SCENE CINQUIESME.
LE ROY, DOM DIEGUE, L'INFANTE.
LE ROY.
Dom Diegue enfin le Cid a-t'il l'ame contente,
Sçait-il que j'ay dessein de luy donner l'Infante,
Consent-il aisément à ce nouveau projet.
DOM DIEGUE.
Vous estes son Roy, Sire, il est vostre sujet,
Et par cette raison il ne peut sans offence,
S'opposer au devoir de son obeïssance:
J'ay sondé toutesfois son esprit sur ce point
Son inclination ne s'en esloigne point,
Et je croy seulement qu'une modeste crainte
Arreste ses desirs & le tient en contrainte.
LE ROY.
C'est, que Chymene encore a sur luy tout pouvoir.
DOM DIEGUE.
Il l'oublira, Seigneur, plustost que son devoir
Le comte vous en est une preuve certaine
Des ce temps-là Rodrigue idolatroit Chymene,
On le veid toutesfois luy-mesme se trahir,
Et s'il sçait bien aimer il sçait mieux obeir.
LE ROY.
Je n'ay jamais douté de son obeïssance
Et sa seule vertu m'en donne l'asseurance.
Vous, ma soeur, acceptez son amour & ses voeux
Et pour toute raison sçachez que je le veux,
Il n'a receu du Ciel ny sceptre ny couronne
Et sa grandeur consiste en sa seule personne:
Mais c'est là qu'il a faict ses plus nobles efforts,
C'est là qu'il a versé ses plus riches thresors:
Son coeur est l'Element où la valeur reside,
Sa belle ame est le trône où la vertu preside
Et les perfections qui le font estimer
Sont les solides biens que vous devez aimer.
L'INFANTE.
Un tel commandement, Monsieur, ne m'est pas rude,
Je prends facilement cette douce habitude,
Ce que vous estimez je ne le puis haïr
Vous devez commander & je dois obeir.
LE ROY.
Que Chymene à mes voeux n'est-elle aussi facile,
Je ne bruslerois pas d'une flame inutile
Je serois satisfaict, & mes desirs contens
Ne m'obligeroient pas de languir si long-temps:
Mais c'est trop endurer une si dure peine,
Il faut resolument que j'espouse Chymene,
Je l'absous de l'amour qu'au Cid elle a promis,
Aux Princes comme moy ce qui plaist est permis.
L'affection des Rois n'est jamais temeraire,
Et le respect sied bien seulement au vulguaire;
Envoyez-la querir, & lui faictes sçavoir
Qu'en vostre appartement je desire la voir,
Pour lui communiquer un dessein d'importance,
Et qui pour son effect exige sa presence
Je me lasse à la fin de vivre en cet ennuy,
Je veux que cet hymen s'accomplisse aujourd'huy.