tart
On faisoit visitacion
En allant fut prins a l'escart
Au pré de recreation
Ou la pour consolacion
Sy faisoit bien les espernades
En lisant par devocion
Ung livre tout plain de ballades
Cella sceu la cloche en sonna
Pour tous les freres assembler
Dont en soy bien l'imagina
Commençant tresfort a trembler
Mais il ne se povoit embler
Par quoy vint prendre discipline
En confessant sans soy troubler
Estre de pugnicion digne
Oncques puis au train ne tourna
Ains fist merveilles de bien vivre
Et brief sy belle vie mena
Que nul ne le pourroit consuivre
Et qu'après ce qu'il fut delivre
Du temps qu'on doit porter le fais
L'en le vint prier et poursuivre
De vestir et d'estre proffais
De ce fut content et joyeux
Comme sil qui le desiroit
Mais pour faire la chose mielx
Il dist bien que il rescriproit
A ses parens et manderoit
Le jour prins a faire la feste
Affin d'y venir qui vouldroit
Sans leur en faire autre requeste
Quant ilz en sceurent les nouvelles
Chascun d'entre eux fut tost monté
Et y eut dames damoiselles
Estranges et de parenté
Qui par euvre de charité
Et pour lonneur de sa personne
Vindrent a la feste a planté
Car c'estoit une belle aumosne
Entre icelles en congneuz une
Dont me prins a ymaginer
Quelle maleureuse fortune
Avoit l'amant la fait donner
Et qui m'en fist souspeçonner
Fut qu'elle estoit vestue de dueil
Et que sans partir ne tourner
Elle avoit sur luy tousjours l'ueil
Helas elle eust beaucoup mielx fait
Se durant la prosperité
Elle eust de quelque bien parfait
Le povre homme reconforté
Car lors avoit perdu santé
Et le veu de l'ordre entrepris
Rien n'y valloit la voulenté
Le conseil en estoit ja prins
Plusieurs de ces dames la vis
Qui de l'ordre cy caquetoient
Bien a leur aise et a devis
Et des religieux qui y estoient
Disant que telz gens sy mettoient
Povres amoureux aux a patis
Et que se plus mes caquetoient
Ilz en feroient grant abatis
Les unes mauvais cordeliers
Les appelloient par desplaisance
En disant d'eulx maulx a milliers
Par dieu se j'avoye puissance
Se disoit une et habondance
D'enfans sy ung n'en auroit pas
Brief elle perdoit pacience
De l'amant qui passoit le pas
Chascun et chascune disoit
Des biens de luy moult largement
N'a nulles des dames plaisoit
Qui se rendist aucunement
Ains maudissoient tresaprement
ceulx qui l'avoient mis en ces termes
Et en veis une soudainement
Plourer des yeux a grosses larmes
Ceste la souvent lamentot
En ramentevant la grant chiere
Ou autresfoys trouvee s'estoit
Son maintien sa doulce maniere
Et comme des bons la baniere
Par ses biens fais devoye porter
Dont l'en avoit du mal arriere
Tant que l'on povoit supporter
Las il estoit sy amiable
Se disoit l'autre ma cousine
Tant doux tant humble tant amiable
Et de trop plus grant bien digne
Quant il m'en souvient je m'en signe
Je n'eusse sceu veoir son party
Que cueur ou tant de bien l'on fine
Eust esté sy tost amorty
Or est il du monde aboly
Ne sçay ou le mal luy tenoit
Mais son sens avoit trop failly
Car quant le bien sy luy venoit
Et qu'amours se determinoit
Le compencer du temps passé
Dont aux dames bien souvenoit
Il a a leur service faulcé
Las il advient communement
Que telz gens qui sont ordonnés
A faire des biens largement
Aux dames a qui sont donnés
Se sont les premiers obstinez
A eux rendre a ung hermitaige
Mais ceulx par qui la sont menés
En deveroient porter le dommaige
Ainsi l'un a l'autre en passant
Sy en disoit sa ratelee
Voire d'un langaige perçant
Aussy agu q'une galee
Dont l'ordre estoit bien ravalee
En la blasmant en mainte sorte
Le long du chemin et alee
Et y furent jusques a la porte
Or le jeu fut a la ouvrer
Car a l'entree doibt on savoir
Que femmes ne s'osent trouver
En la religion pour veoir
