SCENE TROISIEME.
CHERIFFE seule.
Va desloyal je cognois ton envie,
Cheriffe seule helas te faict haïr la vie,
Et si tost que tes yeux ont quitté cet object
Tu quitte quant & quant ce funeste project:
O Ciel quel est ton sort Princesse infortunee:
Quel malheur te poursuit, sous quel astre es-tu nee,
Que tes justes desirs & tes pretentions
Succedent au rebours de tes intentions,
Cid mais indigne, Cid qui me rens malheureuse,
Desseins precipitez, fortune rigouruse,
Pernicieux amour, importunes fureurs
Ne finirez vous point ma vie ou mes erreurs.
Ouy, je sens que desja ma force est affoiblie
Et de ce triste corps mon ame se delie,
Les ombres de la mort errent devant mes yeux:
Rodrigue viens au moins recevoir mes Adieux.