SCENE SIXIESME.
CHIMENE seule.
Amour sors en fin de mon ame,
Porte ailleurs ton triste flambeau,
Puisque les cendres du tombeau
Doivent tantost couvrir & mon corps & ma flame,
Mes regrets vont m'oster du jour,
Cherche un plus aimable sejour
Abandonne mon coeur, ma Rivale t'appelle,
Va regner desormais dans ce superbe sein,
Puisque pour l'adorer, Rodrigue est infidele,
Je vay par mon trespas approuver ton dessein,
Ne m'entretien plus de sa gloire,
Ny du souvenir de ses faicts
Que tant de merveilleux effects
Sortent avecque toy de ma triste memoire.
Ne laisse rien dans mes esprits
Que la vengeance & le mespris
Qui le doivent punir d'une amour criminelle,
Rens à mes tristes yeux leur premiere rigueur:
Il est victorieux: mais il est infidele
Et par cette raison il n'est plus mon vainqueur
Mais que me servira ma hayne
Que fera mon coeur irrité?
Malgré son infidelité
Il est tousjours Rodrigue, & moy tousjours Chimene:
Non je ne vis plus sous sa loy,
L'ingrat a violé sa foy,
Aymant une perfide, il est traistre comme elle
Chymene reprens donc ta premiere rigueur,
Il est victorieux, mais il est infidele,
Et par cette raison il n'est pas ton vainqueur.
Qu'Arragon tremble & le revere,
Qu'il vainque mille nations,
Toutes ces belles actions
N'effaceront jamais le meurtre de mon pere;
Tousjours ce sanglant souvenir
M'obligera de le punir
Mais icy ma puissance est moindre que mon zele,
N'importe, reprenons ma premiere rigueur,
Il est victorieux, mais il est infidele,
Et par cette raison il n'est pas mon vainqueur.
Mon vainqueur! il ne se peut faire,
Ostons luy ce nom glorieux,
Qu'il soit ailleurs victorieux:
Icy je suis encor sa mortelle adversaire,
Un coeur qui peut dessous ses loix
Ranger la liberté des Rois
Pourra bien se vanger de cette ame rebelle.
Ouy Chimene, reprens ta premiere rigueur,
Il est victorieux, mais il est infidele
Et que par cette raison il n'est pas ton vainqueur.
Que me sert que toute la terre
Soit pleine du bruit de ses faicts,
Et qu'il ayt mis par tout la paix
Si parmy ce repos seule je suis en guerre:
Qu'il soit le plus grand des Guerriers,
Qu'il soit tout couvert de lauriers,
Il ternit tout l'esclat d'une pompe si belle
Chimene reprens doncq ta premiere rigueur
Il est victorieux, mais il est infidelle:
Et par cette raison il n'est pas ton vainqueur.
Non, tesmoignons plus de constance,
Faisons voir moins d'inimitié
Et servons-nous de la pitié
Pour prendre une plus noble & plus haute vangeance,
Qu'il soit ingrat & desloyal
Traittons-le d'un amour esgal,
Il ne sçauroit souffrir de peine plus cruelle,
Non Chymene, reprens ta premiere rigueur,
Il est victorieux, mais il est infidele,
Et par cette raison il n'est pas son vainqueur.
Faisons voir comme en son absence
Mon coeur l'a tousjours adoré,
Et que mesme il l'a preferé
A ceux dont il devoit redouter la puissance;
Si cela ne le touche pas
Cherchons un genereux trespas,
Esteignons dans mon sang une flame si belle,
Et montrons en mourant à ce perfide coeur,
Que jusques à la fin je suis tousjours fidele,
Que je suis sa Chymene, & qu'il est mon vainqueur.