Fors pour leurs parens recevoir
Et sy en fault c'est chose vraye
Du souz prieur congié avoir
Que l'on appelle rabat joye
Si que les parens et amis
Pour les femmes licence obtindrent
Que n'eusse leans le pié mis
Que vi cordeliers qui vindrent
Tost au devant d'eux et les prindrent
Deux a d'eux chascun par les mains
Et au monstier grant temps les tindrent
En parlant de dieu et des sains
Après quant ilz furent las d'estre
En l'eglise et au parlouer
Ils les menerent veoir le cloistre
Et de la aussy au dortouer
Puis ilz vindrent au refretouer
Plain d'imaiges en pourtraiture
Ou avoit sur le dreçouer
Une grande mort en painture
Sy en a en la compaignie
Qui leurs parens vous demanderent
Ce qu'on ne leur octroya mye
Ains les freres leur refuserent
Mais pour eulx sauver remonstrerent
Qu'ilz estoient lors en oraison
Et a tant la nuyt s'en allerent
Chascun gesir en sa maison
Lendemain qu'il estoit dimenche
Que l'en devoit faire la feste
Dont chascun de voulenté franche
A l'eglise venir s'apreste
Sy eussiés ouy grant tempeste
Et veu tant de gens pourmener
Qui rompoient au prestre la teste
A peine s'y povoit on tourner
Assez tost la messe chanter
Fist l'en ou il eut grant mistere
En laquelle devés noter
Que l'amant en ung oratoire
Estoit la tendu de soye noire
Ouvré aparans fleurs d'acolies
Puis sur luy avoit ung suaire
Tout couvert de merencolies
Après ceste grant messe dicte
Damp prieur sy le vint querir
Portant en sa main l'eaue beniste
Comme pour le mener mourir
Et gens au devant de courir
Pour veoir la maniere du fait
Mais il sembloit qu'il deust perir
Tant estoit ja mort et deffait
Tout le nez blanc comme salpestre
Avoit et le vis deschiré
N'ame si ne l'eust sceu congnoistre
Qui ne s'en fust bien près tiré
Brief estoit bien fort empiré
Car n'avoit membre sur le corps
Qui ne fust tout desfiguré
Et les yeux tous batus et mors
De la fut mené en chapitre
Habillié tressauvagement
D'une fraquonne a façon de mistre
Et le surplus du vestement
Estoit de blanc entierement
A grandes manches a goutieres
Bien saint et cueilly proprement
Devant coqueluchon derriere
Puis au chapitre le suivirent
Tous les gens de sa parenté
Ou deux cordeliers les assirent
Chascun selon sa dignité
Les freres estoient d'un costé
Les parens et parentes d'autre
Voire en sy grande quantité
Que l'en ne veoit l'un pour l'autre
La fut le povre amant assis
Tout seul apart sus une selle
Ou moins regart fut lors assis
Des ungs et d'autres a merveille
Dont y eut a l'assemblee telle
Qui sans faire grant mouvement
En gratant souvent son oreille
Et en plourant mout tendrement
Quant damp prieur fut en sa chaire
Devant tous se print a prescher
Des grans biens du monde et de l'aise
Qui y fait les gens trebucher
Et comment la mort sans huchier
Vient acoup sans heure certaine
Que après lever il fault coucher
Pour monstrer que tout vient a peine
En oultre prescha des doulours
Qui vient de joye transitoire
Mais il ne parla point d'amours
Aumoins dont j'en aye memoire
Aussi n'en avoit l'en que faire
Consideré l'adversité
Ains valloit mielx beaucop se taire
Car peut estre qu'on eust tout gasté
Assez le sermon sy dura
Pendant lequel une foys loyel
De la main vers celle tira
Qui pour luy sy menoit grant dueil
Puis fist semblant d'avoir sommeil
Baissant la teste pas a pas
Toutesfoys en devint vermeil
Et sy croys qu'il n'y pençoit pas
Après ce service finé
Damp prieur la fist apporter
Ung vueil habit de gris tanné
Qu'on doibt selon l'ordre porter
D'autre part fist l'abit bouter
Que l'amant au monde vestoit
En commençant a l'ennorter
De dire auquel il s'arrestoit
Vous avés dist il liberté
Aage parfait et congnoissance
Vecy l'abit de vanité
Vecy celluy de penitance
