SCENE VI.
PORCIE, sa Compagne.
PORCIE.
Donques les bras croisez en ce malheur extresme
Je me voy sans rougir differente à moy mesme?
Doncques ma lascheté m'oste le souvenir
Que Brute ce heros vient de m'entretenir!
Arrestez-vous mes pleurs, son adorable image
Vient defendre à mes yeux de vous donner passage,
Et vous, tristes soupirs, tesmoins de mon soucy,
Cedez à la vertu qui vous bannit d'icy,
Mais non, n'escoutez pas ma requeste importune,
La vertu se plaindroit en pareille fortune.
Je voy tout ce que j'ayme en danger aujourd'huy,
Brute & la liberté qui ne vit plus qu'en luy;
Toutesfois banissons ce mouvement de femme,
Ma naissance suffit pour instruire mon ame,
En vain irois-je ailleurs rechercher un patron,
C'est assez que je suis la fille de Caton,
Sus donc faisons paroistre à nos trouppes fidelles
Que je brusle d'ardeur de combattre pour elles,
Et qu'avec son portraict mon pere a mis en moy
Un desir violent de n'avoir point de Roy;
Monstrons que dans le choc des plus rudes alarmes
Je sçay verser du sang aussi bien que des larmes,
Allons braver la mort au camp des ennemis,
Et vengeons aujourd'huy les maux qu'ils ont commis:
Il ne m'importe point d'obtenir la victoire,
Mon sort est assez beau, je n'ay que trop de gloire
Pourveu que combattant pour le peuple Romain
Je meure comme Brute une espée à la main:
Toy ne traverse point ce conseil salutaire,
Aussi seroit-ce en vain qu'on m'en voudroit distraire,
Il est grand, il est juste, & selon la saison.
LA COMPAGNE.
Mais vous ne dites pas qu'il choque la raison,
Madame, moderez cette boüillante rage,
Pour mieux voir le danger où vostre esprit s'engage:
Quoy! sommes-nous tombez en de si foibles mains,
Que vous n'esperiez rien du salut des Romains?
Brute auroit-il perdu son courage heroïque?
Et ne pourroit-il rien pour nostre Republique?
Non, il est toujours Brute, & comme ses parens,
Il ne s'arme jamais sans chasser des Tyrans;
J'espere quand à moy qu'il aura la victoire,
Mais vostre grand dessein que sert-il à sa gloire?
Et si l'executant vous rencontriez la mort,
N'auroit-il pas sujet de blasmer vostre effort?
PORCIE.
On peut bien sans mourir suivre cette entreprise.
LA COMPAGNE.
Mais si Brute mouroit, et que vous fussiez prise,
Que tout fut en butin aux Tyrans inhumains,
Quel regret auriez-vous de vous voir en leur mains?
Et sans pouvoir mourir vous sçavoir condamnée,
D'estre dans vostre ville en triomphe menée?
Le penser seulement me fait trembler d'horreur,
Pour gauchir cét escueil, calmez vostre fureur,
Madame & si le Ciel vous donne du courage,
Tesmoignez-en la force à brider vostre rage:
Endurez sans vous plaindre, & que jamais vos pleurs,
Ny vostre desespoir m'expriment vos douleurs:
C'est la lice d'honneur où la vertu s'espreuve,
Et le port plus certain où le repos se treuve:
Outre que si le Ciel vous mal-traitte aujourd'huy,
Vous aurez plus de droict de vous plaindre de luy.
PORCIE.
En fin à tes raisons ma fureur diminuë,
Comme aux rais du Soleil l'espesseur d'une nuë,
Je me laisse emporter à tout ce que tu veux,
Allons à Jupiter faire offre de nos voeux:
Et si nous le trouvons encor inexorable
A soulager les maux d'un peuple miserable
Je sçay depuis long-temps quel sera mon devoir,
Mais qu'un courroux sied mal lors qu'il est sans pouvoir!