CHANSON.
Austere & triste solitude
A qui mon esprit fait la cour,
Permets qu'en ce bien-heureux jour
Le plaisir soit tout mon estude,
Et si tu veux encor m'obliger doublement
Prens part à mon contentement.
Chasse la nuict & le silence,
En faveur du jour & du bruit,
Souffre tout ce qui te destruit
S'il est de nostre intelligence;
Autrement le bon-heur que je veux raconter
M'obligeroit à te quitter.
Sylvie n'est plus enrumée,
Sa bouche me le dit hier;
Mais ce bien ce doit publier
Par la voix de la Renommée.
Reprens donc ton silence & ton noir vestement,
Mais souffre mon ravissement.