L'un tire a dueil l'autre a plaisance
D'un bien de l'autre mal aurés
Se tandis qu'avés la puissance
Prenés lequel que vous vouldrés
Lors dist par sa dure responce
Je vueil la vie du cordelier
A cestuy du monde je y renonce
Sans jamais plus m'en habiller
Sique on le fist desabiller
Tout nud et la devant tant dieux
Pour le vestir en cordelier
Et ainsy fut religieux
Quant tous les hommes et les femmes
Le veirent tout nud despouiller
Des yeux jecterent grosses larmes
Assés pour ung jardin mouiller
Esvanouyr et petiller
En eussiés veu qui est grant chose
Et tant que pour les resveiller
Il couvint troys sextiers d'eau roze
Ne a peine croiré je jamais
Que se cordelier fust rendu
Eust veu le piteux entremés
Ou l'oeil sur l'une est estandu
Que son cueur ne luy fust fendu
En plus de deux mille parties
Et qu'il n'eust cy prins cy pendu
Jeté la son froc aux orties
Sa dame sy faisoit semblant
D'assés tost le dueil en passer
Mais lors une fievre tremblant
La vint de sy près embrasser
Que a terre la fist renverser
Tant fut la fievre forte et aigre
Par quoy la fallut deslasser
Chauffer et froter de vin aigre
Tout le monde après se leva
Pour a la rescousse venir
Et sy remede on y trouva
Fors qu'on fist a elle venir
Le cordelier pour luy tenir
La teste et bailler du triacle
Qui luy fist son cueur revenir
Et dist on que ce fut miracle
Mais ainsi qu'on la delaissoit
Illec tumba de son secours
Ou des manches de son corset
Ung cueur d'or esmaillé de plours
A elle baillié par amours
Du temps qu'avoit le vent au popre
Dont l'amant sy eut grant douleur
Et l'en veit l'en batre sa couppe
Les autres pour leur mal couvrir
A force leur cueur retenoient
Passans temps a clorre et l'ouvrir
Les heures qu'en leurs mains tenoient
Dont souvent les fueilles tournoient
En signe de devocion
Mais les deulz et pleurs que menoient
Monstroient bien leur affection
Or après ses misteres fais
Se povre amoureux vint requerre
A damp prieur d'estre profais
Soy jectant a ses piés a terre
Sy que damp prieur envoye querre
Le livre des veux qui fault lire
En luy commençant de cest erre
Telz motz et parolles luy dire
Tout le premier veu ordinaire
De ceans est obedience
L'autre povreté voluntaire
Dont viennent junes et penitance
Pour vertus avons pacience
Et chasteté qui est la plus haulte
Sy jurés a vostre consience
De les garder sans point de faulte
Aussy vous faites veu a dieu
Que a l'ordre vivrés et mourrés
Sans jamais partir de ce lieu
Sinon quant le bissac porterés
Et quant pour le couvent yrés
Querir l'aumosne et pourveance
Ne q'un pas oultre passerés
Se n'avés congié et licence
Item qu'en chemin ou voyage
Vous ne chanterés ne rirés
Que quant d'aventure au passage
Une femme rencontrerés
En l'oeil ne la regarderez
Ne luy ferés chiere ou feste
Ains bien tost vos yeux clignerés
En baissant vers terre la teste
Item qu'en prin temps nouvellet
Quant par boys ou champs passerés
Des que orez le rossignolet
Vos vigilles de mors dirés
Et que jamais ne dormirés
Soubz aubespin n'esglantiers
Autre part tant que vous vouldrés
Pourveu qu'il n'y ait des rosiers
Item s'en allant avés fain
Cuillir pourrés parmy les trailles
Pour menger avec vostre pain
Des franboises ou des prunelles
Pourpié persin lectues nouvelles
De quoy vous remplirés vos bouges
Et d'autres verdures ytelles
Excepté de groiselles rouges
Item qu'en logis de plaisance
Sur vostre vie n'aviserés
N'en lieu ou ait feste ou dance
Ains bien loing de la tirerés
Que quant menesteriés vous orrez
fleutes doucines ou vielles
Vous grain ne les escouterez
Mais metrés vos dois aux oreilles
Item qu'en passant par les rues
En rien ne vous amuserés
A veoir les dames bien vestues
Ainçoys comme feu les fuyrés
Que d'amours plus ne parlerés
Ne de telles folies mondaines
Que vert ne vermeil porterés
Bouqués roses ne marjolaines
Item quant serés invité
De disner en lieu ou en place
Vous pour le benedicité
Dirés a chascun prou vous face
Et s'estiés aussy froit que glace
Au feu ne vous bouterés
Ne pour signe de joye qu'on face
Vous ne vous en amourerés
De ce qui sera au disner
Vous pourrés hardiment taster
En gardant vostre oeil de tourner
Trop avant et de caqueter
Car l'en ne se peut mielx gaster
Vers femmes que de telz aveaux
Et aussy de trop fort bouter
Les piés par dessus les terteaux
Je ne dy pas se d'aventure
Vostre cousteau cheoit a terre
Que vous ne peussés a ceste heure
Bien vous baisser pour l'aler querre
Mais gardés comme feu de feurre
De pincer ne de tatonner
Car vous priés de ceste erre
In pace pour vos jours finer
Item vos mains ne torcherés
A ses deliés serviettes
Ne qu'en bien ne toucherés
De la matiere d'amourettes
Et se sur table y a violettes
Ne vous joués pas a les prendre
Ains pensés que sont joyes infaites
Et que deviendrons tous en cendre
Et quant ce viendra au lever
Que l'en met dedens ces chofrettes
Pour en amours cueurs eslever
Armeries sentiers violettes
Le signe de la croix lors faictes
Frappant la main contre le pis
Et cueillés toutes les miettes
Pour donner aux povres a l'uys
Item que plus ne manirés
Or argent monnoye ne vaisselle
Ne de telz biens riens ne prendrés
Soit de bourgoises ou damoiselles
Amy la rigle sy est telle
En convent n'avons que les vivres
Et acquerir robe cotelle
Lumiere feu chaussure livres
Encore nous est deffendu
D'autre nouvel habillement
Jusques le nostre soit fendu
De toutes pars entierement
Et sy ne fine aucunement
Que les plis soient cueillis tous drois
Ne l'abit fait joyeusement
Ains rondement en tous endrois
Outre on vous deffend par exprès
De ne prendre nulle chemise
Sentant muglias ou cyprès
Ne blanche que de grosse frise
Bordés a soye ne a devise
Esguillette ferree d'argent
Ne autre nouvelle exquise
Pour devenir plus gué ne gent
Aussy laisserés habillemens
Qui font l'omme droit comme ligne
Car devons a nos vestemens
Par derriere avoir une vigne
Les soliers persés sans empegne
Deux grosses boucles fermans
Porter bas cheveux sur le pigne
Sans jamais les faire en alemant
Item jurés semblablement
Que ne prendrés dons ne baguettes
Nouveaux a esjouissement
Sur saincte perse violette
Lassees a fleurs de violettes
Bourses de perles enlassees
Cordons a boutons d'amourettes
Ou soupirs de menues pencees
Item mouchoers deliés
Chenettes a fleurs d'oubliance
Gorgias trop menuz ploies
Pignes dorés a esperance
Les cuevrechiés de plaisance
Car prendre point ne les devés
Aneaux ou verges d'aliance
Ou fut escript mon cueur avez
En oultre nous est deffendu
De ne porter manches petites
Grans bonnetz sur le hault verdu
Chausses de mygraine eslite
Pourpoins taillés a marguerite
Ne de menger plaisant viande
Ne aussi succre de troys cuites
Sur peine de paier l'amende
Item vous avés a garder
De ses deux yeux tous fretillans
Que ses dames pour esclandrer
Font estre tousjours assaillans
Et dont les plus fors et vaillans
Sy y perdent l'entendement
Car ilz trenchent a deux taillans
Et tirent a eulx liement
Il y a des yeux d'autre façon
Doux yeux qui tousjours vont et viennent
Doux yeux eschauffans le peliçon
De ceulx qui amoureux deviennent
Doux yeux qui revont et reviennent
Doux yeux avançant la colee
Doux yeux qui boivent et retiennent
Et sy baillent bont et volee
Doux yeux reluisans comme asur
Qui sont perilleux et dangereux
Doux yeux tirans huille de mur
Dont souvent povres amoureux
Seuffrent mains tourmens doloreux
Sans en oser monstrer semblant
Doux yeux farouches et paoureux
Qui donnent la fievre tremblant
Doux yeux moitié blans moitié vers
Pour consoler et amortir
Doux yeux qui jectent de travers
Pour guerir ung amant martir
Doux yeux qui poingnent sans sentir
Doux yeux de piteux entremés
Qui font semblant de departir
Et sy ne bougent jamais
Doux yeux a xxv caras
Doux yeux a cler esperlissans
Qui dient c'est fait quant tu vouldras
A ceulx qui sentent bien puissans
Doux yeux en l'air resplendissans
Que chascun ainsi doibt bien craindre
Car ilz ardent tant sont glissans
Quant vous les cuiderés estaindre
Doux yeux renversés a grant haste
Doux yeux soubz rians aux estoilles
Qui dient c'est fait quant tu vouldras
Et faisant bater aux corneilles
Doux yeux jectans fermes oreilles
Qui font gallans nuyt et jour courre
Et entrer es feves nouvelles
Qui ne chiesent pas pour escourre
Il y a doux yeux d'autre sorte
Qui sont petillans et gingans
Dont compaignons portent la bote
Et changent souvent nouveaux gans
Telz gens servent a estringans
Ou a mignons dorelotés
Et les font tenir sy fringans
Qui n'ont garde d'estre crotés
Doux yeux indes esmerillons
Doux yeux empanés de saietes
Aussi safre que barbillons
Qui font marcher sus espinettes
Et gallans aller a mussettes
Soit a geler a pierres fendant
Baiser les huys et les cliquettes
Pour les dames qui sont dedens
Doux yeux de joye et de soulas
Doux yeux tournans comme la lune
Dont les plus huppés crient helas
Sy ne fournissent de peccune
Avaler leur fault ceste prune
Et font telz yeux rire et gemir
Ceulx qui tiennent telle fortune
Sy ont beau loisir de dormir
Doux yeux rians par bas et hault
Ruans a destre et a senestre
Qui volent sur ung escherfault
Et par ses treilles et fenestres
Il n'y a jacobin ne prestre
S'il en a ung ris a demy
Qu'il n'en perde maintien et estre
Tant en sera lors mon amy
Doux yeux aussy vers que genesvre
Couvers de hayes et de buissons
Qui font gallans gauger le poevre
Et entrer en fortes frissons
Ceulx qui ont au cueur telz glaçons
Combien qu'ilz soient fort engelés
S'ilz n'ont garde que leurs chaussons
Passent par dessus leurs suliers
Item doux yeux frans et nays
Qui par dessus leur gorgerettes
Tirent une lieue de pays
Et sont plus picquans que languettes
Ilz envoient ung homme braies nettes
Quant le trait est menu plié
Il n'y a coffre ne layettes
Qui trestout ne soit desplié
Doux yeux singlans et desvoyés
Qui jectent ung maintien sauvaige
Dont communement vous voyés
Ses povres varletz de village
Porter dessoubz leurs bras la targe
Ou ung bouquet a la sainture
Et puis sauter a l'avantaige
Ilz ont bon temps mais qu'il leur dure
Doux yeux traversans et courans
Doux yeux enferre et empenne
Qui prennent gens aux las courans
En portant creance par signe
Il n'est personne estrange ou fine
Qu'il ne face aprivoiser
Car ilz sont de la vielle myne
Ilz vallent ung demy baisier
Item doux yeux pipesonnes
Ruans tousjours en ceste poste
Qui envoye galans aux mirouers
Pour veoir derriere leur cote
C'elle est nestoiee ou bien se porte
Et puis se monstrent de rue en rue
Pour leur dame qui fait la morte
Tire toy arriere moreau rue
Doux yeux pour festes et dimenches
Doux yeux blans et riquanerés
Qui font vestir habis estranges
A ses varletz dimencherés
Et porter cordons fringuerés
Mon dieu qui sont embesongniés
Et les verrés rire aux paroys
Pour leurs cheveux qui sont pignés
Doux yeux marchans sur le duret
Qui portent mors a patenostre
Et ceulx la dient adieu fleuret
Laissés les aller ilz sont nostres
L'en en use qu'au jour d'apostre
Brief les gallans qui en sont ferus
Pevent bien dire leur patenostre
Car jamais ne sont secourus
Doux yeux a lorenge d'ortie
Doux yeux qui pleurent et soupirent
Doux yeux qui sourient sans partie
Qui plus avant vont plus empirent
De ce dont les compaignons tirent
Auffort sy fait leur cueuvrecchief
Que souventesfoys les dessirent
Tant seuffrent peine et meschief
Doux yeux precieux et bigotz
Aians cours parmy ses monstiers
Qui font dancer sur les ergos
Et courir plus dru que trotiés
En ouvrant heures et sautiers
Telz yeux percent les vestemens
Et ce fait vers les benestiers
Gare derriere pour les alemans
Doux yeux qui jectent eau par feu
Doux yeux atrayans et fetis
Doux yeux veyans de place en lieu
Dont sont prins les povres chetifs
Et d'autres yeux supellatifs
Que vous tousjours escheverés
Et renvoyerés in remotis
Ou vostre ordre transgresserés
Item s'en une hostellerie
Pour loger vous fault transporter
S'il y a feste ou mommerie
Trop bien vous y pourrés bouter
Mais se voyés grain s'acouter
Le varlet et la chamberiere
Fuyés vous en sans arrester
Par l'uys de devant ou derriere
Encore quant il adviendra
Que dueil et paix y trouverés
Coucher tout seul y couviendra
En ung galetas ou yrés
Et la a terre dormirés
Estandu comme une escrepvisse
Ne a vostre lit souffrerés
Approcher fille ne nourrisse
Item s'en venant de quester
trouvés bourgoises ou damoiselles
Qui n'ait ame pour la monter
A cheval dont prier vous vueille
Affin que point ne se travellie
A deux mains l'alés embrasser
En tenant l'estrier et la s'elle
Mais gardés bien de la blesser
Et se son fouet chiet a terre
Ou qu'il soit en chemin perdu
Fuyés hastivement le querre
Sans estre effrayé ny perdu
Et combien que soit temps perdu
Sy fault il aux dames complaire
Car le loier en est rendu
Et viennent les biens de leur plaire
Des gens a tant mal gracieux
Qu'il n'en deigneroit reculer
Ne a peine pas tourner les yeux
Tant vont les femmes ravaler
Mais ne sont dignes d'y parler
On leur doit dire a leur museau
Rien rien quand les verrés filler
Levés leur tousjours leur fuseau
Cela en arriere ou avant
Trop n'est pas prejudiciable
Car autant en emporte le vent
Et sy est euvre cheritable
Aussy fault estre amiable
Quant l'aumosne leur requerrés
Combien que le moins convenable
Est le mieux quant vous pourrés
Et se une trouvés sy hardie
Qu'elle vous requist de l'assoudre
Ou lasser sa cote hardie
Ne vous joués a l'estandre
Trop bien cueillir ou ses plois joindre
Pourrés et torcher son patin
Mais gardés en cueillant de attaindre
Ne de point toucher le tetin
Frere ne vous y joués pas
Car sans quelque compassion
Lors vous faudroit passer le pas
Et souffrir mort et passion
Ne point n'aurés remission
Pour ung sy grant cas perpetrer
Ains acoup sans confession
L'en vous feroit lors degrader
Item au soir après souper
Qu'on s'ebat a maintes façons
Pour le temps en bien ocuper
Vous recoudrés vos peliçons
Et estudirés les leçons
Qu'il fauldra chanter a matines
Ne n'yrés vers prez ne buissons
Baver ne trainer vos botines
Item et sy ne jourés
Au siron ne a glinettes
Au jeu de mon amour aurés
A la queuleuleu ou aux billettes
Au tiers au perier aux bichettes
A gecter au sain et au dos l'erbe
Au propos pour dire sornettes
Ne que paist on ne que paist herbe
Item s'on dance au chapellet
Troys a troys ou a dance ronde
Mettés a vos yeux ung volet
Pour fouyr ceste joye du monde
Et de la troys lieux en la ronde
Allez vous en boire et menger
Car en lieu ou telle joye habonde
Ne se fait pas bon heberger
Item devés savoir beau sire
Que amours a excommeniés
Tous ceulx qui dancent le doux pere
Comme maudis et regniés
Car la sont trop apleniés
Baiser est vendu a vil pris
Dont les verrés bien manier
Et en rendront ce qu'ilz ont prins
Ne suffist il pas dea de dire
Que se n'est q'un esbatement
Ou l'en dance sans point mesdire
Car il y a double embrassement
Et sy baise l'on trop longuement
La faulx amans ont leur fortune
Mais les loyaulx n'ont que tourment
Et sy fault qu'en portent la prune
Item se allés sus acouchees
Ne vous aprouchés près des baings
Ains des que verrés ces trenchees
De fleurs roumarins aubefoings
Serrés tant que pourrés les poings
Et pencés lors a paradis
En disant las a jointes mains
Pour les mors ung de profundis
Et se par force ou par contrainte
Pour baigner vous font despouiller
La corde contre la chair sainte
Ayés tousjours sans deslier
Ne m'alez point l'eau brouller
Fleurer les bouqués des poupines
Saillir taster ne chatouiller
Ne baiser entre ces courtines
Vela les veux de l'observance
Frere que avés affaire
Ne n'est sy bonne penitance
Que de se garder de mal faire
Par quoy pour mielx y satisfaire
Laisser fault toutes vanités
Sy jurés d'iceulx parfaire
Et ainsy vous le promettés
Lors se povre amant tout moullié
De pleurs fist les veux et promessez
Illec estant agenouillié
Sa bouche contre terre verse
En grant dueil et en grant detresse
Comme povés presupposer
Puis vint en signe de leesse
Tous les religieux baiser
Et pour l'oster de vaine gloire
Et qu'il n'eust l'oeil au monde ouvert
Damp prieur a son gré fist faire
Ung champ de roumarin vert
Lequel de feu ardant couvert
Devant ses yeux le espandi
Voiés dist il la fumee part
Sic transsit gloria mundi
Or pencés quelz piteux revers
Quelz ennuys quelz gemissemens
Quelz biens mondains mys a l'envers
Quelz durs evanouissemens
Quelz pleurs quel esbahissement
Et quelles destresses la furent
Sy m'esbahy veu les tourmens
Que aucuns de dueil n'en moururent
A tant fut mys sans sainture
Le povre homme en une salette
Qui n'est trop clere ne obscure
Ou après la procession faicte
Se lieu s'appelloit la chambrette
De dieu a y faire les dons
Ou la maintes gens de la feste
Firent illec de tresbeaux dons
Illec vindrent seurs et cousines
Oncles nepveux freres bel antes
Dames bourgoises et voisines
Amys amyes parens parentes
Et autres maintes femmes gentes
Qui a ce cordelier pour voir
De donner estoient mout ardantes
Et en firent moult leur devoir
Entre les autres y veis
Dont l'une donna ung breviaire
Et l'autre ung galice a devis
Et sa dame une cordeliere
Pour luy faire une troussouere
Mais par ce que dessus la houpe
Sy avoit du vert et non guere
Damp prieur par despit la coupe
Helas quelle erreur quelle pitié
Ou sont amours qui ne fendirent
Lors cest hostel par la moitié
Et que la vengance n'en firent
Les dons fais les gens s'en partirent
Car chascun estoit travaillé
Et pour disner se retrahirent
Et sur ce point je m'esveillé
Qui fut lors bien esperdu
Se fut moy je vous en assure
Car sicomme tout fust fondu
La ne veis corps de creature
Mont ne maison ne couverture
Chamberiere ne bastouer
Sy ay escript a l'aventure
Par maniere de me jouer
De tous les amoureux martirs
Transis banis et doloreux
N'en veis nulz tant estre amortis
Comme se povre malheureux
Telz gens sont mal amoureux
N'en leur cueur espoir n'abonde
Combien qu'on tient cil tant heureux
qu'il ne vouldroit pas vivre au monde
Sy vous prie mes treschieres dames
Qui vous plaise de souvenir
De l'amant qui rendit les armes
Pour bon cordelier devenir
Et que pour l'ordre maintenir
L'aumosne aux freres espandés
Ou au moins qu'au temps advenir
Les ayez pour recommandés
Plusieurs gens envoient a romme
Qui a leur huys ont le pardon
Il n'est loyer que de povre homme
Ne charité que de pur don
Ayez mes dames pitié don
Des amoureux de l'observance
Car ilz ont trespiteux gardon
Dieu leur doint bonne pascience
Imprimé a paris au saulmon devant le pallays Par Germain Bineaut Libraire et imprimeur Le iiii jour D'octobre L'an Mil CCCC iiiixx et x
Sy fine l'amant rendu cordelier en l'observance d'amours